KUHALAWA 6
6
1Abaho MNDEWA kamulongela Musa, “Sambisambi kochona kija chondanimtende Falao. Sama ya mkono wangu wene mhiko, kowaleka wanhu zangu wachole. Kowawinga walawe muisi yake.”
Mulungu Komkema Musa
2Mulungu kamkema Musa na kumulongela, “Nie iyo MNDEWA. 3Nyoneke ha Ablaham, ha Isaka, na ha Yakobo kamba Mulungu Mwene Mhiko. Ila sidifunule kumwao twaga jangu dikemigwa Yahweh.#6:3 Yahweh dijo twaga ding'alile da Mulungu ajo Wayahudi diwomkema MNDEWA kipigiti wahazisoma Nyandiko Zing'alile. 4Vivija niditenda lagano jangu na hewo, kilagano cha kuwagwaa isi ya Kanaani, isi iwakalile wokala kamba wahenza. 5Vivija nihulika kugulila kuwokugulila Waislaeli awo watendigwe na Wamisili kuwa nyakadala wao, na nie nikumbukila lagano jangu. 6Avo walongele Waislaeli, kamba, ‘Nie iyo Yahweh, na nowakombola kulawa mkusang'hanikizwa sang'hano ndala za Wamisili. Nowafungula sambimuwe nyakadala zao. Nougolosa mkono wangu wene mhiko na kuwasuna ng'hani hewo na kuwakombola mweye. 7Nowatenda mweye muwe wanhu zangu mwenyego, na nie nowa Mulungu wenu. Na mweye movitanga kamba nie iyo MNDEWA Mulungu wenu, ahaja vondaniwafungule kulawa muunyakadala muisi ya Misili. 8Nowagala kuisi ija iniwaduilile kuwagwaa Ablaham, Isaka, na Yakobo, nowagwelela mweye iwe yenu. Nie iyo MNDEWA.’ ” 9Musa kawalongela mbuli zino Waislaeli, ila hawamtegeleze, sama ya mioyo yao ibogoyoke na unyakadala umemile mbuli za ukaini.
10Abaho MNDEWA kamulongela Musa, 11“Genda ukamulongele Falao, mndewa wa Misili, yawaleke Waislaeli wasegele muisi yake.”
12Ila Musa kamulongela MNDEWA, “Kamba Waislaeli hawanitegeleze nie, vodahikaze Falao kunitegeleza? Kwavija nie nna kigagaziko.”
13MNDEWA kawalongela Musa na Haloni, “Walongeleni Waislaeli hamoja na Falao, mndewa wa Misili, kamba nie iyo niwalagize mweye kuwalava Waislaeli muisi ya Misili.”
Lukolo lwa Musa na Haloni
14Wano wawo vilangizi wali mmwanza wa vilangizi wa lukolo lwa Islaeli. Wana#6:14 Wana wa kimbigalo weiyeka wao wapetigwe. wa Lubeni, mwana wa udele wa Islaeli, wakala Hanoki, Palu, Heziloni, na Kami. Ino iyo milango ya Lubeni. 15Wana wa Simioni wakala Yemueli, Yamini, Ohadi, Yakini, Zohali, na Shauli. Mamaake Shauli kakala Mkanaani. Ino iyo milango ya Simioni. 16Gano gago matwaga ga wana wa Lawi kulingana na vija viwaleligwe, Gelishom, Kohasi, na Melali. Lawi kakala milao mia imwe na malongo madatu na saba (137) abaho kadanganhika. 17Wana wa Gelishom wakala Libini na Shimei. Wano wakala vilangizi kulingana na milango yao. 18Wana wa Kohasi wakala Amulam, Ishali, Hebloni, na Uzieli. Kohasi kakala milao mia imwe na malongo madatu na ndatu (133) abaho kadanganhika. 19Wana wa Melali wakala Mahili na Mushi. Ino iyo milango ya Walawi kulingana na vija viwaleligwe.
20Amulam kamsola lumbu ja tataake yokemigwa Yokebedi na kuwalela Musa na Haloni. Amulam kakala milao mia imwe na malongo madatu na saba (137) abaho kadanganhika. 21Wana wa Ishali wakala Kola, Nefegi, na Zikli. 22Wana wa Uzieli wakala Mishaeli, Elizafani, na Sisili.
23Haloni kamsola Elisheba, mndele wa Aminadabu, lumbu ja Nashoni na kulela wana wane na matwaga gao wakemigwa Nadabu, Abihu, Eliazali, na Isamali. 24Wana wa Kola wakala Asili, Elikana, na Abiasafu. Wano wawo wezile kuwa milango ya Kola. 25Eliazali mwana wa Haloni kamsola imwe wa wandele wa Putieli, na kamulela Finehasi. Wano wakala vilangizi wa wahenga wa Lawi kulingana na milango yao. 26Haloni iino hamoja na Musa wawo MNDEWA iyawalongele, “Walaveni Waislaeli muisi ya Misili kulingana na milango yao.” 27Hewo iwo walongile na Falao, mndewa wa Misili, mmbuli ya kuwalava Waislaeli muisi ya Misili. Wakala Musa iino na Haloni.
Lagizo da MNDEWA ha Musa na Haloni
28MNDEWA viyalongile na Musa muisi ya Misili, 29kamulongela, “Nie iyo MNDEWA. Mulongele Falao, mndewa wa Misili, kila kinhu kinikulongela.”
30Ila Musa kamulongela MNDEWA, “Kwavija nie nna kigagaziko, Falao kodahaze kunhegeleza?”
Currently Selected:
KUHALAWA 6: Kizalamo
Highlight
Share
Copy
Want to have your highlights saved across all your devices? Sign up or sign in
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
