Ohubala 3
3
Abaana b'Arooni
1Lino nilyo edaala elyali ely'Arooni neende Musa mu siha si Omwaami yeecha yaalomalomeramo neende Musa hu Lugulu Sinai. 2#Hub 26:60.Arooni yali neende abaana bane: Nadabbu, owali omuhuluundu, Abbihu, Eliasaari, neende Yitamaari. 3Bano bachuhwaho amafuta, baawulwa ohuba abalaamisi, 4#Lef 10:1,2; Hub 26:61.nae Nadabbu neende Abbihu beetwa lubayaana omuliro kutaali omwoolerefu eyiri Omwaami nibali mu siparara sya Sinai. Haandi sibali nibeebulaho abaana daawe, mani Eliasaari neende Yitamaari nibo abahalaabanaanga koti abalaamisi mu biha bi Arooni yali n'asisiiri omulamu.
Abaleefi badoolwa ohuhalaabaniraanga abalaamisi
5Omwaami yaboolera Musa ati, 6“Chia otuseyo enono ya Leefi obadoole ohuba abahalaabani b'Arooni omulaamisi. 7Bano nibo abachia ohuholaanga omulimo kwoosi okudahibwa hu Yeema ly'Ohubaao hwaange, haandi neende ohuholaanga ebiindu bihoyera abalaamisi, haandi neende hulw'omukaanda kw'abaandu kuno kwoosi. 8Bahoyere ohulindaanga ebiindu byehoonyerwa mu Yeema, haandi bahalaabanira Abaisiraeli boosi abadoong'ereyo. 9Obufunaanibwa bu Baleefi bali nabwo bwoong'ene ni ohuhalaabaniraanga Arooni alala neende abaana bae. 10Ochia ohutoongola Arooni neende abaana bae ohuba nibo abahoyere ohuholaanga emirimo kyoosi ekihoyeere obulaamisi; oyo yeesi oteemaho ohukiholaanga aba achia ohwiitwaanga.”
11Omwaami yaboolera Musa ati, 12#Hut 13:2. “Bonaho, mbano mbukuule Abaleefi ohubatusa mu baandu ba Yisiraeli, mu bweyaango bwa buli mwaana waamberi omwiikula-nda yeesi oli mu baandu ba Yisiraeli. Abaleefi bachia ohubechaanga abaandu baange syeeng'ene, 13olwohuba abaamberi boosi baange nibo; hu ludaalo lu ndeeteraho abaamberi boosi mu syaalo sy'e Misiri, ndeeyawulira omweene abaamberi boosi abali mu Yisiraeli, ab'abaandu alala neende ab'ebisolo byoosi bichia ohubechaanga ebyaange syeeng'ene: Ese niise Omwaami.”
Ohubalwa hw'Abaleefi
14Mani mu siparara sya Sinai Omwaami haandi yalagira Musa, 15ohwandiika Abaleefi ohweema hu njia neende amadaala, haandi niyandiikisaanga buli mwaana w'esisyaani ow'omwoosi mulala oba ohuhiraho ao obuhuluundu, 16Musa yahola atyo. 17Mani bano nibo abali abaana ba Leefi koti lu bali nibalaangwa: Gerisoni neende Kohati neende Merari. 18Haandi kano niko ameeta k'abaana ba Gerisoni ohweema hu madaala kaabwe: Libbini neende Simei. 19Haandi neende abaana ba Kohati ohweema hu madaala kaabwe: Amuramu, Yisaari, Hebburoni, neende Wusieli. 20Haandi abaana ba Merari ohweema hu madaala kaabwe: Mahili neende Musi. Kano niko amadaala k'Abaleefi ohweema hu nyuumba cha basaabwe.
21Enono ya Gerisoni yalimo amadaala ka Libbini neende Simei. 22Obuungi bw'abaandu b'esisaacha abali omwoosi mulala neende ohuhiraho ao, abaandiikwa bali Elifu chitaanu-na-chibiri, neende emia chitaanu (7,500). 23Enono yino yali niyihoyeere ohwoombaha ekaambi emuumbo emukoongo w'Eyeema, 24alala neende Eliasafu omwaana wa Laeli koti omuhunuufu w'enono. 25Abo nibo abali nibafunaanibwa neende ebidiira hu Yeema byoosi, esifuunihaho syomuukati, esifuunihaho syohumukulu, epasya y'omumwiingira, 26epasya chisitirira olwaanyi echebodoohania Eyeema neende alutaari, haandi neende epasya y'ohumwiingira kwoomulwaanyi. Haandi bano nibo abali neende obufunaanibwa bwoosi obw'obuhalaabani budiirana hu biindu bino byoosi.
27Enono ya Kohati yalimo amadaala k'Amuraamu, Yisaari, Hebburoni, neende Wusieli. 28Obuungi bw'abaandu b'esisaacha abali omwoosi mulala neende abahira ao, ababalwa bali elifu chitaanu-na-chidatu, neende emia chisaasaba (8,600). 29Enono yino nilwo lu yali niyihoyeere ohwoombaha ekaambi emwaalo w'Eyeema lino, 30alala neende Elisafani omwaana wa Wusieli koti omuhunuufu w'enono. 31Bano bali neende obufunaanibwa bw'Esanduuku ly'Endagaano, emeesa, esiteeni sy'amataara, alutaari choosi, neende ebyehoonyerwa byoosi bi balaamisi beehoonyeraanga mu Abuundu Woolerefu, haandi neende epasya yiri mu mulyaangiro kuchia Abuundu Ahiramo Obwoolerefu. Haandi nibo abali neende obufunaanibwa budiira hu buhalaabani bwoosi obudiirana hu biindu bino byoosi.
32Omuhunuufu w'Abaleefi boosi yali Eliasaari w'Arooni omulaamisi. Wuno niye owali n'afunaanibwa neende abo boosi abali nibahalaabaniraanga Abuundu Woolerefu.
33Enono ya Merari yalimo amadaala ka Mahili neende Musi. 34Obuungi bw'abaandu b'esisaacha abali omwoosi mulala oba ohuhiraho ao, abaandiikiswa bali elifu chisaasaba neende emia chibiri (6,200). 35Enono yali niyihoyeere ohwoombaha ekaambi yaalwo emukulu w'Eyeema, alala neende Surieli omwaana w'Abbihaili koti omuhunuufu w'enono eyo. 36Bano bali nibabeereswa obufunaanibwa bw'efureemu ch'Eyeema, emiguulo, emisiiro, ebyeemero, alala neende ebyohufubihaho byoosi. Bali neende obufunaanibwa bw'obuhalaabani bwoosi budiirana hu biindu bino byoosi. 37Haandi lwosi bali neende obufunaanibwa bw'emisiiro, obweemero, ebihoongo, neende emikoye, by'olwaanyi lw'erwaanyi.
38Musa neende Arooni neende abaana bae boosi abali nibahoyere ohwoombahira mu moni w'Eyeema hu lwaande lw'ebukwe. Bano bali neende obufunaanibwa bw'ohuholaanga emirimo kyali nikihoyere ohuholwaanga Abuundu Woolerefu hulw'abaandu ba Yisiraeli. Oyo yeesi owakesaangaho ohukihola yalichiingi nahoyeere ohwiitwaanga sa. 39Obuungi bwoosi obw'Abaleefi b'esisaacha abali omwoosi mulala, oba ohuhiraho ao, ba Musa yaandiikisa ohweema hu njia, ohweema hu silagiro sy'Omwaami bwali elifu amahumi kabiri neende chibiri (22,000).
Abaleefi babukula obweyaango bw'Abasyaani beebulwa abaamberi
40Omwaami yaboolera Musa ati, “Bala abaandu b'esisaacha boosi abaamberi abali mu baandu ba Yisiraeli, ohutulira hu w'omwoosi mulala obuhuluundu neende ohuniina aakulu, noobabala neende ameeta kaabwe. 41Haandi ochia neende ohuumbalira Abaleefi bosi Ese Niise Omwaami mu bweyaango bw'abaamberi boosi abali mu baandu ba Yisiraeli, haandi neende eng'oombe ch'Abaleefi mu bweyaango bw'ebyaamberi biri mu ng'oombe ch'abaandu ba Yisiraeli.” 42Musa yafukiirira, mani yeecha yaandiikisa abaandu b'esisaacha baamberi boosi 43ab'omwoosi mulala obuhuluundu neende ohuhiraho ao; mani obuungi bwaaba elifu amahumi kabiri neende chibiri, neende emia chibiri neende amahumi kataanu-na-kabiri neende badatu (22,273).
44Omwaami haandi yaboolera Musa ati, 45“Bulaanu, yaanayo Abaleefi babe abaange syeeng'ene, mu bweyaango bw'abasyaani Baisiraeli baamberi boosi, haandi omale oyaane ebituke byoosi eby'Abaleefi mu bweyaango bw'ebyaamberi byoosi by'ebituke by'Abaisiraeli. 46Nae koti lu basyaani baamberi Baisiraeli bahira obuungi neende emia chibiri neende amahumi kataanu-na-kabiri neende badatu (273), ohoyere ohununulaanga niwekoboseraho abasyaani Baisiraeli baandi. 47Mani hu buli musyaani mulala tungaanga ebituundu bitaanu eby'efeesa, ohweema hubikero byateebwao, 48mani obereseenge eseende chino Arooni neende abaana bae.” 49Musa yesi yafukiirira mani yaabukula 50ebituundu by'efeesa elifu ndala, neende emia chidatu neende amahumi kasaasaba neende bitaanu (1,365) 51mani n'abiberesa Arooni neende abaana bae.
Currently Selected:
Ohubala 3: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
