2 Korɛnt 12

Mbea wé a duho Pol é jobo kʉ ɨ

1Yé ekʉ jala ó, me doʼa e me mʉr tɨ. Sa yaa, yé abe mɛm e ba nyɔm. Dam be no, me paʼ lɛɛ bɨn yɛɛ sa jehe me a bee é lima ɛ. Me lɛŋɨ bɨn nteme mɨfela mɨlɔb Da Yesʉs a gwih me e. 2Me egʉa nuu mʉr é zyɛŋa wɔɔ boo Krɨst, muh mɨmbu ewʉm e mɨnâ. Mʉr waa a si nʉŋɔ, bɨnɔ kʉ, to pyal é jobo lɛl tʉŋlʉ. —Nkʉ nye a to ó, nye dina é cye mʉr ye nɛʼɛ, me agʉa. Nkʉ nye a baabe e nyʉl bɨpuno é jɔʼ yaa nɛʼɛ, me nteme agʉa. Zyɛm nye ome ó ndɨ ekʉ gʉa. 3—No ó, me egʉa mbi mʉr waa. —Nkʉ nye a to ó, nye dina é cye mʉr ye nɛʼɛ, me agʉa. Nkʉ nye a baabe é nyʉl mʉr é jɔʼ yaa nɛʼɛ, mɛm, me agʉa. Zyɛm nye ome ó ndɨ egʉa. 4—É mpʉ nye a bɨnɔ, to pyal Paradis ɨ, no ó nye a joʼo mɨlɔb ndɨ abe e nkul elwibɔ ɛ. Yé mpene ó, mʉr alwib mɨlɔb myaa. 5Me ódoʼo ó njɨ e mʉr waa. Sa gwar, é nko paʼ wam, me ákwoʼ doʼo e me mʉr tɨ, alaa ó me doʼa e l'ecyɛʼ me ndɨ e le e. 6Nkʉ me be ó be, be lé edoʼo e mɨmpaŋ bɨsyɛɛla byam nɛʼɛ, mpa mɨ taŋle lɔɔ bɨsyɛɛla byam é l'ocyecye. Yé a ngbaa be ó, abe lɔɔ mo gʉ. Sa gwar, mɨ kamle me mʉr tɨʼ lé edoʼo e mɨmpaŋ bɨsyɛɛla byam no, lé ebene ó, nuu mʉr amu dwaabe me, laa bim nye lé ebee me lé esa, nkʉ bim nye a joʼo me lé elɛɛ ɛ.

7Zyɛm a bee ó, mpuo mɨfela mɨlɔb nye a gwih me e, nye amu jaa sa ó, me nkɛŋɨ nyʉl. Nye ze gba me mpe esyɛb é nyʉl tʉŋlʉ. Mpe esyɛb waa a be ó mpʉ mwa mɨlʉmlʉ mo Satan, lé eze ŋmɛh me é fuura. 8Me a si jwɨʼla e Da Yesʉs, pyal zɔʼ lɛl ó, nye pɛʼɛ me esyɛb laa é nyʉl. 9Nye ntɔʼ bɨha ó: «Ncwɨncwɨa me lé elɛʼle go e, nye si jala go, ebe, nkul wam, nye ekʉ nyin ntinɨ e ntinɨ ó, é jɔʼ me lé eze é nkɔm mo mʉr ndɨ é cyɛʼ ɛ.» Ebe no ó me ódoʼo e l'ecyɛʼ lam, sahle e! Nkul mo Krɨst nteme, nye òdi é me. 10Ebe no ó me ndɨ e bɨsʉhʉ é leme ó, me diʼe cyɛʼ-bol, me lwɨɔ, me sia e mɨtuu, ó me tíilɔ, le ebi mosono é l'efu mo Krɨst ɨ, ebe, é jɔʼ me ndɨ é l'ecyɛʼ ɛ, é jɔʼ gwar e gwar yaa ó me ndɨ e nkul nteme.

Pol lé esyɛl ba e l'obuʼla o Korɛnt

11Me mu ó gʉ, ebe, si bana lwib mbi bɨlwib bɨnɨ. Bɨn ó b'a sa ó, me diʼe ye, ebe, yé a be ó si jala ó, bɨn dweʼ me duu, ebe, me abe pihe mɨmpʉmpʉl mɨlʉmlʉ lé edoʼo ó, myé ó me dolo e, dam be ó, me abe sɔʼɔ. 12Bɨdweʼle bɨ nkul lé elɛʼle ó, me ó kʉ be mpaŋ lʉmlʉ ɨ, byé a si kʉ lɛʼlɔ é mih mɨn é pono. Me a si dihbe mɨtuu, le esa bɨdweʼle bɨ nkul e bɨsa bɨ jehe ndwe e mosima. 13Yáa syɛɛ me a to sea boo myʉʉ mɨmbɛr mɨ Zyɛm, me a be, asea bɨn ye e? Sikʉlʉ gwar me a be, adwe bɨn ɨ, yé a be ó njɨ yaa enkɛɛ mbeʼ modile wam! Duʼo ga me lé esi sa bɨn bebebebe syɛɛla yaa!

14Mbe ga: mɨ kʉmsa ó, me ntaʼ gʉʼ bɨn ye. Yé óbe ó cyen lɛl. No ó, me ákwoʼ gba bɨn tuu é nyʉl, ebe, me agwɨm sɔʼɔ e bɨn. Me egwɨm ó, njɨ bɨn bʉr o tɨ, ebe, ntʉʼ bwan lé ejala le esyɛŋ bɨsɔʼɔ é l'efu le obyɛl bɔɔ. Obyɛl o ndɨ ejala le esyɛŋ-syɛŋ bɨsɔʼɔ é l'efu e bwan bɔɔ. 15No ó, mɛm, me ókʉ dimle mɔn yam, dimle nteme tiʼ yam é l'efu e bɨtiʼ bin. Zê yé ó cɨcyel é jɔʼ me lé eto dolo lé ekpɛl bɨn paʼ e paʼ, bɨn bɛɛ l'akpɛl me e? 16Bɨn bɨ mɛʼle ó, me a baagba nuu mʉr tuu é nyʉl lé enkɛɛ mbeʼ modile wih. Dam be no, bɨn bɛɛ lé elɛɛ ó, mpʉ me ndɨ e bɨlwib bɨkʉʉŋʉ ɨ, no ó me a mɛr bɨn é mpila mpʉl wam ɨ. 17Zê me a si díbe bɨn sɔʼɔ é zi bɨkʉʉŋʉ, cwɨɨ é mɨlʉmlʉ me a lomlo bɨn ɨ? 18Me a si jwɨʼla e Tit bé e mɨɔ wih, ó bé toʼ, to naa bɨn. Zê Tit nyɛɛ a si díbe nteme bɨn yʉʉ sɔʼɔ é zi bɨkʉʉŋʉ? Zê bɨh e nɔɔ, bé a baakœʼ ebò e cyen egwar, e mɨleme jwɨʼ gwar ɛ?

19Taare é molu pihe, ze pyal é banana, bɨn dina lé etoŋlo ó: «Pol mu ó lé ekar é mih ga mɨna.» Hɨʼɨ, me ekʉ ka kar ó njɨ é mih mo Zyɛm, é mpʉ Krɨst lé egwɨm ɨ. Obɨɔ o kpɛl bam aa! Bɨh bé esa bɨsyɛɛla bɨnɨ bibyɛh ó, lé esa ó, buʼo yin, yé gwɨa, 20ebe, me ekpɛɛ ó, me amu be, abâʼle bɔma e bɨn lé epyal lam mpʉ me lé egwɨm ɨ. Bɨn bé amu kœb me, abe mpʉ bɨn lé egwɨm ɨ. Yé amu be nteme ó, me kœbɨ bɨn lé esa mpɔʼa monkɔm, zii, mompime, zyee lé efuo bɨdia, movoʼ, mpuʼ, nkɛa nyʉl, le bɨntʉ. 21Sa lé esa ó, me kpɛŋɨ ebâʼle ze gʉʼ bɨn ye e, yé ó, ebe, Zyɛm Sɔŋ wam amu jaa gba me fwon é nyʉl é mih mɨn. Bɨn bé amu jaa bee me lé ejɨ edwe é jɔʼ me óbee ó, bɨn bé agwɨma mɨsyem min ndwe le edwir mɨleme e. Me óbɛm kœb bʉr o b'a taare jwɨ̂ʼlɨ e mɨsyem ɨ, bɛɛ dina lé elama fwon lé edu njɨ bɨjyɛʼ byɔɔ, le elœʼ nyʉl é zi bɨduo, ndwe le esa bɨmala zam e l'ekomo, jwɨʼ gwar e gwar mpʉ bé a bɛa sa-sa ɛ.

Currently Selected:

2 Korɛnt 12: ozmBad

Highlight

Copy

Compare