Ohubala 6
6
Amalako k'abaandu beeholeramo Abanasareeti
1Omwaami yalagira Musa 2ohuberesa abaandu ba Yisiraeli ebilagiro bino. Abasaacha boosi oba abahasi boosi abahola esichubo sikabuhaaneho ohweehola abanasareeti mani beyaanayo abeene eyiri Omwaami 3#Luk 1:15.baba bahoyere ohusira efiini neende amalwa. Haba sibahoyeere ohung'wa esyohung'wa syoosi esyaholwa mu misabbiibbu oba ohulya emisabbiibbu kyoosi, emibisi oba emyoomu. 4Nibasisiiri hu sichubo syaabwe koti abanasareeti, sibahoyeere ohulyaaho esiindu syoosi esitula mu misabbiibbu, kata sa emwo oba amoola k'emisabbiibbu.
5Nibasisiiri hu sichubo syaabwe koti abanasareeti, sibahoyeere ohubekaangaho efwiiri oba ohuhehetaangaho. Baba nibaboywa neende esichubo sy'endaalo choosi bati beyaanayo eyiri Omwaami, mani bachia ohuleha efwiiri lyaabwe lihula.
6Endaalo choosi chaaba niyeetusa yeyira eyiri Omwaami haba saaba n'ahoyere ohuchichaanga eyiri omulaambo kwoosi daawe. 7Kata kwahaba okwa laatang'ene, oba okwa ng'ina, oba okwa mwaanang'ina, oba okwa mboochoong'ene, kata nibafwa, haba saachia ohwebaha omukwoobo; olwohuba ohweyaanayo hwae eyiri Nasaae biri hu mutwe kwae omweene. 8Nibaba nibali abanasareeti, baba beyaanayo eyiri Omwaami.
9Nae efwiiri ly'omunasareeti nilibahwa omukwoobo, olwohuba omusaacha oyo oba omuhasi oyo ali aambi muno neende omuundu ofwiire esibwaatuhira, baba bahoyere ohuliindaanga endaalo chitaanu-na-chibiri hu beebekaho efwiiri lyaabwe; hu banyale ohweehola abataaliho omukwoobo ohweema hu muduunga koti lu kudaha. 10Hu ludaalo lwa hataanu-na-hadatu baleete amabburuuku kabiri oba amaguugu kabiri eyiri omulaamisi ena mulyaango kw'Eyeema ly'Ohubaao hw'Omwaami. 11Omulaamisii aba achia ohuyaanayo lala koti esiyaanwa sy'esyonoono nae eliindi koti esiyaanwa sisaambwa syaakwa ekohe, ohubaholera omuduunga kw'ohulabiswa, hulw'ohwegeeng'a hwaabwe hu mulaambo. Hu ludaalo lweene olwo, nilwo lu baba nibachia ohulabisiryaho efwiiri lyaabwe 12neende ohuyaanayo ebiha byaabwe eyiri Omwaami koti abanasareeti. Ebiha biba nibyamala ohubitao haba sibiba nibisiibalibwa daawe, olwohuba efwiiri lyaabwe liba nilyali nilyalabiswa, liba nilyamala ohubahwaho omukwoobo. Nae koti esiyaanwa sy'ohutuunga ekobi, bahoyere ohuleeta ekoondi yere ely'omwaaka mulala kwoong'ene.
13 #
Biho 21:23,24. Mani abanasareeti nibamala ohwooseresa ebichubo byaabwe, baba bachia ohuhola omuduunga kuno. Baba banachia ena mulyaango kw'Eyeema 14bayaane eyiri Omwaami, ebyaayo bidatu ebibulaho obufwoolwa bwoosi daawe: ekoondi yere lala ehole ely'omwaaka mulala hulw'esiyaanwa sy'ohusaambwa sikwe ekohe, ekoondi yere lala ehasi ely'omwaaka mulala hulw'esiyaanwa sy'esyonoono, haandi neende ekoondi emiiku lala hulw'esiyaanwa sy'ohukobola alala. 15Haandi baba bachia ohuyaanayo esimweero esilaamba esy'emigaati kideeherwe nikitaalimo emera: emigaati mihomefu ekideeherwe mu busye bukaandiirwe alala neende amafuta k'enaasi neende ebibbisikuuti ebibahirweengeho amafuta k'enaasi, haandi ohumeedaho neende ebiyaanwa bidahibwa eby'emere neende efiini.
16Omulaamisi aba achia ohuyaana bino byoosi eyiri Omwaami, mani amala ayaane esiyaanwa sy'esyonoono, haandi neende esiyaanwa sy'ohusaambwa sikwe ekohe. 17Ahoyere ohuyaana ekoondi emiiku eyiri Omwaami, koti esiyaanwa sy'ohukobola alala, haandi asiyaanire alala neende esimweero sy'emigaati; haandi hu yeemeo ayaaneyo ebiyaanwa by'emere neende efiini. 18Nae hu mulyaangiro kweene okw'Eyeema, ao niwo yi munasareeti aba achia ohubekeraho efwiiri lyae lyoosi, mani amale alite hu muliro ohuli ohusaambirwa esiyaanwa sy'ohukobola alala.
19Bulaanu, oluliho lw'ekoondi miiku niluba nilumalire ohudeehwa, omulaamisi aba achia ohulubukula alute, niluliho omugaati mulala kutabbaahirwe, neende bbisikuuti silala ohutula mu simweero, mu mahono k'omunasareeti. 20Ohuloondyaho, omulaamisi oyo haandi aba achia ohubiyaanayo byoosi eyiri Omwaami koti esiyaanwa sy'enjaulo; bino biba biri esiyaanwa silafu esy'omulaamisi, ohumeeda hu sigwoogwo neende esinama sy'ekoondi miiku elyo, ohweema hu malako ebiba nibiri eby'omulaamisi oyo. Ebyo nibiba nibiweere, omunasareeti oyo aba bulaanu anyala ohung'waaho hu fiini.
21Bino nibyo ebilagiro bidiira hu banasareeti; nae nikali mbwe omunasareeti mweene yeeyamire ohuyaana ebihiraho bi sichubo syae siboola siti ahoyere ohuyaana, aba ahoyere ohwooseresa esisuubise syaaba naaholere.
Ehabi y'obulaamisi
22Omwaami yalagira Musa 23ohuboolera Arooni neende abaana bae ohwehoonyeraanga emboosi mu huberesaanga ehabi abaandu ba Yisiraeli:
24Omwaami ahoya yaababeresa ehabi, haandi neende ohubaliinda;
25Omwaami ahoya yaabakwiira esisa haandi yaabaholera eby'esiroonyo;
26Omwaami ahoya yaabakwiira esisa haandi yaababeresa omuleembe.
27Mani Omwaami yeecha n'aboola ati, “Nibachia ohutuumbulaanga eliita lyaange ohuba ehabi eyiri abaandu ba Yisiraeli, mba njia ohubaberesaanga ehabi.”
Currently Selected:
Ohubala 6: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
