Ohutula 39

Ohuhola ebyefwaalo by'abalaamisi

(Hut 28:1-14)

1Ohutula mu bwooya bwa bbulu, papo, neende ranjaai, baholamo ebyefwaalo binyirifu bi balaamisi bali bahoyere ohwefwaala nibali ohuhalaabana Abuundu Woolerefu. Bahola ebyefwaalo by'obulaamisi ebya Arooni koti lu Omwaami yali n'alagiire Musa.

2Bahola esyefwaalo syaakama mu sibuno esy'elaasi nyirifu; ey'obwooya bwa bbulu, papo neende ranjaai; haandi neende obusye bw'esaabbu. 3Beetaanya ebibbaati by'esaabbu, mani haandi nibamala ni babiheengamo ebipaande bileeyi bi bali nibachia ohubiholamo elaasi nyirifu, haandi neende mu bwooya bwa bbulu, papo, haandi neende ranjaai. 4Bahola emifiriingi kibiri eky'ohudiira hu mabeka engubo yoomusibuno eyo mani nibamala ni bakyongaaniaho hu nyaande choombi, hu yinyale ohwediira hu mubiri. 5Bulaanu, oluhoba lwali niluluhirwe bulai muno, ohutula mu biindu byeene ebyo aakulu, lwoosi balunabira hu ngubo eyo eyomusibuno byeehole omubiri mulala, koti lu Omwaami yali n'alagiire Musa. 6Haandi batekeha karinelia mani nibachiingisa mu fureemu ch'esaabbu; basaataho nibeehaliirisa, ameeta k'abasyaani ehumi neende babiri aba Yakobbo. 7Bachita hu mifiriingi chohumabeka, ech'engubo yomu sibuno ohuhiihirira enono ehumi neende chibiri echia Yisiraeli, koti sa lu Omwaami yali n'alagiire Musa.

Ohusona esituundu sy'engubo syoohusirifu

(Hut 28:15-30)

8Haandi bahola esipaande syoohusirifu ohutula mu biindu bi baholamo engubo yoomu sibuno eyo, haandi neende ohusonwaho hufwaana hutyo. 9Syali esyaakanirira embeka choosi, nae haandi nga bayifuumbiremo amahabi kabiri, esetimiita amahumi kabiri neende chibiri obuleeyi, haandi neende esetimiita amahumi kabiri neende chibiri obubaambali. 10Banabiraho enyiriri chine ech'amakina malai muno: mu lunyiriri lutaangira banabiraho amakina kalaangwa mbwe, akiiki, topaasi, neende garineeti. 11Mu lunyiriri lwohubiri, banabiraho, emeraadi, safire, neende daimoondi; 12mu lunyiriri lwohudatu, banabiraho yasiito, agate, haandi neende ametisito; 13haandi mu lunyiriri lwoohune, banabiraho, bberili, karinelia neende yasipa. Amakina kano koosi bakatechaanga mu fureemu ch'esaabbu. 14Buli kina hu makina ako ehumi neende kabiri balichiingi nibasaataho eliita ly'omwaana mulala wa Yakobbo, hu kanyale ohuhihiirira enono ehumi neende chibiri echa Yisiraeli. 15Baholeraho enyororo ch'esaabbu haya, echiluhwa koti emikoye. 16Haandi bahola efureemu chibiri chiindi ech'esaabbu, haandi neende engata ch'esaabbu chibiri, mani nibamala niboongaho engata echio hu soonda ch'akulu ch'esipaande syoohusirifu. 17Baboya emikoye ky'esaabbu kibiri ekyo hu ngata chibiri echio 18haandi nibamala nibaboya enamitwe kibiri eky'emikoye ekyo hu fureemu chibiri, mani mu ngeri yino nibakita mu moni hu mifiriingi eky'engubo yoomu sibuno. 19Haandi bahola engata chibiri ch'esaabbu, mani nibamala nibachita hu soonda cha aasi ech'esipaande syoohusirifu, hu ndulo w'olwaande lwomuukati aambi neende engubo yoomu sibuno eyo. 20Haandi bahola engata chiindi chibiri haandi, mani nibachita hu situundu sya aasi sy'emberi w'emifiriingi kibiri ekyohumabeka ekidiira engubo yoomu sibuno, aambi neende amapaala, nae aakulu w'olusibiro lwaluhwa bulai muno olwo. 21Koti sa lu Omwaami yali n'alagiire Musa, mani baboya engata chohu sipaande syoohusirifu, hu ngata chohu ngubo yoomu sibuno neende omukoye kwa bbulu, hu bulaanu esipaande syoohusirifu sinyale ohukona aakulu w'olusibiro nga nae haba sisinyalire ohudeembuhana daawe.

Ohuhola ebyefwaalo biindi eby'obulaamisi

(Hut 28:31-43)

22Engubo yi befwaaliraho engubo yoomu sibuno yalichiingi niyaholwa mu bwooya bwa bbulu buhaya. 23Eliina libiswamo omutwe lyali lyomiiswa neende ohunabwaho esaandago ohulikaira litataanduha bwaangu. 24Hu kemo ly'engubo eyo, banabiraho amapomoguranaate eky'elaasi nyirifu. 25Haandi neende obwooya bwa bbulu, papo, haandi neende ranjaai; 26nibatootobania amabere masuungu neende ekeengele ch'esaabbu ehaya, koti sa lu Omwaami yali n'alagiire Musa. 27Baholera Arooni alala neende abaana bae amasaati, 28haandi neende ebitarabuusi, neende enjuunga, esinyaasa sy'elaasi, 29neende olusibiro lw'elaasi nyirifu, neende obwooya bwa bbulu, papo, neende ranjaai, nilutaahwo amang'eniesi k'obujweenge, koti busa lu Omwaami yali n'alagiire Musa. 30Bahola esiloonge, ahalolero hoolerefu, ohutula mu saabbu, mani baasaataho bati, “Yayaanwa eyiri Omwaami”. 31Basiboya mu moni w'esitarabbuusi neende omukoye kwa bbulu, koti sa lu Omwaami yali n'alagiire Musa.

Ohumaliirisa omulimo okwo

(Hut 35:10-19)

32Omulimo kwoosi okudiira hu Yeema ly'Ohubaao hw'Omwaami kwoola ohuwa. Abaisiraeli bali baholere buli siindu koti sa lu Omwaami yali n'alagiire Musa. 33Baleeta eyiri Musa Eyeema elyo, alala neende ebiindu biindi byoosi ebichiiraho koti, amalobo kaahwo, efureemu chaahwo, emiguulo kihalakaniamo kyahwo, emisiiro kyaahwo, alala neende ebyeemwaho byalyo; 34esifuunihaho esy'eseero ly'ekoondi emiiku lyabahwa eraangi ya ranjaai; esifuunihaho sy'eseero nyirifu; neende epasya; 35Esanduuku ly'Endagaano elirimo ebituundu bibiri eby'amakina, emisiiro kyalyo, neende esifuuniho syalyo; 36emeesa alala neende ebiindu bichiiraho byoosi, alala neende emigaati ki bayaanayo eyiri Nasaae; 37esiteeni sy'etaara sy'esaabbu haya, mataara kasyo, ebiindu biindi bichiiraho, haandi neende amafuta k'amataara; 38alutaari y'esaabbu; amafuta kaawula; obubbaani buwunya esing'aari silai muno; epasya y'esiruwa sy'Eyeema; 39alutaari y'omugasa, alala neende ewaaya chisika ch'omugasa, emisiiro chayo, alala neende ebiindu bichiiraho byoosi; olukaraaya lw'ohweeyoseraho, haandi neende esyeemero syayo; 40epasya ch'olukaka neende amakutu kaahwo neende ebyeemero byaahwo; epasya y'esiruwa sy'olukaka neende emikoye kyahwo; ebihoongo by'Eyeema; haandi neende ebiindu byoosi ebihoyeere ohwehoonyerwa mu Yeema; 41haandi neende ebyefwaalo binyirifu bi balaamisi bali nibahoyere ohwefwaalaanga nibali Abuundu Woolerefu, engubo ndafu chia Arooni omulaamisi, haandi neende echa abaana bae. 42Abaisiraeli bali nibaholere omulimo okwo kwoosi koti sa lu Omwaami yali n'alagiire Musa. 43Musa yehaliirisa buli siindu mani n'abonera elalira ati bali nibaliholere lyoosi, koti sa lu Omwaami yali n'alagiire. Musa yababeresa ehabi.

Currently Selected:

Ohutula 39: SAMDC

Highlight

Copy

Compare