Ohutula 17

Amaachi katula mu lwaanda

(Hub 20:1-13)

1 # Hub 20:2-13. Oluyia lw'Abaisiraeli lwoosi lwatula mu siparara sy'Esyonoono, nibayiikaana mu bituundu bikabuhaane, ohweema hu lako ly'Omwaami. Nae bahola ekaambi abuundu alaangwa ati Refidiimu, nae kata katyo amaachi kohung'wa haba sikaliyo. 2Haandi abaandu bekanyiirisira Musa nibaboola bati, “Ewe tuberese amaachi ak'ohung'wa.”

Nae Musa yakobolamo ati, “Eng'we lwasiina muli ohwekanyiirisa? Lwasiina muli ohuteema Omwaami mutyo?”

3Nae abaandu bali neende obuluwo bubitiirifu mani bemeeda sa ohwekanyiirisira Musa. Baboola bati, “Ewe lwasiina watutusa mu Misiri? Ohutwiita efwe alala neende abaana beefwe boosi, neende ebiindu bilamu byeefwe byoosi obuluwo?”

4Musa yekweeda Omwaami neende obumaliirifu bweene n'aboola ati, “Ndaahole endye abaandu bano boosi? Bali aambi ohuuhuya amakina.”

5Omwaami yaboolera Musa ati, “Chia obukule abeemirisi baandi ba Yisiraeli mani ochie nabo mu moni w'abaandu. Bukula ochie neende endabuhi yi wahuyira hu mwaalo kwa Naili. 6Ese njia ohweema mu moni wao hu lwaanda oluli aambi neende Olugulu lwa Sinai. Ewe huya sa hu lwaanda, mani amaachi kachia ohulutulamo abaandu bang'we.” Musa yahola atyo mu moni w'abeemirisi ba Yisiraeli.

7Abuundu ao yalaangwa ati Maasa neende Meribba, olwohuba ao niwo yi Abaisiraeli bekanyiirisira nibateema Omwaami nibeeteeba bati, “Omwaami wuno ali naafwe kose daawe?”

Ohulwaana ebiita neende Abamaleki

8Abamaleki baseeta Abaisiraeli nibali Refidiimu. 9Musa n'aboolera Yosua ati, “Ewe doolaho abasaacha baandi, abachia ohulwaana neende Abamaleki muchuli. Nae ese njia ohweema aakulu hu sigulu nindiirire endabuhi yi Nasaae yamboolera ohukiinga.” 10Yosua yahola koti lu Musa yali yamulagiire yachia ohulwaania Abamaleki, nae Musa, Arooni, neende Huuri bachia baaniina aakulu hu lugulu. 11Koti lu Musa yalichiingi n'akiingire amahono kae aakulu, Abaisiraeli bayiingiraanga, nae niyesaanga amahono aasi, Abamaleki bachakaanga ohuhira. 12Mani amahono ka Musa nikajoong'a, Arooni neende Huuri bamuleetera ekina yehaleho, nabo badoong'a sa nibeemere muumbafu wae mani baadiiririra amahono kae kadoong'e nikali aakulu, nibakadiiririire bulai bweene aakulu ohwoola lu lyuuba lyakwa. 13Mu ngeri yino, Yosua yayiingirira elalira Abamaleki.

14 # Amal 25:17-19; 1 Sam 15:2-9. Omwaami yaboolera Musa ati, “Ewe yandiika ebidiira hu huyiingira huno, hu binyale ohwiichuliswaanga. Boolera Yosua oti ese njia ohusihirisira elalira Abamaleki.” 15Musa yoombaha alutaari abweene ao, mani yaayilaanga ati, “Omwaami niye ebbeendera yaange.” 16Yemeeda n'aboola ati, “Kingeenge aakulu ebbeendera y'Omwaami! Omwaami aba achia ohwemeeda nayiingiraanga Abamaleki endaalo choosi.”

Currently Selected:

Ohutula 17: SAMDC

Highlight

Copy

Compare