Ohutula 15

Olweembo lwa Musa

1 # Hubwi 15:3. Bulaanu, Musa alala neende Abaisiraeli beembera Omwaami olweembo luno:

“Njia ohweembera Omwaami waange olweembo, olwohuba ayingiire neende oluyaali lw'amaani;

asukuune efaraasi alala neende abeerusi baachio mu nyaanja.

2 # Sab 118:14; Yis 12:2. Omwaami niye amaani kaange haandi olweembo lwaange;

haandi yeholere omuwonia waange;

Wuno niye Nasaae waange, mani njia ohumufumia.

Niye Nasaae wa laata yaange, mani njia ohweemba obuhunuufu bwae.

3Omwaami mulwaani mululu;

eliita lyae nilyo, Omwaami.

4“Omwaami yasukuna ebigaari bya omutuki wa Misiri neende abalwaani bae mu nyaanja;

mani abalwaani bae bahiramo amaani beebira bahamira mu Nyaanja Njahanyu.

5Enyaanja enjoloberefu eyo yabamira;

beebira boola hu lwaalo lwayo koti ekina.

6Ewe Omwaami, omuhuno kwao muluungi, kulimo amaani k'oluyaali;

kunyoonyobola omusuku mu bituundu-tuundu.

7Mu buhunuufu bwao bw'amaani, oyiingira abatahudaha;

etima lyao lyaaduha koti omuliro, mani lyasaamba koti omuliro kusaamba ebikoha.

8Wafuuta hu nyaanja mani amaachi kebuungiha kaaba koti egenya leeyi muno;

kasiingira keema kaniina kaaba koti esida;

ebusiba yihiramo mu nyaanja eyo yeehola obwoomu.

9Omusuku yaboola ati, ‘Njia ohubaloondaho mbadiire;

Njia ohukabaniamo obuyiinda bwaabwe, mani mbukule bi ndaha byoosi;

Njia ohusobolayo olugaanga lwaange mani mbukule bi bali nabyo byoosi.’

10Nae ohuyeera hwao hulala, ewe Omwaami, kwanyala ohwiibisa Abamisiri boosi;

beebira koti esichuma sisito muno mu maachi k'amaani ako.

11“Ewe Omwaami, wiina mweene, mu banasaae boosi oli koti ewe?

Wiina mweene oli koti ewe, ewe omuhunuufu mu bwoolerefu?

Wiina mweene onyala ohuhola eby'amayia neende ebiholwa by'amaani koti ebyao?

12Ewe niwakolola sa oti omuhono kwao muluungi,

esyaalo syamira abasuku beefwe.

13Ewe omweesikwa mweene mu byosuubisa,

wanyala ohwiimirira abaandu bawali noomalire ohununula;

ewe omweene neende amaani kao, wabagooba waboosa hu loba lyao lyoolerefu.

14Ebyaalo biindi byamala ohuwulira, mani biteengereha neende obuti;

Abafilisiti bakwiiremo oluteengo.

15Abeemirisi ba Edomu batiire;

Abasaacha bahulira Moabbu bali ohuteengereha;

abaandu ba Kanani baweeremo omwooyo.

16Amatiichasi neende oluteengo bi bakwiiremo.

Babweene amaani kao koti lu kali, ewe Omwaami,

mani bateng'eng'aale neende obuti

ohwoola lu baandu bao bahuumba baabitao,

abaandu ba walehuula ohutula mu buwaambe.

17Ewe obaleeta wabeengisa mani wamala waabaniinia waabateengeha hu lugulu lwao,

abuundu yi ewe mweene, Omwaami, wedoolera ohuba edaala lyao,

Enyuumba ya Nasaae yi ewe omweene weyoombahira.

18Ewe, Omwaami waange, ochia ohuba omutuki endaalo choosi pe.”

Olweembo lwa Miriamu

19Abaisiraeli bakeenda bahalakania enyaanja hu loba lyoomu. Nae ebigaari bya Misiri alala neende efaraasi chaabyo neende abeerusi beene bachia boosi beengira mu nyaanja, mani Omwaami yaakobosa amaachi enyuma, kaabamira.

20Miriamu omunabbi muhasi, haandi mboochoong'ene Arooni, yabukula nyaangili yae, mani abahasi boosi nibamuloondaho, niboobba nyaangili haandi nibahina. 21Nae Miriamu yabeemberaanga ati:

“Yembere Omwaami, olwohuba ahirire ohuhira hw'oluyaali;

asukuune efaraasi alala neende abeerusi baacho mu nyaanja.”

Amaachi malulu

22Bulaanu, Musa yeemirira Abaisiraeli yaabatusa hu Nyaanja Njahanyu mani yabeengisa mu siparara sya Suuri. Endaalo chidatu enaamba, bali nibakeenda ohuhalakania mu siparara esyo, nae byaabahaya ohunyoolaho amaachi koosi. 23Mani boola abuundu alaangwa mbwe Mara, nae amaachi akali eyo kali amalulu muno kaabahaya ohung'wa. Mani sakira abuundu ao yakulihwa eliita Mara. Eliita lino mu Luibburania lyeekesa “Obululu.” 24Abaandu bekanyiirisira Musa nibateeba bati, “Huchia ohung'wa siina syeene?” 25Musa yekweeda Omwaami neende omwooyo mulala, Omwaami oyo yamweekesa esihwi siindi, si yasukuna mu maachi ako; mani keehola amalai kanyala ohung'weeha.

Abweene ao, Omwaami yaheengao ohubaberesa amalako kabahoyere ohumenyeraho, haandi abweene ao niwo yi yabapiimira. 26Yaboola ati, “Nimuchia ohuumbulirira elalira nimuholaanga ebyo bi mbaberesa ohuba ebyadyeeri, neende ohuliindaanga amalako kaange, mba siinja ohubasaandyaho neende amalwaae kandaleteraanga Abamisiri. Ese niise Omwaami mweene, haandi oyo obawonia.”

27Haandi boola Elimu, eyali esulo ehumi neende chibiri, neende emisaala minaasi amahumi kataanu-na-kabiri; Eyo niyo yiboombaha ekaambi eyali aambi neende amaachi.

Currently Selected:

Ohutula 15: SAMDC

Highlight

Copy

Compare