Ohutula 38

Ohuhola alutaari y'ohusaambiraangaho ebiyaanwa

(Hut 27:1-8)

1Hu lw'ohusambaanga ebiyaanwa, yahola alutaari ohutula mu mbaao ch'emigasia. Yali eyaakanirira enyaande choosi, emiita chibiri neende otutoonyese tubiri (2.2) obuleeyi, emiita chibiri neende otutoonyese tubiri (2.2) obubaambali, haandi yali emiita ndala neende otutoonyese tudatu (1.3) aakulu. 2Yaholeraho ebiindu byasoba aakulu w'esoonda chine, hu byoosi byaahola omubiri mulala neende alutaari. Yayibwiihaho neende omugasa. 3Haandi yaholeraho ebichiira hu alutaari eyo biti: ebifulya, ebitiiyo, ebbakuli, amalobo, neende ebifulya by'ohumuliro. Ebiindu biindi bichiiraho bino byoosi byali nibyaholwa mu mugasa. 4Yahola oluwaaya lusika olw'omugasa, mani naaluta mu lwaalo w'olunikaanika lw'alutaari, mani lwoola akatikaati, w'alutaari. 5Yahola engata chine ech'ohukiingira, mani naachita hu soonda chine. 6Yahola emisiruunga eky'embaao ch'emigasia, mani yaachibwiihaho neende omugasa, 7mani naakita mu ngata echiri hu buli lwaande lw'alutaari. Alutaari yino yali yaholwa mu mbaao, mani yali niyirimo eliina.

Ohuhola olukaraaya lw'omugasa

(Hut 30:18)

8 # Hut 30:18. Yahola olukaraaya lw'omugasa nae obweemero bwaayo bwosi obw'omugasa ohutula mu mbonero ch'abahasi abali nibahalaabaniraanga mu siruwa sy'Eyeema ly'Ohubaao hw'Omwaami.

Olukaka lw'eyeema ly'Ohubaao hw'Omwaami

(Hut 27:9-19)

9Haandi yahola olukaka lw'epasya ch'engubo y'elaasi nderere ohubodoohania Eyeema ly'Ohubaao hw'Omwaami. Hu lwaande lw'emwaalo, epasya chalichiingi emiita amahumi kane neende chine ohuleeyi,, 10nichasiirwa neende emisiiro ky'omugasa amahumi kabiri, mu bweemero bw'omugasa byosi amahumi kabiri, neende amalobo neende emitaliimbo, byoosi ebyaholwa mu efeesa. 11Olukaka olwo lu fwaana sa lutyo, hu lwaande lw'emukulu lwosi. 12Nae hu lwaande lw'emuumbo, yaliyo epasya chiri emiita amahumi kabiri neende chibiri obuleeyi, neende emisiiro ehumi haandi neende ebyeemero ehumi, haandi neende amalobo neende emitaliimbo, byoosi ebyaholwa mu efeesa. 13Hu lwaande lw'ebukwe, yi siruwa syali, olukaka olwo lwali emiita amahumi kabiri neende chibiri obubaambali. 14Epasya ch'olwaande luundi lw'esiruwa lwali emiita chisaasaba neende obutoonyese chisaasaba (6.6) obuleeyi, neende emisiiro kidatu, neende ebyeemero bidatu. 15Haandi ey'olwaande luundi, yosi yali yityo. 16Epasya choosi, ohwebodoohania olukaka olwo, chali chaholwa mu ngubo y'elaasi nyirifu. 17Ebyeemero by'emisiiro byoosi byali byaholwa mu mugasa, nae amalobo, emitaliimbo, kata neende ebibwiiha aakulu w'emisiiro, byoosi byali byaholwa mu feesa. Emisiiro kyoosi ohwebodoohania olukaka, kyali kyaambanisibwa neende emitaliimbo ky'efeesa. 18Epasya y'esiruwa sy'olukaka yali yaholwa mu ngubo y'elaasi yatuungwa neende obwooya bwa bbulu, papo, neende ranjaai, haandi yasaatwaho neende oludaliso. Yali emiita chitaanu-na-chine obuleeyi, neende emiita chibiri aakulu, koti sa epasya ch'olukaka. 19Yali yasiirwa neende emisiiro kine ekiri mu byeemero by'omugasa bine. Amalobo kachio, ebibwiiha aakulu wachio, haandi neende emitaliimbo chachio, byoosi byali eby'efeesa. 20Ebihoongo byoosi, by'Eyeema elyo, haandi kata neende eby'olukaka lweebodohaanie, byali byaholwa mu mugasa.

Ebichuma byehoonyerwa mu yeema ly'Ohubaao hw'Omwaami

21Ano aliwo olunyiriri lw'obuungi bw'ebichuma ebyehoonyerwa mu Yeema ly'ohubaaho hw'Omwaami, yi ebituundu bibiri eby'amakina byandiikwaho Amalako Ehumi, kabiihwa. Olunyiriri luno lwalagirwa neende Musa, nae lwaaholwa neende Abaleefi abahola nibali aasi w'obunyala bwa Yitamaari, omwaana w'Arooni omulaamisi.

22Bbesaleeli, omwaana wa Wuri, omwiichuhulu wa Huuri, ohutula hu nono ya Yuda, niye owahola buli siindu koti lu Omwaami yalagira. 23Omuhoonyi wae, Oholiabbu omwaana w'Ahisamaki, ohutula hu nono ya Daani, yali omubaachi, omubaasi, haandi yaaba omuluhi w'engubo y'elaasi nyirifu, neende obwooya bwa bbulu, papo, neende ranjaai.

24Esaabbu yoosi eyali niyayaanwa eyiri Omwaami, hu lw'Eyeema lyoolerefu, yakerwa obusito bw'ekiloguraamu elifu ndala (1,000), nibehoonyera esikero syafukiirirwa. 25#Hut 30:11-16.Efeesa yatula mu hubala abaandu b'enono yino yakerwa yaaba ekiloguraamu elifu chidatu neende emia chine, neende amahumi kadatu (3,430), niyakerwa neende esikero syafukiirirwa. 26#Mat 17:24.Mani obuungi buno bwaakanirira neende obuungi bwatuungwa neende abaandu bali nibeyandiikisa mu hubalwa, buli muundu nga atuunga obuungi budahibwa, nibukererwe neende esikero syafukiirirwa. Abasaacha bali elifu emia chisaasaba neende chidatu, emia chitaanu neende amahumi kataanu (603,550) abali nibali emyaaka amahumi kabiri eky'obuhuluundu, oba ohuhiraho ao, abali nibaandiikwa mu hubala ohwo. 27Hu feesa yoosi, ekiloguraamu elifu chidatu neende emia chine (3,400) nichio echehoonyerwa ohuhola ebyeemwaho emia ndala (100) eby'Eyeema lyoolerefu, nae hulw'epasya, ekiloguraamu amahumi kadatu neende chine hu buli syeemwaho. 28Nae ekiloguraamu amahumi kadatu echadoong'aho, Bbesaleeli yaholamo emitaliimbo, amalobo k'emisiiro, alala neende ebibibwiiha aakulu waachio. 29Omugasa kwali nikwayaanwayo eyiri Omwaami kwoola ekiloguraamu elifu chibiri neende emia chine neende amahumi kabiri neende chitaanu (2,425). 30Niyehoonyera echeene chino, Bbesaleeli yahola ebyeemwaho by'esiruwa sy'Eyeema ly'Ohubaao hw'Omwaami, haandi yahola alutaari y'omugasa, alala neende ewaaya ch'omugasa echiohusikiraho, alala neende ebiindu biindi bichiira hu alutaari, 31ebyeemero by'olukaka lwebodoohania, eby'esiruwa sy'olukaka, ebihoongo byoosi eby'Eyeema, alala neende olukaka lwebodoohania lwosi.

Currently Selected:

Ohutula 38: SAMDC

Highlight

Copy

Compare