KUHALAWA 5

Musa na Haloni Haulongozi wa Falao

1Musa na Haloni viweshile kulonga na vilangizi wa Islaeli, wachola ha Falao na kumulongela, “MNDEWA, Mulungu wa Islaeli, kolonga vino, ‘Waleke wanhu zangu wachole, giladi wakanitendele lusona kuluwala.’ ”

2Ila Falao kalonga, “MNDEWA iyo yalihi, kileka nimtegeleze na kuwaleka Waislaeli wachole? Nie simtangile MNDEWA, na siwaleka Waislaeli wachole.”

3Abaho wamulongela, “Mulungu wa Waeblania katulawilila tweye. Avo tuleke tuchole mwanza wa mazua madatu muluwala, tukamulavile nhosa MNDEWA Mulungu wetu. Kamba hatutendile avo, kotutoa na mitamu ama na zele.”

4Ila Falao kawalongela, “Musa na Haloni, habali muwasegeza wanhu kulawa msang'hano zao? Bweleganyeni msang'hano zenu. 5Lola, wanhu zenu wongezeka kubanza wanhu wa isi, na mowalonda waleke kusang'hanika!”

6Zua didija Falao kawalagiza Wamisili wakalile wowagaza iwanyakadala hamoja na Waislaeli wakalile vilangizi wa iwanyakadala, yolonga, 7“Sambimuwagwelele mibelege ya kutendela matofali kamba vumkalile mtenda haichanduso, walekeni wenyego wachole kukunzanya mibelege, 8ila wolondigwa watende matofali kiasi kikija chowokala wotenda haichanduso na sambidihungule hata tofali dimwe. Wakoka wano! Kileka mana wolila, wolonga, ‘Tuleke tuchole tukamulavile Mulungu wetu nhosa.’ 9Muwasang'hanikize wanhu wano sang'hano ndala, na sambiwawe na kipigiti cha kuhumula giladi sambiwategeleze mbuli za uvwizi.”

10Abaho, waja wakalile wowagaza iwanyakadala hamoja na Waislaeli wakalile vilangizi wa iwanyakadala walawa na kuwalongela Waislaeli, “Falao kolonga vino, ‘Siwagwelela mibelege tena. 11Gendeni wenyego mkazahile mibelege kokose kondamuipate, ila kiasi cha matofali sambikihungule.’ ” 12Avo wanhu wachola muisi yose ya Misili kuzahila misanze kusola hanhu ha mibelege. 13Waja wakalile wowagaza iwanyakadala wagendelela kuwashulutiza, wolonga, “Mambukizeni sang'hano yenu, kiasi kikija cha matofali kamba vija vumkalile mgweleligwa mibelege.” 14Wamisili wakalile wowagaza iwanyakadala wawalanha vilangizi wa Waislaeli awo wakalile iwawasagule na kuwauza, “Habali mweye mayo na lelo ham'vikize kiasi kikija cha matofali kimkalile mtenda mazua gabitile?”

15Abaho waja Waislaeli wakalile vilangizi wa iwanyakadala wachola ha Falao wolila na kumulongela, “Habali ututenda tweye watumigwa zako kamba vino? 16Hatugweleligwe mibelege, hata avo wotushulutiza kutenda matofali. Lola vija tweye watumigwa zako tolanhigwa bila kuhonyela hanhu, ila wanhu zako iwo wahonyele.”

17Falao kawalongela, “Mweye mwa wakoka! Mwa wakoka! Kileka mana mulonga, ‘Tuleke tuchole tukamulavile nhosa MNDEWA.’ 18Gobokeni mchole mkasang'hanike, kwavija haduhu hata belege dimwe dondamgweleligwe, na mtende kiasi kikija cha matofali kamba kimkalile mtenda.” 19Waja Iwaislaeli wakalile vilangizi wa iwanyakadala wakiiyona wa mmwangalo ahaja viwalongeligwe, “Sambimuhunguze kiasi cha matofali kimulondigwa kugatenda kila zua.”

20Viwalawile ha Falao, wawavika Musa na Haloni, wakalile wowabeta hewo. 21Wawalongela Musa na Haloni, “MNDEWA yawataguse na kuwasuna, mtutenda tweye twihilwe na Falao hamoja na salange zake, tena muwagwelela kilamso cha kutukomela.”

Musa Komtwanganikila MNDEWA

22Abaho Musa kawaleka na kubweleganya ha MNDEWA na kutambika, yolonga, “Mndewa, habali uwagalile wanhu zako migayo ino yose? Kino kicho kilamso cha gweye kunhuma nie? 23Songela nie vunicholile ha Falao kuzilonga mbuli zako, Falao kawagalila wanhu wano migayo, na gweye huwakombole wanhu zako hata kidogo.”

Currently Selected:

KUHALAWA 5: Kizalamo

Highlight

Copy