Ohutula 16

Mana neende esiindu

1Oluyia lw'Abaisiraeli lwoosi, lwatula mu Elimu, mani hu ludaalo lw'ehumi-na-chitaanu ch'omwoosi kw'ohubiri nibamalire ohutula Misiri, boola mu siparara sy'Esyonoono, esiri akatikaati wa Elimu neende Sinai. 2Nae nibali eyomu siparara esyo, bekanyiirisira Musa neende Arooni 3nibababoolera bati, “Hubaasa huti, syahabeere esilai, Omwaami aba niyatwiitira mu Misiri. Eyo, hwali nihunyala ohwiihalaho aasi hwaalya enyama, haandi neende ebyohulya biindi biingi koti lu hudaha. Nae eng'we mwatutusa omwo, mani mwaatuleeta mu siparara sino, ohutuwoongyaanga sa enjala fweesi hwoole ohufwa.”

4 # Yow 6:31. Omwaami nae yaboolera Musa ati, “Bulaanu, njia ohubaholera mweesi, ebyohulya bibamala, bitule muukulu nibikwa hu syaalo koti efula. Abaandu bahoyere ohutulaanga erwaanyi buli ludaalo, nibadoola ebibamala hu ludaalo olwo. Mu ngeri yino, mba njia ohubateema nyale ohufuumbula nibanyala ohuloondakana neende amakerako kaange. 5Nae hu ludaalo lwohusaasaba, bahoyere ohudoola ebyaaka neende amahabi kabiri bi badoolaanga mani babitereesa.”

6Musa neende Arooni baboolera Abaisiraeli boosi ati, “Engoloobe, muchia ohumanyira elalira muti hane, Omwaami weefwe oyo niye owabatusa mu Misiri. 7Echuli-chuli muchia ohubona obulafu bumesa-mesana obw'Omwaami. Amalire ohuwulira ohumweekanyiirisa hweeng'we. Eee, ohumweekanyiirisa, olwohuba efwe ano huli sa ohuholaanga byaaba n'atulagiire.” 8Haandi Musa yaboola ati, “Omwaami niye ochia ohubabeechaanga enyama ch'ohulya engoloobe, neende emigaati kibamala echuli, olwohuba awuliire koti lu mumwekanyiirisire muno. Nimwali nimutwekanyiirisa, mubwadyeeri bweene mwali nimwekanyiirisa Omwaami.”

9Musa yaboolera Arooni ati, “Ewe boolera omukaanda kwoosi kwiiche kweeme mu moni w'Omwaami, olwohuba awuliire amaliro kaabwe.” 10Arooni niyali n'aboolera omukaanda okwo kwoosi, bakaluuhana bachaaka ohuchooma esiparara esyo, mani bwaangu bweene, obulafu bumesa-mesana obw'Omwaami, bwaabonehera mu sireesi. 11Omwaami yaboolera Musa ati, 12“Ese mbuliire amaliro k'Abaisiraeli. Chia obaboolere oti, engoloobe, bachia ohunyolaanga enyama y'ohulya, nae echuli-chuli, bachia ohunyolaanga emigaati kyoosi ki baba nibadaha. Ao niwo yibahamanyire bati ese, Omwaami, Niise Nasaae waabwe.”

13Engoloobe yeene eyo, eyiicho ly'esiindu lyaabburuha mani lyaabakwaamo, elimala ekaambi yoosi, haandi echuli-chuli nayo yabaao enang'oong'o nilyebodohaanie ekaambi. 14Enang'oong'o elyo nilyeecha lyadumuuha lyawaao, waliwo ebiindu biindi ebinyerere haandi ebimilamilana nibiri humukulu w'esiparara. Byali nibiri ebiri nabudereembe koti amafuta k'eng'oombe. 15#1 Kor 10:3.Nae Abaisiraeli nibeecha baabibona, byabahaya ohubimanya mani bachaaka ohuteebana abeene-na-beene bati, “Eng'we, bino biindu siina?”

Nae Musa yababoolera ati, “Ngaandi bino nibyo ebyohulya bi Omwaami ababereese ohulya. 16Omwaami haandi yalagira ati, buli mulala hweeng'we ahoyeere ohudoola ebiingi ebimuyera, elita chibiri hu buli muundu oli mu daala lyae.”

17Abaisiraeli bachaaka ohuholaanga bati, nae abaandi badoolaanga ebihiraho ao, nae abaandi ebiyeraanu. 18#2 Kor 8:15.Nae nibabikeraanga, abalichiingi neende ebiingi beyakanaanga mbwe hane bi bali nabyo haba sibibitiirifu daawe, nae abo abalichiingi nibadoolere ebidiidi haba sibalichiingi neende ebitayerera elalira. Hane buli muundu yali niyadoolaanga ebyalichiingi nibimumala sa. 19Musa yababoolera ati, “Abulao omuundu ohoyere ohubiihaho ebiindi mbwe bikone alye nibuhyeere daawe.” 20Nae abaandi haba sibafukiiriraanga bi Musa yali n'aboolere mani babiihaho ebiindi. Echuli nibuhyeere, byalichiingi nga bisera sa enyeende, haandi nibiwunya koti ebibolere, mani Musa yaabanyoolerera muno. 21Buli chuli buli muundu yachaaka ohudoolaanga ebimuyera; mani elyuuba nilyafwichaanga ely'amaani, ebyalichiingi nibidoong'ere hu loba byasaanguluhaanga.

22Hu ludaalo lwohusaasaba badoolaanga ebyohulya ebibayera amahabi kabiri, buli muundu elita chine. Abeemirisi b'omukaanda okwo beecha eyiri Musa baamuboolera batyo, 23#Hut 20:8-11.nae n'ababoolera ati, “Omwaami alagiire ati muchuli ludaalo lwa Sabbaato lwoolerefu olwohuwuluuhiraho, olwamuleherwa. Nyaanga yino deehe buli siindu si mudaha ohudeeha, haandi tokose buli si mudaha ohutokosa. Esiba nisichia ohudoong'aho sikabulwe sa endulo, mani sibiihirwe muchuli.” 24Koti lu Musa yali n'alagiire, babiiha ebyali nibidoong'ere ohwoola hu ludaalo lwaloondaho; luno haba sibyabiiya oba kata sa enyeende ohubikwaamo. 25Musa haandi yaboola ati, “Nyaanga yino mulye sa, olwohuba enyaanga yino niyo eya Sabbaato, oludaalo lw'ohuwuluuha olwaleherwa Omwaami, mani simunaanyoole ebyohulya byoosi erwaanyi w'ekaambi. 26Muhoyere ohubuusa ebyohulya endaalo chisaasaba, nae hu ludaalo lw'ohutaanu-na-chibiri, oludaalo lw'ohuwuluuha, haba sibinabaayo kata nabudiidi.” 27Nae kata katyo, hu ludaalo lw'ohutaanu-na-habiri, abaandu baandi baatula bachia ohudoola ebyohulya, nae haba sibalayo esiindu syoosi. 28Mani Omwaami yateeba Musa ati, “Abaandu bao bano bahahae ohufunihira amalako kaange ohwoola liina? 29Yichulisaho oti ese Omwaami, omweene ndababeresa oludaalo lw'ohuwuluuha, mani sakira hu ludaalo lwohusaasaba njia ohubaberesaanga ebyohulya ebimala endaalo chibiri. Buli muundu ahoyere ohudoong'a naali yaali hu ludaalo lwa chitaanu-na-chibiri n'atatula mu daala lyae.” 30Mani abaandu baakama ohuholaanga emirimo kyoosi hu ludaalo lwa chitaanu-na-chibiri.

31 # Hub 11:7,8. Abaandu ba Yisiraeli bachaaka ohulaanga ebyohulya ebyo bati, mana. 32Nae Musa yaboola ati, “Omwaami atulagiire ohulehaho mana yiindi, yibiihirwe abeechuhulu beefwe, hu bosi banyale ohubonaho ebyohulya bi mweene yatuberesa ohulichaanga nihuli mu siparara, koti lu yali naatutusire mu Misiri.” 33#Abaib 9:4.Musa yaboolera Arooni ati, “Ewe bukula enjaagi, oteemo elita chibiri echa mana, oyite mu moni w'Omwaami mani yibiihirwe abeechuhulu beefwe.” 34Mani koti sa lu Omwaami yali n'alagiire Musa ohuhola, Arooni yaayita enabweeni w'Esanduuku ly'Endagaano, hu binyale ohubiihwa. 35#Yos 5:12.Abaisiraeli balya mana hulw'embaka y'emyaaka amahumi kane amalaamba, ohwoola lu boola mu loba lya Kanani, yi bamenya. 36(Esikero syoomu syali nisyamanyihana endaalo echio syali nisyaaka neende elita amahumi kabiri.)

Currently Selected:

Ohutula 16: SAMDC

Highlight

Copy

Compare