Ohubala 4
4
Emirimo kiholwa neende enono y'Abaleefi ba Kohati
1Omwaami yaboolera Musa 2ohubala abaandu b'enono y'Esileefi ya Kohati mu nono ndiidi neende mu madaala, 3haandi neende ohwandiika abasaacha boosi abali neende emyaaka akatikaati w'emyaaka amahumi kadatu neende amahumi kataanu abahoyera ohuholaanga emirimo mu Yeema ly'Ohubaao hw'Omwaami. 4Obuhalaabani bwaabwe budiira hu biindu byoolerefu bihiramo.
5Omwaami yaberesa Musa ebilagiro bino biti. Nisiri esiha sy'ohusakuuliramo ekaambi, Arooni neende abaana bae bachicheenge mani beengira mu Yeema, ohwiisa aasi epasya yiri mu moni w'Esanduuku ly'Endagaano, mani bamala bayibwiiha hu sanduuku elyo. 6Bachia haandi ohubwiihaangaho eseero terere, haandi babaambulaho engubo ya bbulu humukulu, mani bamala basosehamo emisiruunga ky'ohukiingira.
7Bachia ohubaambulaanga engubo ya bbulu hu meesa hulw'emigaati kiba nikiyaanirwe eyiri Omwaami, mani hu bamala bataaho ebbakuli, neende otubbakuli tw'obubbaani, ebbakuli ch'ebiyaanwa, haandi neende ejaagi ch'ebiyaanwa by'efiini. Esiha syoosi emigaati kihoyere ohubechaanga hu meesa ohwo. 8Bahoyere ohubaambulaanga engubo ya ranjaai hu biindu bino, haandi neende ohutechaangaho esibwiihaho sy'eseero terere, haandi neende ohusosehaangamo emisiruunga kikiinga.
9Bachia ohubukulaanga engubo ya bbulu mani bayibwiiha hu siteeni sy'amataara, neende amataara kahwo keene, magalo, eture, haandi ebikiingiro byoosi eby'amafuta k'enaasi. 10Bachia ohusiboyaanga alala neende ebiindu byasyo byoosi mu seero terere elibibwiihaho, mani bamala babigeeng'a hu fureemu yibikiingaanga.
11Ohuloondyaho, bachia ohubaambulaanga engubo ya bbulu hu alutaari y'efeesa, mani bafuunihaho eseero terere, hu bamala basosehamo emisiruunga kikiinga. 12Bachia ohubukulaanga ebyehoonyerwaanga byoosi mu Abuundu Woolerefu, babiboe mu ngubo ya bbulu, haandi bafuuniheho eseero terere humukulu wabyo, mani bamale babigeeng'e hu fureemu yibikiinga. 13Bachia ohumalaangaho ekohe liri koti ewula lyoosi hu alutaari ohwo, babaambuleho engubo ya papo humukulu. 14Bachia ohutechaangaho neende ebiindu byoosi ebyehoonyerwaanga mu huhalaabanira hu alutaari koti: ebihalaangiro, amalobo, ebitiiyo, alala neende ebbeseeni cheene. Hu beemeo bafuuniheho eseero terere, haandi basosehemo emisiruunga kikiinga. 15Mani esiha nisyahoola esy'ohusakuuliramo ekaambi, enono ya Kohati yichia ohwiicha ohukiingaanga ebiindu bilafu bino Arooni alala neende abaana bae nibanabechaanga nibamalire ohubibwihaho alala neende ebiindu byoosi byahwo bichiiraho. Enono ya Kohati haba siyihoyere ohudiiraho hu biindu byoolerefu bino daawe, ataali ao baba bachia ohufwichaanga sa.
Mani kino nikyo emirimo ki nono ya Kohati yihoyeere ohuholaanga buli lu Yeema linabechaanga nilikeeswa.
16Eliasaari omwaana wa Arooni omulaamisi niye ochia ohubechaanga neende obufunaanibwa bw'Eyeema lyoosi, haandi neende amafuta k'amataara, obubbaani, ebiyaanwa byeemere, amafuta akaawula, haandi neende buli siindu syoosi esiri mu Yeema esyamala ohuyaanwa eyiri Omwaami.
17Omwaami yaboolera Musa neende Arooni ati, 18“Mutalehaanga enono ya Kohati 19yiitwa neende ohuyilehaanga yisuda aambi neende ebiindu bihiramo obulafu bino. Mani ohukayira sino ohuholehana, Arooni neende abaana bae bahoyere ohuchichaanga beengira mukati mani bakaba buli muundu omulimo kwaaba nahoyeere ohuholaanga, haandi neende ohubabooleraanga buli muundu esiindu syaaba n'ahoyeere ohukiingaanga. 20Nae Abakooha nibeecha beengira mu Yeema, mani baabonaho sa bati abalaamisi nibali ohutekeha ebiindu bilafu bino ohuwuuyiswa, baba bachia sa ohufwiirao.”
Emirimo kiholwa neende enono y'Abaleefi ba Gerisoni
21Omwaami yaboolera Musa 22ohubala abaandu ohw'enono y'Esileefi ya Gerisoni, mu njia ndiidi, neende mu madaala, 23haandi neende ohwandiika abasaacha boosi abali neende emyaaka akatikaati w'emyaaka amahumi kadatu neende emyaaka amahumi kataanu abahoyere ohuhola emirimo mu Yeema ly'Ohubaao hw'Omwaami. 24Bano baba bachia ohuba neende obufunaanibwa bw'ohukingaanga ebiindu bino biti: 25Eyeema, esiribwiihaho syomukati, esiribwiihaho syohumukulu, esibwiihaho sy'eseero terere esy'ohumukulu bweene, epasya yoohumulyaango, 26epasya choosi, alala neende emikoye ky'olukaka lusita olwaanyi lwebodoohania Eyeema neende alutaari, epasya chohu mulyaango kw'alwaanyi, alala neende ebiindu byoosi ebyehoonyerwa mu huwambaanianga alala ebiindu bino byoosi. Bano nibo abachia ohufukiirirwaanga ohuholaanga emirimo kino kyoosi ekidiira hu biindu bino. 27Musa neende Arooni bachia ohuhoyera ohubonaanga bati Abagerisoni nibo boong'ene abanaholaanga emirimo kino kyoosi haandi neende ohukiingaanga buli siindu si Arooni neende abaana bae babatuma ohukiinga. 28Kuno nikwo okunabechaanga omulimo kw'Enono ya Gerisoni mu Yeema: bachia ohukuholeraanga aasi wa Yitamaari omwaana w'Arooni omulaamisi.
Emirimo kiholwa neende enono y'Abaleefi ba Merari
29Omwaami yaboolera Musa ohubala abaandu b'enono y'Esileefi ya Merari, mu njia ndiidi, neende mu madaala, 30haandi neende ohwandiika abasaacha boosi abali neende emyaaka kiri akatikaati w'emyaaka amahumi kadatu neende emyaaka amahumi kataanu abahoyera ohuhola emirimo mu Yeema ly'Ohubaao hw'Omwaami. 31Bano bahoyere ohukiingaanga efureemu choosi, emitaliimbo, emisiiro, alala neende obweemero bw'Eyeema, 32haandi neende emisiiro, obweemero, ebihoongo, alala neende emikoye kyoosi ky'esiruwa syeebodoohania Eyeema, neende ebiboya byoosi byehoonyerwaanga mu hubiyambaania alala. Buli musaacha achia ohufunaanibwa ohukiingaanga ebiindu bikabuhaane bi baba nibamuboleere. 33Mani kuno nikwo omulimo kw'enono ya Merari mu buhalaabani bwaabwe mu Yeema: bachia ohubwooseresaanga nibali aasi w'obwiimirisi bwa Yitamaari omwaana w'Arooni omulaamisi.
Ohubalwa hw'Abaleefi
34Musa neende Arooni alala neende abeemirisi baandi babala abasyaani b'Abakohati, mu madaala kaabwe, haandi neende mu nyuumba cha basaabwe, 35ohutulira hu bali neende emyaaka amahumi kadatu ky'obuhuluundu ohwoolera elalira hu myaaka amahumi kataanu eky'obuhuluundu, buli muundu ohoyera ohwiingira mu buhalaabani bw'ohuhola emirimo mu Yeema ly'Ohubaao hw'Omwaami; 36mani obuungi bwaabwe ohweema hu buli daala bweecha bwaaba elifu chibiri neende emia chitaanu-na-chibiri neende amahumi kataanu (2,750). 37Buno nibwo obwali obuungi bw'amadaala k'Esikohati, boosi abahalaabanaanga mu Yeema ly'Ohubaao hw'Omwaami, ba Musa neende Arooni babala ohweema huhulagira hw'Omwaami neende Musa.
38Obuungi bw'abaana ba Gerisoni, mu madaala kaabwe, neende mu nyuumba cha basaabwe, 39ohutulira hu myaaka amahumi kadatu eky'obuhuluundu, ohwoolera elalira hu myaaka amahumi kataanu eky'obuhuluundu, buli muundu ohoyera ohwiingira mu buhalaabani bw'ohuholera mu Yeema ly'Ohubaao hw'Omwaami 40obuungi bwaabwe mu madaala kaabwe neende amayuumba ka basaabwe bwali, elifu chibiri neende emia chisaasaba neende amahumi kadatu (2,630). 41Buno nibwo obwali obuungi bw'amadaala k'abaana ba Gerisoni, boosi abahalaabaniraho mu Yeema ly'Ohubaao hw'Omwaami, ba Musa neende Arooni babala ohweema hu silagiro sy'Omwaami.
42Obuungi bw'amadaala k'abaana ba Merari, mu madaala kaabwe neende mu nyuumba cha basaabwe, 43ohutulira elalira hu myaaka ky'obuhuluundu amahumi kadatu ohwoola hu myaaka ky'obuhuluundu amahumi kataanu, buli muundu owali n'ahoyera ohwiingira mu buhalaabani bw'ohuhola emirimo mu Yeema ly'Ohubaao hw'Omwaami 44obuungi bwaabwe mu madaala bwali, elifu chidatu neende emia chibiri (3,200). 45Bano nibo ababalwa mu madaala k'abaana ba Merari, ba Musa neende Arooni babala ohweema hu silagiro sy'Omwaami ohubitira mu Musa.
46Abo boosi ababalwa hu Baleefi, ba Musa neende Arooni neende abeemirisi ba Yisiraeli babala mu madaala kaabwe neende mu nyuumba cha basaabwe, 47ohutulira hu myaaka ky'obuhuluundu amahumi kadatu neende emyaaka ky'obuhuluundu amahumi kataanu, ekya buli muundu ohoyera ohwiingira ohuhola emirimo ky'ohuhalaabana haandi neende ohuhola emirimo ky'ohukingaanga ebisito mu Yeema ly'Ohubaao hw'Omwaami, 48abo abali nibabalwa hu beene abo bali elifu chitaanu-na-chidatu, neende emia chitaanu neende amahumi kataanu-na-kadatu (8,580). 49Ohweema hu silagiro sy'Omwaami ohubitira mu Musa, buli muundu yabereswaanga omulimo kwae yeeng'ene okw'ohuhalaabanaanga oba ohukiingaanga; mani nilwo sa lu yababalaanga, koti lu Omwaami yali n'alagiire Musa.
Currently Selected:
Ohubala 4: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
