Ohutula 37

Ohuhola Esanduuku ly'Endagaano

(Hut 25:10-22)

1Bbesaleeli niye ohwahola Esanduuku ly'Endagaano ohutula mu mbaao ch'emigasia, esetimiita emia ndala neende ehumi (110) obuleeyi, esetimiita amahumi kasaasaba neende chisaasaba obubaambali, neende esetimiita amahumi kasaasaba neende chisaasaba aakulu. 2Yalibwiihaho esaabbu ehaya mukati neende erwaanyi, haandi yaata oluhoboloso lw'esaabbu ohulyebodoohania. 3Yahola engata chine ech'ohukiingiraanga ohutula mu esaabbu, haandi yachiyambaania hu makulu kayo kane, engata chibiri hu buli lwaande. 4Yahola emisiruunga ky'ohukiingira ohutula mu mbaao ch'emigasia, yaachibwiihaho neende esaabbu, 5mani yaakiingisa mu ngata chiri hu buli lwaande lw'esaanduku. 6Yahola esifuuniho sy'esaabbu haya, esetimiita emia ndala neende ehumi (110) obuleeyi, haandi esetimiita amahumi kasaasaba neende chisaasaba obubaambali. 7Yahola abakerubbi mu saabbu hong'oonde, 8buli silala esy'ohuta hu buli ndulo y'esifuuniho esyo. 9Abakerubbi abo batingaalanamo nibahalakaniamo esifuuniho esyo, nae embaya chabo chibaambuuhe nichibafuuniha.

Ohuhola emeesa y'emigaati kiyaaniirwe Nasaae

(Hut 25:23-30)

10Yahola emeesa ohutula mu mbaao ch'emigasia, esetimiita amahumi kataanu-na-kadatu neende chitaanu-na-chidatu obuleeyi, esetimiita amahumi kane neende chine obubaambali, haandi neende esetimiita amahumi kasaasaba neende chisaasaba aakulu. 11Yayibwiihaho neende esaabbu ehaya, mani yaamala yataaho oluhoboloso lw'esaabbu ohulyebodoohania. 12Yahola oluholoboso lw'emilimiita amahumi kataanu-na-kabiri neende chitaanu obubaambali nasibodoohania, haandi naamala naata olukohobero lw'esaabbu n'abodoohania olunikaanika olwo. 13Yaholeraho engata chine echikiinga ech'esaabbu, mani naachita hu buli soonda chine echio, yi makulu kali. 14Engata echio echiohudiiririra emiguulo ch'ohukiingira emeesa, chateebwa aambi neende oluholoboso. 15Yahola emisiiro ch'embaao ch'emigasia mani naachibwiihaho neende esaabbu. 16Yaholeraho endiisi ch'esaabbu haya: esaani, ebikoombe, enjaagi, alala neende ebbakuli ech'ohwehoonyeraanga hu biyaanwa by'efiini.

Ohuhola esiteeni sy'etaara

(Hut 25:31-40)

17Yahola esiteeni sy'etaara esy'esaabbu haya. Yahola obweemero bwasyo, haandi neende omusiiro kw'esaabbu hong'oonde; yasaataho ebimuli bisaatwa, ebiriho emitoombo, neende emilokoyo, ebyambaanisibwaho byoosi byaaba omubiri mulala. 18Esiteeni esyo syaliho amasaga kasaasaba nikasikabuhiraho ohutulira hu nyaande, amasaga kadatu hu buli lwaande. 19Buli lala hu masaga kasaasaba ako, lyalichiingiho ebimuli bidatu bisaateho, nibyaholwa nibifwaana koti alimoondi yiri ohubaambula niyiri neende emitoombo neende emilokoyo. 20Omusiiro kw'esiteeni sy'etaara okwo kwaliho ebimuli bisaateho ebifwaana koti alimoondi yibaambula yiriho emitoombo alala neende emilokoyo. 21Yalichiingiwo omutoombo mulala hu sisina sy'emikaanda kidatu eky'amasaga kabiri-kabiri ako. 22Emitoombo echio, amasaga ako, alala neende esiteeni sy'etaara esyo, ebyo byoosi byali byaambaanisibwa alala nibiri omubiri mulala okw'esaabbu ehaya ehong'oonde. 23Haandi yaholera amataara kataanu-na-kane ebiteeni, magalo neende eture, byoosi eby'esaabbu haya. 24Alala yehoonyera ekiloguraamu amahumi kadatu neende chitaanu ech'esaabbu ehaya, ohuhola esiteeni sy'etaara alala neende ebichiiraho byoosi.

Ohuhola alutaari y'ohuniooheseraangaho obubbaani

(Hut 30:1-5)

25Haandi yahola alutaari ohutula mu mbaao ch'emigasia, ohuniooheseraangaho obubbaani. Alutaari eyo yali eyaakanirira enyaande choosi, esetimiita amahumi kane neende chitaanu obuleeyi, esetimiita amahumi kane neende chitaanu obubaambali, mani haandi yaaba esetimiita amahumi kataanu-na-kane aakulu. 26Yafuuniha humukulu wayo, enyaande chine choosi echayo, alala neende ebituundu byayo byooki, neende esaabbu ehaya, haandi yaamala yaata olunikaanika lw'esaabbu ohuyebodoohania. 27Yaholeraho engata ch'ohukiingira chibiri ech'esaabbu, mani naachita aambi neende hu ndulo hu nyaande chibiri, ohwiingiswaamo emisiruunga ki yihoyeere ohukiingirwa. 28Yahola emisiruunga ch'embaao ch'emigasia, mani n'achibwiihaho neende esaabbu.

Ohuhola amafuta k'ohwaawulaanga neende obubbaani

(Hut 30:22-38)

29 # Hut 30:22-38. Haandi yahola amafuta k'ohwaawula amoolerefu, neende obubbaani buwuunya esing'aari buhaya, obwasasaaniswa koti ak'ohwebaha k'esing'aari.

Currently Selected:

Ohutula 37: SAMDC

Highlight

Copy

Compare