Ohubala 5
5
Abaandu baliho omusiro
1Omwaami yaboolera Musa ati, 2“Lagira abaandu ba Yisiraeli ohwiirusa ohumala mu kaambi buli muundu yeesi oli neende obulwaae bubi obw'esihoba, oba oliho hu mubiri kwae esiindu sisulula syoosi neende oyo yeesi oliho omusiro ohweema hu hwegeeng'a hu mulaambo kwoosi. 3Tuse erwaanyi, abaandu bano boosi abali ab'omukwoobo ohweema koti emiduunga ky'ediini kiri, hu bahaye ohubaha ekaambi yoosi omukwoobo okwo, mu ese mweene ndamenya mu baandu baange.” 4Abaisiraeli bafukiirira mani beerusa abaandu bali batyo boosi baatula mu kaambi, koti lu Mwaami yali yababoolera ohuhola.
Engeri y'ohutuungiramo ebibi biba nibyaholwa
5 #
Lef 6:1-7. Omwaami yaberesa Musa 6ebilagiro biloondaho bino hulw'abaandu ba Yisiraeli. Omuundu yeesi niyeehola otaali omweesikwa eyiri Omwaami, mani yaaholera owaasye esiindu sihyaamu, 7ahoyere ohuchia mani yeeyolobya esyonoono syae esyo, mani yoobba efaini enjichufu, haandi yameedaho amahumi kabiri kabuli emia y'efaini eyo, eyiri omuundu yaaba niyakosera. 8Nae omuundu yi yakosera naaba niyamala ohufwa, nihaandi abulaho omwiiho wae w'aambi owadoong'ao, yi bahoyere ohutuunga efaini eyo, yiba yichia ohubeereswa Omwaami hulw'omulaamisi. Efaini yino yiba yemeeda hu koondi emiiku eliba nilyehoonyerwa ohuhola omuduunga kw'ohulabiswa omuundu oba n'aliho omusaango. 9Haandi buli siindu sy'obuhoonyi syoosi si Baisiraeli bayaana eyiri Omwaami, siba siri esy'omulaamisi yi baba nibasidiisire. 10Buli mulaamisi yeesi ahoyeere ohubihaanga ebiyaanwa bino ebiba nibimudiisirwe.
Emisaango ky'abahasi bali neende abasaacha bataali abeesikwa
11Omwaami yalagira Musa ati, 12“Chia oboolere abaandu ba Yisiraeli oti, omuhasi w'omuundu yeesi naakota mani yaamuholera ebiindu bitaali eby'obweesikwa, 13omusaacha wuundi niyeyalisa nae koti omusaacha wae, mani byaakiswa eyiri wamwe yaahaya ohubimanyaho, mani yaahaywa ohufuumbula kata neende omweene niyamala ohweebaha omukwoobo okwo, nihaandi abulao omuloli yeesi onyala ohumulumirisa, koti lwaaba natadiirwa naali ohusihola, 14nae omwooyo kw'embaliha nikudiira omusaacha wae oyo, mani yadiirira omuhasi wae oyo embaliha aba niyebahire omukwoobo; oba omwooyo kw'embaliha nikumudiira, mani yadiirira omuhasi wae oyo embaliha, kata neende naaba n'atebaha omukwoobo; 15omusaacha oyo aba ahoyere ohuyira omuhasi wae oyo eyiri omulaamisi, mani yaamuleetera esiyaanwa sihoyera omuhasi oyo, silala sy'ehumi sy'obusye bw'amabere masuungu; haba saabuchuhaho amafuta koosi daawe, haandi haba sataaho obubbaani bwoosi, olwohuba sino siba siri esiyaanwa sy'emere sy'embaliha, esiyaanwa sy'emere sy'esichuliso, ohwebwaaba esiichuliso.”
16Mani omulaamisi aba achia ohusudya aambi omuhasi oyo, mani ate omuhasi oyo mu moni w'Omwaami; 17mani omulaamisi aba achia ohubukula amaachi moolerefu akali mu sidayiro sy'eloba, haandi abukuleho hu lufu luli mu bweeru bw'Eyeema, alusaase mu maachi ako. 18Mani omulaamisi aba achia ohuta omuhasi oyo mu moni w'Omwaami, atuumbulule efwiiri ly'omutwe kw'omuhasi oyo, mani ate esiyaanwa sy'emere sy'esiichuliso mu mahono kae, esiba nisiri esiyaanwa sy'emere sy'embaliha. Mani omulaamisi nae aba achia ohuba n'akiingire amaachi malulu akaleeta esibwaabo. 19Bulaanu, omulaamisi aba achia ohuhola omuhasi oyo afukiirisanie neende esichubo sino koti lu silomwalomwa neende omulaamisi siti, “Nooba nootayiraane, haba soochia ohuholwaho esyonoono syoosi neende esibwaabo si maachi kano kaleeta. 20Nae nooba noyiraane, 21Omwaami ahoya yaahola eliita lyao lyaaba esibwaabo mu baandu bao. Omwaami ahoya yabwaaba ebituundu by'obuhasi byao byehuuna alala mani enda yao yafwiimba. 22Amaachi kano kahoya keengira mu nda yao, mani kaakera yafwiimba yaayiriha nae ebituundu byao by'obutye byehuuna byeekalira.”
Mani omuhasi oyo aba achia ohukobolamo ati, “Ese fukiirira; Omwaami ahoya yaahola atyo.”
23Bulaanu omulaamisi aba achia ohwaandiika aasi esibwaabo sino, amale yoosere obwaadiike buno neende amaachi nibukwa mu sidayiro sirimo amaachi malulu kano. 24Mberi n'atahola omuhasi wuno yaang'wa amaachi kano, akaba nikachia ohumuleetera obuchuuni bululu, 25omulaamisi aba achia ohutaangiraanga mberi abukula esiyaanwa sy'obusye ohutula mu mahono k'omuhasi oyo, mani abukiinge koti obuyaanwayo eyiri Omwaami, mani amala abuyira abuta hu alutaari. 26Bulaanu aba achia ohubukulaho esifuusi sy'obusye buundi, ohuba koti esiyaanwa sy'ohuboneraho sa mani asaambire hu alutaari. Mani luunyuma aba achia ohuhola omuhasi oyo ang'we amaachi ako. 27Mani omuhasi oyo n'aba n'ayiraaneho, amaachi ako kaba kachia ohumuleetera obuchuuni bululu; enda yae yiba yichia ohufwiimba yiyirihe, ebituundu by'obutye byae byosi byehuune biikalire. Eliita lyae liba lichia ohweehola ely'esibwaabo mu baandu bae. 28Nae naaba nataaliho omusaango kwoosi, haba saaba naachia ohuholwaho obubi bwoosi daawe, haandi aba achia sa ohunyala ohwiibulaanga bulai.
29Lino nilyo elako lihola mu biha by'embaliha, nikali mbwe omuhasi oba n'asisiiri mu bunyala bw'omusaacha wae achia yahyaama mani yeebaha omukwoobo, 30oba omwooyo kw'embaliha nikuniina omusaacha mani yadiirira omuhasi wae embaliha; mani omusaacha oyo aba achia ohuta omuhasi wae oyo mu moni w'Omwaami, mani omulaamisi yeemeo ahole omuhasi wuno koti elako lino lyoosi lilaka. 31Wamwe aba achia ohumalibwaho omusaango, nae omuhasi naaba nanyoolehana neende omusaango, aba ahoyere ohusaandisibwa koti lu bihoyera.
Currently Selected:
Ohubala 5: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
