Ohutula 36

1“Bbesaleeli, Oholiabbu, alala neende abahalaabani baandi boosi, ba Omwaami yaberesa obumanyirifu neende ohumanya, abamanya ohuhola buli siindu syoosi esidahibwa hu hwoombaha Eyeema ly'Ohubaao hw'Omwaami, nibo abachia ohuhola buli siindu koti lu Omwaami yalagira.”

Abaandu baleeta ebiyaanwa biingi

2Musa yalaanga Bbesaleeli, Oholiabbu, alala neende abasaacha baandi abali neende obumanyirifu ba Omwaami yali niyababeresa obunyala, haandi ababa nibadaha muno ohuhoonya, Musa yababoolera ohuchaaka ohuhola emirimo. 3Musa yababeresa ebiyaanwa byoosi bi baandu bayaanayo ohwoombaha Eyeema ly'Ohubaao hw'Omwaami. Nae abaandu ba Yisiraeli bemeeda sa ohuleeteraanga Musa ebiyaanwa byaabwe buli chuli. 4Abasaacha bali neende obumanyirifu, abali nibeechere ohuhola omulimo okwo, bachia 5baaboolera Musa bati, “Ngaandi abaandu bali ohuleeta ebiindu biingi ohubita ebidahibwa ohuhola omulimo ku Omwaami yalagira kuholwe.”

6Musa yatuma elako mu kaambi mwoosi eliboola liti, abaandu boosi balehere ao ohutusa ebiyaanwa by'Eyeema Lyoolerefu; mani abaandu beemao baaleheserwa ao ohuleeta ebiyaanwa. 7Olwohuba ebyo ebyali nibimalire ohuleetwa byali ni bihirira elalira ebyali nibidahibwa ohuhola neende ohumaliirisa omulimo okwo kwoosi.

Ohwoombaha Eyeema ly'Ohubaao hw'Omwaami

(Hut 26:1-37)

8Abasaacha bali nibahiramo obumanyirifu mu baandu nibo abahola omulimo kw'ohwoombaha Eyeema ly'Ohubaao hw'Omwaami. Balihola ohutula mu bituundu ehumi eby'elaasi nyirifu muno, niyiluhiirweho obwooya bwa bbulu, papo, neende ranjaai, mani nibanabiraho ebifwaanani by'abakerubbi. 9Buli situundu syali esyaakanirira obuhoongo, emiita ehumi neende chibiri obuleeyi, neende emiita chibiri obubaambali. 10Baambaania alala ebituundu byaaka bityo bitaanu ebilaamba mani byaahola esikaanda silala, haandi nibeemao nibahola batyo bitaanu byali nibidoong'ereo. 11Bahola amapaala k'engubo ya bbulu hu ndulo w'esituundu sy'erwaanyi hu buli mukaanda. 12Bata amapaala amahumi kataanu hu situundu sichaaka esy'omukaanda kwaamberi, haandi amapaala amahumi kataanu nibakaakanirisa hu situundu simaliiriha hu mukaanda kw'ohubiri. 13Haandi bahola amalobo k'esaabbu amahumi kataanu, ak'ohwehoonyera ohusagania alala emikaanda kibiri ekyo, hu kihole omukaanda muhoongo mulala.

14Bulaanu bahola esifuuniho syoohu Yeema ohutula mu bituundu ehumi neende silala eby'engubo yaholwa ohutula mu bwooya bw'embusi. 15Babihola byaaba ebyaakanirira obuhoongo, emiita ehumi neende chidatu obuleeyi, neende emiita chibiri obubaambali. 16Baambaania ebituudu bitaanu hweebyo alala, byaahola omukaanda mulala, nae ebiindi bisaasaba biindi bira byaahola omukaanda kuundi. 17Haandi bata amapaala amahumi kataanu hu ndulo w'esituundu simaliiriha hu lwaande lulala ol'womukaanda mulala, haandi amapaala amahumi kataanu hu ndulo w'omukaanda kuundi okwo. 18Haandi bahola amalobo k'efeesa amahumi kataanu ak'omugasa, hu ndulo w'omukaanda kuundi kula. 19Haandi haahola ebibwiihaho biindi bibiri, silala esy'eseero ly'ekoondi emiiku nibabahaho eraangi ya ranjaai, nae eliindi lyaaba ely'eseero nyirifu muno, ohuhola koti esibwiihaho esy'ohumukulu.

20Baholera Eyeema, efureemu cheema tiiri ech'embaao ch'omugaasia. 21Buli efureemu yali emiita chine aakulu, nae esetimiita amahumi kasaasaba neende chisaasaba obubaambali, 22echiriho ebiindu bibiri ebyasoba bichiana, hu fureemu chinyale ohweyambaania alala. Efureemu chino choosi chabaaho ebiindu byasoba bino. 23Bahola efureemu amahumi kabiri ech'olwaande lw'emwaalo 24haandi neende ebyeemwaho by'efeesa amahumi kane byeemeswaho, buli byeemwaho bibiri nibiba aasi w'efureemu ndala ohudiirira ebiindu bibiri byasoba bira. 25Bahola efureemu amahumi kabiri ech'olwaande lw'emukulu lw'Eyeema 26alala neende ebyeemwaho amahumi kane eby'efeesa, bibiri nibichia ohuba aasi wa buli fureemu. 27Nae emukoongo w'Eyeema, olwaande lw'emuumbo, bahola efureemu chisaasaba 28haandi neende efureemu chibiri ech'ohusoonda. 29Efureemu chohusoonda chaambanisirwaanga aasi, mani chaambaana ohutulira elalira aasi ao, ohwoola aakulu bweene. Efureemu chibiri chino echihola esoonda chibiri cheholaanga choosi chityo. 30Yaliwo alala efureemu chitaanu-na-chidatu neende ebyeemwaho ehumi neende bisaasaba eby'efeesa, bibiri ohuba aasi wa buli fureemu.

31Bahola emiguulo ehumi neende kitaanu eky'embaao ch'emigasia, kitaanu nikiri eky'efureemu hu lwaande lulala olw'Eyeema, 32kitaanu kiindi eky'efureemu ch'olwaande luundi, haandi kitaanu eky'efureemu ch'olwaande lw'emuumbo, emukoongo. 33Omuguulo kuhalakania akati, nibakuta akati w'efureemu noniina aakulu, kwatulira hu ndulo olwaande lulala, ohwoola hu ndulo hundi hw'Eyeema. 34Babwiiha hu fureemu choosi neende esaabbu, haandi baachiyambaanianga alala neende engata ch'esaabbu ohudiirania emiguulo kihalakanamo, kyosi ekyali nikibwiihirweho neende esaabbu.

35Bahola epasya y'elaasi nyirifu, eyanabwaho neende ohwooya bwa bbulu, papo, neende ranjaai, haandi nibanabaho ebifwaanani by'abakerubbi. 36Bahola emisiiro kine eky'embaao ch'emigasia ohudiiraanga epasya, mani haandi beemao baakifuunihaho esaabbu, haandi bakiyambaania alala neende amalobo k'efeesa. Haandi bahola ebyeemwaho bine eby'efeesa, ohudiraanga emisiiro ekyo. 37Nae hu mulyaango kwiingira mu Yeema, bahola epasya y'elaasi nyirifu, eyanabwa neende obwooya bwa bbulu, papo, neende ranjaai haandi niyoobbwaho neende ebiindu bisoonwa sa. 38Baholera epasya yino emisiiro kitaanu ekiriho amalobo, haandi babwiiha humukulu neende emitaliimbo chayo neende esaabbu, haandi baahola ebyeemwaho by'omugasa bitaanu eby'emisiiro.

Currently Selected:

Ohutula 36: SAMDC

Highlight

Copy

Compare