Galat 1
1
Moswɨhlɨ
1Mɛm Pol, lʉmlʉ mo Yesʉs-Krɨst, ó lé etile bɨn kalara nwa. Me abe lʉmlʉ mo nuu mʉr fih. Abe e mʉr a cen me mpaŋla ó, me mu ó lʉmlʉ. Yesʉs-Krɨst nye mʉr tɨʼ ó b'a lomo me, bé e Zyɛm Sɔŋ, waa a pɛ̀h nye é foo e.
2Bɨh e bʉʉ obuʼla ndɨ wâʼ ɛ, bɨh bé esoho bɨn, mɨmbɛr mɨ Zyɛm ndɨ é lal Galat ɨ.
3Mocyɛʼ mo mpom le motala mo Zyɛm Sɔŋ ga wina bé e Da Yesʉs-Krɨst, mé swɨŋɨ é bɨn. 4Yesʉs-Krɨst nye mʉr tɨʼ a si dwè, jala e mɨsyem ga mina. Nye a sa no ó, nye nkʉʼ syɛb bɨna ga é mbi jɔʼ yi, yaa ndɨ é bul bebe e. Yesʉs a sa no ó, mpʉ Zyɛm Sɔŋ ga wina a gwɨm ɨ. 5Kum diʼe e Zyɛm njʉmdia e njʉmdia. Amɛn!
Mbɨambɨa Lɔɔ fih, wé abe
6Me é jehe lé ebee wáa mbi bɨn bɨ ka lɨ tumo Zyɛm koo e, nyɛɛ waa a jebe bɨn é zi ncwɨncwɨa mo Krɨst ɨ! Bɨn bɨ bana liʼe nye, cen mɨleme min é nko paʼ fih, gumo bɨn lé ejoʼo ó, yé e guu lɔɔ fih ndɨ é bul mbɨa ɛ. 7Sa gwar, é l'ocyecye, guu lɔɔ fih ndɨ é mbɨa, laa Mbɨambɨa Lɔɔ ɛ, wé abe! Bʉʉ bʉr mu ó lé ezabra bɨn buʼo. Bé egwɨm cene Mbɨambɨa Lɔɔ mo Krɨst, cenɔ we guu mbi fih. 8ǃBɨh bʉr o tɨ, nkʉ engles duho é jobo kʉ, si lɛɛ bɨn Mbɨambɨa Lɔɔ, siila e waa bɨh bé a lɛɛ bɨn nɛʼɛ, Zyɛm káala mʉr waa! 9Bɨh bé a si bɛa lɛɛ bɨn no. No ó, banana, me ebâʼle lɛɛ bɨn ya ó, ǃɨ mʉr si lɛɛ bɨn «Mbɨambɨa Lɔɔ» fih, siila e waa me a ntɛŋ bɨn nɛʼɛ, nye nʉŋa bɨkɔ́ɔlʉ!
10No ó, banana, bɨn bé etoŋlo é yé? Zê me lé ekʉ bul saa ó, bʉr dweʼ me mokebe ɛ? Zê me lé esaa ó, Zyɛm dweʼ me ma ɛ? Zê gwɨma yam, yé ó bʉr kpɛlɨ me ɛ? Nkʉ me be ó be, sa sa bʉr o si nwaʼ lé egwɨm nɛʼɛ, mpa me aka kunbo e syɛl mosa mo Krɨst.
Mpʉ Pol a taare cyelɔ lʉmlʉ ɨ
11Obɨɔ ga bam, me egwɨm ó bɨn gʉŋa ó, Mbɨambɨa Lɔɔ me lé elɛɛ bɨn ɨ, wé a baakʉŋɔ kʉʼo e pɨʼ bʉr. 12Me a baajoʼo we é nʉm nuu mʉr. Abe nteme e mʉr a dwe me sikʉlʉ tɨ. Wé ó mɨfela mɨlɔb Yesʉs-Krɨst nye mʉr tɨʼ a gwih me e.
13Bɨn bé a be ó si joʼo lɔɔ tiʼ yam. Bɨn bé egʉa mpʉ me a kœʼ bɨbla ebò e cyen é molu pihe e. Me a be é jɔʼ yaa ó, me dina lé edu mɨnjwɨr mih, oYʉden. Bɨn bé egʉa mpʉ me a gba nyʉl lé etíile bʉr o Mbɛr-Zyɛm ɨ. Me a be-be e gwɨma ó, me dimle ó we! 14É bʉr o mya wam, me ó b'a bul du buʼo oYʉden. Leme, wé a be ó me é ntɨɨɨŋ ó, me duʼo mɨnjwɨr bɨmpam bih byé a liʼe bɨh e mye e.
15Sa gwar, Zyɛm nyɛɛ a ka bee embɨa é nko paʼ we ó, nye lɛʼla me ncwɨncwɨa. No ó, nye a bɛa cyel me é dia syɛl mosa we ó, me dina é mo mo ayo. 16Nye a bee embɨa é nko paʼ we nteme ó, nye lɛʼla me Mwan we, le elomo me ó, me lɛŋɨ Mbɨambɨa Lɔɔ we boo bʉr o ndɨ abe oYʉden ɨ. Me a baadî mʉr bɨpuno le motié ó, nye dweʼ me motɨɨ me tɨ. 17Dam be baa b'a taare be mɨlʉmlʉ mo Yesʉs-Krɨst ɨ, me a baato Yerʉsalɛm, to bee be. Me a kʉ to ó é lal Arabi. Pie tɨ, me a si fiʼ, to Damas. 18No ó pie e mɨmbu mɨlɛl ó me a ka ze to Yerʉsalɛm ó, me toʼ, to bee Sefas, ó me gʉŋa nye. Me ntɔʼ ja gʉʼ molu ewʉm e motɛn, bɨh e boo nɔɔ lé elɛɛla. 19Me a baabee nuu mʉr fih é sama mɨlʉmlʉ. Me a kʉ ka bee ó njɨ Jacques, waa ndɨ mɨɔ mo Da Yesʉs ɨ.
20(Sa me tile nɨ, yé ó cyecye. É mih mo Zyɛm, me ebâʼle lɛɛ ó, me asa mpʉl.)
21Pie tɨ, me ze to é lal Siria ndwe e waa Silisia. 22Cye yaa yiyɛh, mɨmbɛr mɨ Zyɛm mu é zyɛŋa wɔɔ boo Yesʉs-Krɨst, myaa ndɨ é lal Yʉda ɛ, myé a baapa gʉa me. 23Bé a be yɛɛ ó lé ejoʼo-joʼo mpʉ bʉʉ bʉr, bé a lwib é lʉ wam ɨ. Bé ó: «Mʉr a dɨ tíile bɨna ga é molu pihe e, nye mu bananaʼ ó lé ebula yeʼle bʉr ocyecye é lɔb buʼo nye a gwɨm dimle e.» 24No ó mɨmbɛr mɨ Zyɛm myaa, myé a ze dwe Zyɛm kum é lɔb wam ɨ.
Currently Selected:
Galat 1: ozmBad
Highlight
Copy
Compare
Share
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
