Ohutula 5

Musa neende Arooni nibali mu moni w'omutuki wa Misiri

1Mani Musa neende Arooni bachia eyiri omutuki wa Misiri mani baaboola bati, “Omwaami, Nasaae wa Yisiraeli, aboola ati, ‘Leha abaandu baange bechiire, hu banyale ohuuholera Esidyaalo mu siparara ohuunjisamo oluyaali.’ ”

2Omutuki oyo nae yabahada ati, “Omwaami oyo niye wiina? Nae lwasiina ese hoyeere ohumutekeeresa hu ndehe Yisiraeli achie? Ese haba siimanyireho Omwaami oyo; haandi ese haba siinja ohulehaho Abaisiraeli bechiire.”

3Musa neende Arooni bakobolamo bati, “Nasaae w'Abaibburania niye owatuboneheere. Mani ewe tulehe huchie husamuleho hu mbaka y'endaalo chidatu enaamba mu siparara huchie huyaane ebiyaanwa eyiri Omwaami Nasaae weefwe. Olwohuba nihutanyala ohuhola hutyo, aba achia ohutwiita neende amalwaae oba neende ebiita.”

4Omutuki oyo haandi yateeba Musa neende Arooni ati, “Siina syeene esyo si muli ohweekesa nikali mbwe muli ohukera abaandu bahaye ohuhola emirimo kyaabwe? Bukule abawaambe abo boosi mubakobose hu mirimo kyaabwe! 5Abaandu eng'we mubona koti mumalire ohweehola obuduhunyi muhira Abamisiri! Nae haandi bulaanu muli ohuhayaanga ohuhola emirimo!”

6Mani hu ludaalo lweene olwo, omutuki oyo yalagira Abamisiri bahosesa abawaambe haandi neende abanyaapara Abaisiraeli ati: 7“Yakamie ohubeechaanga abaandu ehaanja chihola amatafwaali. Nae mubahole abeene beekoonyere ehaanja echio. 8Nae haandi muhoyere mubayiike baholeenge obuungi bw'amatafwaali obwaaka koti bu baholereenge, ataali ohuleemaho kata lala. Mbao mbona mbwe bali koti abataali neende emirimo kibaera ohuhola, mani sakira beedinyiise ohusabirisa mbwe mbalehe bechiire bayaaneyo ebiyaanwa byaabwe eyiri Nasaae waabwe! 9Berese abaandu bahole emirimo misito muno, bahaye ohuba neende ebiha bi otekeeresa emboosi ch'obubacha.”

10Mani abahosesi b'abawaambe alala neende abanyaapara Abaisiraeli boosi bachia baboolera Abaisiraeli bati, “Omutuki aboolere ati, haba saacha ohubaberesaanga ehaanja choosi daawe. 11Mani aboola ati, eng'we abeene niing'we abahoyere ohuchia mwachikoonya buli yi munyala ohuchinyoola, nihaandi muhoyere ohuhola obuungi bw'amatafwaali bwaaka butyo.” 12Mani abaandu bachaaka ohuchichaanga buli abuundu mu Misiri nibakoonya ehaanja echio. 13Abahosesi b'abawaambe bachaaka ohubayiikaanga ohuhola obuungi bw'amatafwaali bufwaanana buli ludaalo koti lu baliichiingi ni basibaberesa ehaanja.

14Abamisiri bahosesi b'abawaambe boola bachaaka ohuhuyaanga neende abanyaapara Abaisiraeli, ba bali nibabateere mu bunyala bw'omulimo okwo. Bachaaka ohweyikaania nibanoonia bati, “Lwasiina abaandu eng'we muhayire ohuhola obuungi bw'amatafwaali koti ka mwali nimuholaanga hale?”

15Mani abanyaapara bano bachia eyiri omutuki mani bekanyiirisa nibaboola bati, “Ewe Ow'oluyaali, lwasiina otuhola oti? 16Efwe haba sibatuberesaangaho ehaanja echo daawe, nae haandi batuyiika ohuhola amatafwaali! Haandi bulaanu bachaakire ohutuhuya buhuya. Abaandu bao beene nibo abali neende emboosi.”

17Omutuki oyo nae yaboola ati, “Eng'we abeene niing'we abakata, haandi haba simudaha ohuhola emirimo, mani sakira muli ohuusabaanga mbakanye muchie muyaane ebiyaanwa byeeng'we eyiri Omwaami weeng'we. 18Eng'we mukoboleyo bwaangu muhole emirimo! Haba simuchia ohubereswa ehaanja daawe, nihaandi muhoyere ohuholaanga amatafwaali kaaka obuungi neende ka mwaholaanga hale.” 19Abanyaapara bano bulaanu bamanyirao bati hane bamalire ohukwa mu bidinyu, nibawulira bati, hane bahoyere ohuhola amatafwaali kaaka obuungi buli ludaalo koti kabaholaanga hale.

20Mani koti lu bali nibawaao, babukaanana Musa neende Arooni, abali nibabaliindiriire sa. 21Baboolera Musa neende Arooni bati, “Omwaami amalire ohubona ebiindu bi muholere mani achia ohubaboneresa hulw'ohukera omutuki wuno alala neende abahoongo bae batusyuule. Mbao mumalire ohubaberesa obuwosero bw'ohutwiita-bwiita.”

Musa yekanyiirisira Omwaami

22Musa yakaluuhana yaatingaala eyiri Omwaami n'aboola ati, “Omwaami, lwasiina oli ohusaandya abaandu bao otyo? Lwasiina waanduma eno? 23Ohutula niinjia eyiri omutuki ohulomaloma mu liita lyao, yemeeda ohuyira abaandu neende egiili. Nae ewe haba saali hoo esiindu syoosi syooholere ohubahoonya daawe!”

Currently Selected:

Ohutula 5: SAMDC

Highlight

Copy

Compare