2 Makabeewo 6
6
Abayudaaya basaandisibwa lw'efukiirira yaabwe
1Esiha sidiidi nisyabitao, omutuki yatuma omuchweenufu mulala owomu luhiiho lwa esiko sy'Ateene ayiike Abayudaaya ohuleha amalako ka bakuuka yaabwe neende ohuhaya ohuloondakana neende amalako ka Nasaae. 2Yamutuma ohunyaasa Enyuumba ya Nasaae yiri mu Yerusalemu, ayihole yibe eya nasaae olangwa Sewusi ow'olugulu Olipo. Haandi Enyuumba ya Nasaae yiri Gerisimu, ayilaange ati, “Enyuumba ya nasaae Sewusi Omwiicha w'Abakeni”, koti lu baandu bamenya mu situundu badaha bayilaange.
3Ohufwiinyirirwa ohwo hwachuuna Abayudaaya muno, nibatanyala ohuhwesimiirisira daawe. 4Olwohuba Enyuumba ya Nasaae, abateende bayihola ohuba abuundu w'ohuholeramo ebidyaalo, mani niyoola ohuba abuundu yi baandu baholeramo eby'obucheke; neende ohuleetamo ebiindu bitahoyera ohuyaanwa. 5Hu alutaari hweene nihwiichulaho ebiyaanwa by'omusiro bi malako katafukiirira. 6Abaandu bali nibatanyala ohuliinda Sabbaato, oba ohuliinda endaalo huluundu cha bakuuka yaabwe, noomba ohuboola bati, Bayudaaya nibo.
7Buli mwoosi hu ludaalo lw'ohwichulisiraho ameebulwa k'omutuki Atioko, bayikaanga Abayudaaya ohulya amala k'ebisolo biitirwe koti ebiyaanwa. Haandi oludaalo luhuluundu lwa Dionisio, nasaae w'amalwa nilwolaanga, bayikaanga Abayudaaya ohukeendera mu nyaali nibeesa oluyaali mu Dionisio, nibefwaalire hu mitwe engata ch'amasaafu. 8Putoleme yatusa amakesi mani nibatusa elako bati mu biko bya Abagiriki nibisibiraane, bayikaanga Abayudaaya ohulichaanga enyama ch'ebisolo biitirwe koti ebiyaanwa. 9Haandi Abayudaaya boosi abahayaanga ohuloondakana neende emiduunga ch'Abagiriki, beetweenge bwiitwa. 10Esyohuboneraho, abahasi babiri beetwa olwohuba bayira abaana baabwe ohuhebwa. Babakeesa ohwebodoohania esiko nibalereechere abaana baabwe hu sirifu, mani luunyuma nibabasukuna ohutula hu sida sy'esiko nibakwa aasi neende emitwe. 11Abayudaaya baandi abali nibebuusiire alala mu ng'uungu chiri aambi, nibeesa oluyaali mu ludaalo lwa Sabbaato. Babasitaaka eyiri Filipo, mani nibabasaamba boosi nibali abalamu. Olwohuba bali nibeesa oluyaali mu ludaalo lwa Sabbaato, haba sibelwaanaho daawe.
Omwaami asaandya haandi akwiira esisa
12Bulaanu ndekweeda abo abasoma esitabo sino bahaye ohuwaamo omwooyo olwohuba amasira kafwaana kati, nae bamanye bati esichiiririrwa syohusaanda huno hwoosi sy'ohukolola abaandu beefwe ataali syohubasihirisa. 13Mubwadyeeri bweene, hali ahalolero h'esisa sy'Omwaami siingi abaandu ohusaandisibwa bwaangu muno olw'ebibi byaabwe, ohuhira ohudoong'a ao esiha sihoongo. 14Olwohuba Omwaami haba s'atuyira nasilala neende ebyaalo biindi daawe. Eyiri ebyaalo biindi, Omwaami mberi yesimiirisa, mani yabaleha ebyonoono byaabwe byabitiirira obuungi n'asisiiri ohubasaandya. 15Nae efwe atusaandya nihusisiiri ohubitiirisa ohwonoona. 16Mani sakira, efwe abaandu bae, Omwaami haba siyakamaanga ohutukwiira esisa daawe. Kata ayahaba mbwe aleha amasira nikatukwaaho, haba s'atwibiriraanga kata nabudiidi. 17Lehe bihuboolere bitwichuliseenge. Bulaanu, lehe hukobole hu bi hubeere nihulomalomaho.
Eliasaari afwa hulw'efukiirira yae
18Waliwo omusaacha muhuluundu oyesereho emyaaka haandi ow'oluyaali, olaangwa ati, Eliasaari. Bamwaasamia omunwa nibamuyiika ohulya enyama y'embiichi. 19Eliasaari yaheengao ohufwa n'ali neende oluyaali, ohuhira ohudoong'a omulamu n'anyaasire oluyaali lwae. Yafuucha enyama eyo, mani omwene n'achia abuundu yibasaandisirangamo abaandu. 20Yahola koti abasaacha bomiifu, ohuhaya ohulya ebiindu bitahoyerwa ohuhoombwaho, kata ayahaba mbwe esyo si nyala ohukera bafwiirwa obulamu bwaabwe.
21Abaandu abali mu bunyala b'ohubona bati balya enyama eyo bali nibamanyihaane neende Eliasaari ohumala embaka hoongo muno. Sakira bamutusa eyiri abaandu, bamuyira ebuleka, mani mu bweekisi nibamuboolera bati omweene yereetere enyama yae hu bwae eyifukiirirwa ohuliibwa, yekadirise koti oli ohulya enyama yiitirwe ohuyaanwayo yi mutuki yali n'alagiire. 22N'ahola atyo, ahaywe ohwiitwa daawe. 23Nae Eliasaari n'aheengao ohuhola esiindu sihoyerwa ohuholwa neende omuundu w'embuchi koti echae, neende ow'emyaaka chae. Yali ow'ebiyima bilai ohutula mubuyere bwae bwoosi, n'adiira amalako moolerefu ka Nasaae yababeresa. Omweene yetusayo bwaangu, n'abakobolamo ati bamuyire bamwiite n'aboola ati: “Munjitireo bulaanu buti. 24Ohwebachirisa huli hutyo haba sihuhoyera omuundu w'emyaaka chaange. Sino si nyala syakera abaraaga baangi babaasa bati, Eliasaari yekaanire efukiirira yae niyoosere emyaaka amahumi kataanu-na-kane. 25Mani niwiichuhana ndebachirisa koti oliire enyama yino, olwohuba ndaha ohwemeeda ohuba omulamu lw'esiha sidiidi sa, omweene njia ohwemalamo oluyaali, haandi ndoondobanie abaraaga baangi. 26Kata ndahaba mbwe bulaanu nyala ohuwona ohusaandisibwa neende abaandu, nae kata ndahaba omulamu oba ndaafwa, haba sinyala ohweetusa hu bunyala bwa Nasaae Omunyala w'Ebiindu byoosi. 27Mani sakira niifwa sisaacha buti, njia ohweekesa endi hoyera obukofu bwaange. 28Haandi njia ohulehera abasisiiri abaraaga esyohuboneraho siti silai ohweeyama nihusangaalire ohufwiira amalako keefwe moolerefu haandi ok'oluyaali.”
Niyamala sa ati ohulomaloma bino, n'achia mu bweyaango bubasaandisirangamo abaandu. 29Mani abo abali nibamudiirire esisa mu bidiidi bibitireo, bulaanu nibamukaluhanira, olwohuba babona bati emboosi chi yalomaloma chali koti ech'omuundu mulalu. 30Nae niyali aambi ohufwa olw'ohuhuywa, yaayula mani n'aboola ati: “Omwaami, mu humanya hwae hwolerefu, amanyire ati ndahanyalire ohuwona ohusaanda hw'amaani huno, neende ohufwa. Haandi amanyire ati ndi ohweesimiirisa ohusaanda muno nibaahuya omubiri kuno, nae mu mwooyo ndi omusangaafu ohusaandisibwa olw'ohumwiisamo oluyaali.”
31Eyo niyo engeri yi Eliasaari yafwiiramo. Ohufwa hwae hw'obwomiifu huno, hwali ohwohuboneraho haandi ohw'oluyaali. Huchia ohwichulisibwaanga neende abaandu bomu syaalo syae boosi nae haba si abaraaga boong'ene.
©Bible Society of Kenya, 2019
©Bible Society of Uganda, 2019