2 Makabeewo 7
7
Omuhasi neende abaana bae bataanu-na-babiri beetwa hulw'efukiirira yaabwe
1Haandi mu biha ebyo, abebulanwa bataanu-na-babiri nibadiirwa alala neende ng'inabwe. Omutuki n'abayiika ohulya enyama y'embiichi; esitafukiirirwa mu malako k'efukiirira yaabwe. 2Mulala hu baraaga bano, n'alomaloma hulwa boosi n'aboola ati, “Mudaha ohututeeba siina syeene, haandi mudaha ohutumanyaho siina? Olwohuba huli abeetekefu ohufwa ohuhira ohuhalaka amalako ka bakuuka yeefwe.”
3Omutuki mani n'anyoolera muno. Mani n'alagira ohubasa ebifulya neende ebihalaangiro bibale muno byaahanye. 4Nibyahaanyira elalira, omutuki mani n'alagira ati baheenge olulimi lw'oyo owalomaloma hu lw'abaasye, bamubaakeho esihoba syohu mutwe, haandi bamutemeho amahono neende amakulu bamwaanang'ina neende ng'inabwe nibabona. 5Niyali nawereremo elalira amaani, omutuki yalagira ati bamuyire eyiri omuliro, n'asiyeera, mani bamusukune hu sihalaangiro ahalaangirweho. Omwoosi kutula hu sihalaangiro nikusalaana buli abuundu, nae bamwaanang'ina neende ng'inaabwe nibagumia buli otulayo ohufwa neende oluyaali, nibaboola bati: 6“Omwaami Nasaae abona koti lu husaanda haandi mubwadyeeri bweene atukwiira esisa, koti lu Musa yaboola mu lweembo lwae olwolobya abo abebwaaba Omwaami. Yaboola ati; ‘Omwaami achia ohukwiira esisa abahalaabani bae.’ ”
7Omwaana waabwe owataangira niyamala ohufwa mu ngeri yino, baleeta owohubiri mani nibachaaka ohwesangaasiraho. Bamuhoboolaho esihoba syohu mutwe alala neende efwiiri lyahwo, mani nibamuteeba bati: “Ochia ohulya enyama y'embiichi mu bweyaango bwohuhutemaho amahono neende amakulu?” 8Yakobolamo mu lulimi lwae n'aboola ati: “Haba daawe.” Mani sakira yasaanda mu ngeri nasilala koti mwaanang'ina wataangira. 9Nae niyali naali aambi ohukwiisa omwooyo, yaboolera omutuki ati: “Omwiiti ewe! Oli ohutumalaho obulamu buno. Nae Omutuki w'esyaalo syoosi achia ohutusyuuhisa mani atuberese obulamu butaakama, olwohuba hufwiire olw'ohudiira amalako kae.”
10Oyo niyafwa, bachaaka ohwesangaasira hu wohudatu. Nibamulagira ohutusa olulimi, yalusobolayo bwaangu muno, haandi n'asiingisa amahono niyomiirire. 11N'aboola ataali ohutya hwoosi ati: “Nasaae niye owamberesa amahono kano. Mani olwohuba amalako kae, kebwaabire haandi suubira endi achia ohukaangobosera haandi.” 12Sino syakera omutuki neende abo abali nae nibawuka obugumu bw'omuraaga wuno, olwohuba haba siyatya ohusaandisibwa daawe.
13Wuno yesi niyamala ohufwa, basaandya haandi baahuya owohune mu ngeri nasilala. 14Nae niyali aambi ohukwiisa omwooyo, yaboola ati: “Silai ohufukiirira ohufwa mu bunyala bw'abaandu nooli neende esuubi mbwe Nasaae yahatusyuuhise. Nae ewe, haba siwahasyuuhire mu bulamu butaakama daawe!”
15Baleeta owohutaanu ohumusaandya. 16Nae yatingaala omutuki, mani n'amuboolera ati: “Olwohuba oli neende obunyala hu baandu, hola sy'odaha, nae wesi oli ow'ohufwa. 17Liinda mani olibona koti obunyala bwao bw'amaani bwahasaandisibwe, ewe neende abeechuhulu bao.”
18Oyo nibamumalayo, baleeta owohusasaaba. Nae niyali aambi ohukwiisa omwooyo, yaboola ati: “Leha ohwebacha buhaya. Efwe huli ohusaanda koti huhoyera, olwohuba hwahola ebyonoono eyiri Nasaae weefwe mweene. Sakira ebiindu bibi bino biri ohutweholehaho. 19Nae otabaasa oti haba siwahasaandisibwe kata nabudiidi daawe, ewe oteema ohulwaania Nasaae.”
20Ng'ina yaabwe niye owahira ohuwuwukisa muno, haandi ahoyera ohwichuliswa neende oluyaali. Kata ayahaba mbwe yabona abaana bae bataanu-na-babiri nibasihirira mu ludaalo lulala, yasyesimirisira neende obwomiifu olwohuba yali yeesika Omwaami. 21Yagumya buli mwaana otulayo mu lulimi lwaabwe. Yali neende omwooyo mulai, yambaania embaasa yesihasi neende obugumu bwesisaacha, mani n'ababoolera ati: 22“Haba simanyire koti lu mwaloongwa mu nda yaange. Haba siniise owababeresa obulamu neende ohuyeera omuuya, haandi siniise owambaania enyiingo cha buli otulayo hweeng'we. 23Mani sakira Omuloongi w'esyaalo, owaloonga abaandu, haandi yi buli siindu situla, olw'esisa syae, buli otulayo hweeng'we, achia ohumukobosera obulamu haandi neende ohuyeera omuuya, olwohuba mudaha amalako kae ohuhira koti lu mudaha obulamu bweeng'we.”
24Atioko yabona ati alekereeswe, haandi emboosi ch'omuhasi wuno chali nichimudyabuhira-budyabuhira. Omwaana ohiramo obuyere yali n'asisiiri omulamu. Atioko mani n'ateemaho muno ohumwekweeda yekaane emisiro cha bakuuka yaabwe. Atioko haba siyaakama hu mboosi choong'ene, nae yameedaho neende ohwechuba hwosi, n'amusuubisa ati achia ohumuberesa obuyiinda neende oluyaali, achia ohumuhola abe omwiicha wae haandi amuberese obunyala bw'ohuliinda ebiindu byomu syaalo. 25Nae omwaana oyo n'ahaya ohutekeeresa eby'omutuki. Omutuki mani n'alaanga ng'ina mwaana oyo, n'amwekweeda akerakire omwaana hu huwonia obulamu bwae. 26Omutuki niyamala ohumwekweeda muno, ng'ina mwaana oyo n'afukiirira ohukerakira omwaana wae. 27Yaguunama mani n'asuda aambi neende omwaana wae, n'abachirisa omutuki mwaalaba, n'aboola omwaana wae mu lulimi lwaabwe ati: “Mwaana waange, ngwiire esisa. Wamala mu nda yaange emyoosi kitaanu-na-kine. Ndahunuunia embaka y'emyaaka kidatu. Ndahulera haandi nihuhusa ohwoola hu myaaka ky'oliho kino. 28Mani mwaana waange, hwekweeda otingaale ekulu neende esyaalo, obone ebiindu byoosi ebibirimo, omanye oti Nasaae yabiloonga n'atehoonyera esiindu syoosi. Mu ngeri nasilala eyo, niyo yi yaloongeramo olwiibulo lw'abaandu. 29Otatya omwiiti wuno. Fukiirira ohufwa, wekese oti ohoyere ohuba alala neende bamwaanaamao. Mani hulw'esisa sya Nasaae, nyala ohunyoola obulamu haandi alala neende bamwaanaamao.”
30Niyali n'asilomalomaanga, omuraaga wuno mani n'aboola ati: “Musiriindire siina? Haba siinjia hudiira esilagiro sy'omutuki, nae njia ohudiira amalako kababeresa bakuuka yeefwe nikabitira mu Musa. 31Ewe, oheengere amakesi kabuli ngeri ohusaandya Abayudaaya, nae haba soochia huwona esinyaasyo si Nasaae ahutekeheere daawe. 32Efwe huli ohusaanda olwohuba ebyonoono byeefwe byeene. 33Kata ayahaba mbwe Omwaami weefwe mulamu atunyoolereere hulw'esiha sidiidi, n'atusaandya haandi n'atukolola, achia ohutukwiira esisa olwohuba huli abahalaabani bae beene. 34Nae omubi ewe, niiwe ohiramo obwaalaba mu baandu boosi. Leha ohweebacha neende ohwehuduumbasa bihaya n'olwaania abahalaabani ba Nasaae. 35Obula obwiiruhiro bw'ohuwona omusaango ku Nasaae omunyala w'Ebiindu byoosi haandi obona buli siindu achia ohuheengera. 36Olwohuba bamwaanaama nibamalire ohwesimiirisa obuchuuni hulw'esiha sidiidi, bulaanu bali mu bulamu butaakama bu Nasaae ababereese. Nae ewe, Nasaae achia ohuheengera omusaango mani ahusaandye koti lw'ohoyera olw'ohwehuduumbasa hwao. 37Bulaanu syesi ndeha obulamu bwaange neende omubiri kwaange koti lu bamwaanaama bahola olwohuba amalako ka bakuuka yeefwe. Nae haandi husaba Nasaae yaanguye okwiira esyaalo syeefwe esisa, nae ahusaandye neende amasira mani onyale ohufukiirira oti niye Nasaae yeeng'ene. 38Haandi ndekongooya endi, ese neende bamwaanaama, niifwe abaakamayo ohusaandisibwa hulw'obwaalaba bwa Nasaae w'Obunyala bwoosi, mubwadyeeri bwae, yakwiisa hu syaalo syeefwe syoosi.”
39Omutuki Atioko yanyoolera muno, mani n'alagira ati bamusaandie ohuhiraho bamwaanang'ina, olwohuba yabona ati yalomaloma neende esireka siingi muno. 40Mani wuno yesi n'afwa mu bwoolerefu, niyeesika Omwaami.
41Luunyuma, abaana boosi nibamalire ohufwa, nibeeta ng'inaabwe.
42Bulaanu, lehe bi nomanoomeho ebidiira hu hulya enyama yaaniirwe emisaambwa neende ohusaandisibwa hw'amaani byaakamire ao.
©Bible Society of Kenya, 2019
©Bible Society of Uganda, 2019