KUHALAWA 7

1MNDEWA kamulongela Musa, “Lola, nikutenda gweye uwe kamba Mulungu hameso ga Falao, na mkulu wako Haloni kowa muhokozi wako. 2Mulongele Haloni kila kinhu kinikulagize, na heyo komulongela Falao yawaleke Waislaeli wasegele muisi ino. 3Ila nie noutenda moyo wa Falao kuwa mdala, na nokongeza mizonza na mikanganyo yangu muisi ya Misili, 4hata avo Falao hawategeleza. Abaho nowasuna wanhu wa Misili na kuwalava Waislaeli, wanhu zangu, hanze ya isi ya Misili, mtala kwa mtala, nowalava na sang'hano ng'hulu za nhaguso yondaiwe muisi ya Misili. 5Wamisili wovitanga kamba nie iyo MNDEWA, ahaja vondaniugolose mkono wangu muisi ya Misili na kuwalava Waislaeli hanze ya isi ija.” 6Musa na Haloni watenda kamba MNDEWA viyawalagize. 7Kipigiti viwacholile kulonga na Falao, Musa kakala na milao malongo manane na Haloni kakala na milao malongo manane na midatu.

Fimbo ya Haloni

8Abaho MNDEWA kalonga na Musa na Haloni, 9“Falao yahawalongela, ‘Tendeni mzonza,’ mulongele Haloni, ‘Sola fimbo yako uibwanhe hasi haulongozi wa Falao,’ na yogaluka nyoka.” 10Avo Musa na Haloni wachola ha Falao na kutenda vija MNDEWA viyawalagize. Haloni kaibwanha hasi fimbo yake haulongozi wa Falao na salange zake, na ifimbo igaluka nyoka. 11Abaho Falao kawakema wanhu wali na nzewele na wahawi. Na wahawi wano watenda kamba viyatendile heyo kubitila uhawi wao. 12Kila munhu kaibwanha hasi fimbo yake, na zija izifimbo zigaluka nyoka, ila nyoka wa Haloni kawameza nyoka wose wa iwahawi. 13Ila moyo wa Falao ugendelela kuwa mdala, kamba viyalongile MNDEWA, kalema kuwategeleza.

Mitamu Ihile Ng'hani Yoitoa Misili

Kuh. 7:14—12:36

Mulopa

14Abaho MNDEWA kamulongela Musa, “Moyo wa Falao uwa mdala, kolema kuwaleka wanhu wachole. 15Imitondo genda ha Falao, kipigiti vondayalawe kuchola Kulwanda lwa Naili. Ima hamgwazo wa ulwanda uiting'hane nayo, na uigoge fimbo ija mmakono gako, fimbo ija igaluke kuwa nyoka. 16Mulongele vino, ‘MNDEWA, Mulungu wa Waeblania, kanituma nie kumwako nikulongele, “Waleke wanhu zangu wachole, giladi wakanitambikile nie kuluwala.” Ila mbaka sambi hunitegeleze. 17Avo, vino vivo MNDEWA viyanongele, “Mkutenda vino, gweye kovitanga kamba nie iyo MNDEWA.” Lola, nogalanha mazi ga Lwanda lwa Naili na fimbo ili mumkono wangu, na gogaluka mulopa. 18Na somba wali Mulwanda lwa Naili wofa, na ulwanda lwonung'ha mbaka Wamisili hawadaha kung'wa mazi gake.’ ”

19MNDEWA kamulongela Musa, “Mulongele Haloni yasole fimbo yake mumkono abaho yaugolose mkono wake kuna gamazi gose ga Misili, mazi ga mzinyanda, mazi gali m'vizanda, mazi ga m'vilamba, na milamba yose ya mazi giladi gagaluke mulopa. Na kila hanhu muisi ya Misili kowa na mulopa, mulopa wowa m'via visongoligwe kulawa mmibiki na mmibwe.”

20Musa na Haloni watenda kamba MNDEWA viyawalagize. Haloni kenula fimbo yake haulongozi wa Falao na salange zake na kugalanha gamazi ga Lwanda lwa Naili, na mazi gose gagaluka kuwa mulopa. 21Somba wakalile Mulwanda lwa Naili wafa, na ulwanda lulava bundo mbaka Wamisili hawadahile kung'wa mazi gake. Mulopa ukala kila hanhu muisi ya Misili. 22Ila wahawi wa Misili watenda vivija viwatendile hewo kubitila uhawi wao, avo moyo wa Falao ugendelela kuwa mdala, kamba viyalongile MNDEWA, hawategeleze Musa na Haloni. 23Falao kahinduka na kubweleganya kuding'anda jake, bila kuigesa mbuli ija itendeke. 24Avo Wamisili wose wahimba mumgwazogwazo wa Ulwanda lwa Naili giladi wapate mazi ga kung'wa, kwavija hawadahile kung'wa mazi ga mulwanda.

25Gabita mazua saba songela kipigiti MNDEWA viyalulanhile Ulwanda lwa Naili.

Currently Selected:

KUHALAWA 7: Kizalamo

Highlight

Copy