Ohutula 6

1Omwaami yaboolera Musa ati, “Bulaanu, ochia ohubona esiindu siinjia ohuhola omutuki oyo. Njia ohumuyiika alehuule abaandu baange bechiire. Mubwadyeeri bweene, njia ohumuyiika omweene yoole ohubabirikisa n'abatusa mu syaalo syae.”

Nasaae alaanga Musa

2 # Huc 17:1; 28:3; 35:11; Hut 3:13-15. Haandi Nasaae yaboolera Musa ati, “Ese niise Omwaami. 3Ese niise owabonehera Abburahamu, Yisaka, neende Yakobbo koti Nasaae w'Obunyala bwoosi, nae haba sindeyekesa yi bali baamanya eliita lyaange lyoolerefu, mbwe Omwaami. 4Haandi ndahola endagaano nabo, nimbasuubisaanga ohubaberesa esyaalo sya Kanani, esyaalo sibali nibamenyamo nibali koti abateende. 5Nae bulaanu mbano mbuliire ohwelirira hw'Abaisiraeli, b'Abamisiri bawaamba, mani mbano njichuliise endagaano yaange. 6Chia oboolere Abaisiraeli oti ndi ohubaboolera endi, ‘Ese niise Omwaami; Mani njia ohubanunula haandi male mbaboolole ohutula hu buwaambe bweeng'we eyiri Abamisiri. Njia ohusiingisa omuhono kwaange kuhiramo amaani, mani kuleete ebinyaaso bilulu muno eyiri Abamisiri, mani mbaonie. 7Njia ohubahola mube abaandu baange beene, naange njia ohuba Nasaae weeng'we. Ao niwo yi muchia ohuumanyira muti hane niise Omwaami, Nasaae weeng'we niinjia ohubaboolola mbatuse mu buwaambe bwoomu Misiri. 8Njia ohubaleeta mboose hu esyaalo si ndeechuba nisuubisa ohuberesa Abburahamu, Yisaka, neende Yakobbo; mani njia ohusibaberesa sibe omukabo kweeng'we. Ese niise Omwaami.’ ” 9Musa yaboolera Abaisiraeli bano emboosi chino, nae haba sibanyala ohumutekeeresa daawe, olwohuba emyooyo kyaabwe kyali nikyamala ohubatusibwamo hulw'engeri y'obwaalaba yi babayiriraangamo.

10Haandi Omwaami yaboolera Musa ati, 11“Chia oboolere omutuki wa Misiri oyo oti ahoyere ohuleha Abaisiraeli baatula mu esyaalo syae.”

12Nae Musa yamukobolamo ati, “Nikali mbwe Abaisiraeli beene haba sibacha ohuumbulira daawe, nae omutuki oyo niye onaambulire? Ese ndi omuundu otamanyire ohulomaloma bulai.”

13Nae Omwaami yemeeda sa ohuchuuba Musa neende Arooni n'aboola ati, “Muchie muboolere Abaisiraeli abo alala neende omutuki wa Misiri muti, ese niise obalagiire ohuchia ohwiimirira Abaisiraeli batule mu Misiri.”

Enjibulo cha Musa neende Arooni

14Rubbeeni, omwaana wa Yakobbo waamberi, yali neende abaana basyaani bane: Hanoki, Palu, Hesirooni, neende Karimi; bano nibo bakuukaang'ene enono chakulihwa ameeta kaabwe ako. 15Simeoni yali neende abaana basyaani basaasaba: Yemweli, Yamini, Ohada, Yaakini, Sohari, neende Sauli, omwaana wa'omuhasi Mukanani; bano nibo bakuukaang'ene enono chakulihwa ameeta kaabwe ako. 16#Hub 3:17-20; 26:57,58; 1 Biha 6:16-19.Leefi nae yali neende abaana basyaani badatu: Gerisoni, Kohati, neende Merari; bano nibo bakuukaang'ene enono chakulihwa ameeta kaabwe ako. Nae Leefi yayiindira yaamala emyaaka emia ndala neende amahumi kadatu neende kitaanu-na-kibiri (137). 17Gerisoni yali neende abaana basyaani babiri: Libbini neende Simei, nabo banyoola abeechuhulu baangi muno. 18Kohati yali neende abaana basyaani bane: Amuramu, Yisaari, Hebburoni, neende Wusieli. Kohati yayiindira yaamala emyaaka emia ndala neende amahumi kadatu neende kidatu (133), 19Merari nae yali neende abaana basyaani babiri: Mahili neende Musi. Mani chino nichio enono cha Leefi neende abeechuhulu bachio.

20Amiramu yadeehya Yokebbeedi seengeeng'ene, owamwiibulira Arooni neende Musa. Amiramu yayiindira yamala emyaaka emia ndala neende amahumi kadatu neende kitaanu-na-kibiri (137). 21Yisaari yali neende abaana basyaani badatu: Koora, Nefegi, neende Sikiri. 22Wusieli yesi yali neende abaana basyaani badatu: Misaeli, Elisafani, neende Situri.

23Arooni yadeehya Elisebba, omuhaana wa Aminadabbu haandi mboochoong'ene Nahasoni; mani yaamwiibulira Nadabbu, Abbihu, Eliasaari, neende Yitamaari. 24Koora nae yali neende abaana basyaani badatu: Asiri, Elikana, neende Abbiasafu; bano nibo abali bakuukaang'ene enono ya Koora eyakabuhanamo. 25Eliasaari, omwaana w'Arooni, yadeehya mulala hu bahaana ba Patieli, owamwiibulira Finehaasi. Bano nibo abali abeemirisi b'amadaala alala neende enono ch'olwiibulo luhoongo lwa Leefi.

26Arooni neende Musa nibo ba Omwaami yaboolera ati, “Muchie mwiimirire enono cha Yisiraeli muchituse mu Misiri.” 27Bano nibo abachia baaboolera omutuki wa Misiri ohulehuula Abaisiraeli bechiire.

Elako ly'Omwaami eyiri Musa neende Arooni.

28Omwaami niyalomaloma neende Musa naali mu syaalo sy'e Misiri, 29yamuboolera ati, “Ese niise Omwaami. Boolera omutuki wa Misiri oyo amahuwa ka huboolera koosi.”

30Nae Musa yamukobolamo ati, “Ewe omanyire bulai bweene oti ese haba si ndi omulomalomi mulai daawe; mani siina syeene esinakera omutuki oyo atekeerese bi mboola?”

Currently Selected:

Ohutula 6: SAMDC

Highlight

Copy

Compare