2 Makabeewo 3
3
Amayiingani akatikaati wa Onia neende Simooni
1Onia niyali omulaamisi muhuluundu, esiko syoolerefu sya Yerusalemu syali mu muleembe milai haandi amalako ka Nasaae kaliindwa bulai muno, olwohuba Onia yali niyeesa oluyaali mu Nasaae haandi yali niyasyuula ebyonoono. 2Abatuki b'ebyaalo biindi bosi besaanga oluyaali mu Nyuumba ya Nasaae haandi bayatoyiaangia ebiyaanwa by'engaanga y'aakulu muno. 3Kata Seleuko, omutuki w'Asia, yatuunganga buli siindu sidahibwa mu huyaana ebiyaanwa bisaambwa, n'atusa hu musolo kuyatoyisaanga. 4Nae omusaacha olaangwa ati Simooni, ow'oluya lwa Bbenjamini, owaali omuliindi w'Enyuumba ya Nasaae, natafukirisania neende omulaamisi muhuluundu mu ngeri yohutukamo esiito syomu siko esyo. 5Niyabona ati haba saachia huhira Onia omusaango, yaachia eyiri Apolonio omwaana wa Taruso, mu biha ebyo, owali gafana wa Kolesiria neende Fonikia. 6Mani n'amuboolera ati: “Esibiihiro syomu Yerusalemu syeechulamo eseende chitaamanyihaane daawe, haandi echitabalihana daawe. Haandi ati eseende echo haba sinicho echo echiyaanwaanga nibayaana ebiyaanwa bisaambwa daawe, nae chihoyere ohuba echo chi mutuki ohoyeerwe ohubaliirira.”
Heliodoro atumwa Yerusalemu
7Apolonio niyabona, yamuboolera hu seende chi bali nibamuboolereho. Omutuki yalagira Heliodoro, owali n'aliinda ebiindu byae achie atuseyo eseende echo. 8Heliodoro mani n'asingiriramo n'achaaka olukeendo lwae, nae yebachirisa ohuba koti ochia ohulambuula ebiko bya Kelesiria neende Foenisia. Nae mubwadyeeri bweene, yali n'achiire ohwooseresa esyo si omutuki yali n'amutumire.
9Heliodoro niyoola Yerusalemu, omulaamisi muhuluundu womu siko esyo n'amalire ohumwakaanira neende esangaalo, yamuboolera esichiiririrwa syeene esyali nisimuleetere, mani n'ateeba ohumanya oba ebiindu biri koti lu bamuboolera. 10Omulaamisi muhuluundu yamuboolera ati, chaliwo eseende echabiihirwa abahasi bafwiire neende bamulehwa. 11Eseende chiindi cha Hirakano omwaana wa Tobiya, omuundu muhunuufu muno. Eseende chali nichoola ebituundu by'efeesa emia chine neende ebituundu by'esaabbu emia chibiri. Simooni, otatya Nasaae yali n'alomaloome esitaali esyadyeeri hu biindu bino. 12Haandi omulaamisi muhuluundu n'aboola ati, haba sisinyalihana ohufukiirira omuundu yeesi ohuyira eseende ch'abaandu abata obweesikwa bwaabwe mu sifwo syoolerefu, bulaanu esimanyihaane mu syaalo syoosi.
Heliodoro atekeha ohwiingira mu Nyuumba ya Nasaae
13Nae Heliodoro yaholera hu malako ka omutuki yali n'amubereese, yaboola ati eseende echo choosi chihoyerwa ohuchia mu sy'omutuki. 14Mani n'adoola oludaalo niyeengira mu Nyuumba ya Nasaae ohubaliira eseende echo.
Sino syakwiisa esiisi mu siko syoosi. 15Abalaamisi nibefwaalire engubo chaabwe ech'obulaamisi mani nibafuumama mu moni w'alutaari nibekongooya Nasaae aliinde eseende echo chihaye ohuyirwa, olwohuba niye owataao amalako kaliinda eseende chibiihwa mu Nyuumba ya Nasaae. 16Engisa yadiira buli muundu owatingaala hu mulaamisi muhuluundu, olwohuba mu moni wae neende efwaani yae byeekesa engisa yiri mu bulamu bwae. 17Buli muundu yatichaanga haandi yatengerehaanga omubiri kwoosi, niyeekesa engisa yiri mu mwooyo kwae. 18Abaandu bosi mu bidiiyiha beeruhaanga nibatula mu nyuumba chaabwe, nibachaaka ohusaba, olwohuba Abuundu Woolerefu yali aambi ohunyaaswa. 19Abahasi beeboyere ebigunia mu birifu, nibeechula mu ngira. Abahaana bayere abatafukisirirwaanga ohutula mu nyuumba, nibeeruha nibachia hu biruwa, neende hu bida biindi, nae abaandi nibaleengesera mu madirisa. 20Mani boosi nibasiingisa aakulu amahono ohusaba Nasaae. 21Syali esy'engisa muno ohubona abaandu bomu siko boosi nibafumaame hu loba, haandi neende ohubona omulaamisi muhuluundu n'atingaala neende engisa mu moni wae.
Omwaami aliinda Enyuumba ya Nasaae
22Nibali nibekongooya Omwaami, Omunyala w'ebiindu byoosi ohuliinda bulai eseende chibabiiha neende abo abachiliinda, 23Heliodoro yemeeda sa ohola esyo si yali n'aheengereo. 24Nae esiha syeene esyo si Heliodoro neende abaliindi bae si beengiramo mu sibiihiro, Omwaami otuka emyooyo haandi ow'Obunyala bwoosi niyeeyekesa mu ngeri yiwukisa. Mani abo boosi abenyiira ohwiingiramo neende Heliodoro nibateng'eng'ala neende amaani ka Nasaae, nibadoong'a ao nibaba koti abafwiire olw'obuti. 25Olwohuba baboneherwa efaraasi yisiaarwe, eyiri neende oluyaali lw'amaani, owiyirusa yali n'atiisa muno. Efaraasi niyichooma Heliodoro niyalaabe muno, mani niyimutacha neende amakulu kaayo komu moni. Omwiirusi wao yali niyefwaalire ehuumba neende ebilwaaniso by'esaabbu. 26Mani abaraaga babiri nibamubonehera, ababonehana bulai muno haandi ab'amaani muno, bali nibefwaalire bulai muno. Beema hu buli muhono kwa Heliodoro mani nibamuhuya ataali ohuwuluuha daawe, nibamudiifula ebifuusi biingi muno. 27Abweene ao mani n'akwa aasi, esiirima sya titititi nisimwebodoohania n'aba koti ofwiire. Abasaacha bali nae nibamukiinga nibamuta hu sikiingiro, 28mani nibamutusa erwaanyi. Oyo owali niyengiire mu sibiihiro naali neende abamugooba baangi neende abaliindi bae boosi, nae bulaanu yali n'akiingwa-bukiingwa, omwene n'atanyala ohuhola esiindu syoosi. Ao mani boosi nibabona amaani neende obunyala bwa Nasaae.
Onia asabira Heliodoro ohukobosa omwooyo
29Heliodoro yali n'afumaame ao, n'atanyala kata neende ohulomaloma, olwohuba Nasaae yali n'amwekeese obunyala bwae, haandi n'atali neende esuubi ly'ohuwona lyoosi. 30Nae Abayudaaya nibakinia Omwaami owali n'aholere ebiwuukisa mani omwene n'aliinda abuundu wae. Mani mu Nyuumba yae, omubeere nimwichuulemo ohutya neende ohweyendeherera, Omwaami n'aleetamo esangaalo neende omweehoyo.
31Abaandi hu beecha ba Heliodoro nibasaba bwaangu Onia ohusaba Oyo ow'Aakulu Muno akoboseo obulamu bwa Heliodoro owali naali aambi ohufwa. 32Ao mani omulaamisi muhuluundu olwohutadaha omutuki abaase ati Abayudaaya nibo abaleeta amasira kano ohukwa hu Heliodoro, n'ayaana esiyaanwa n'asabira omusaacha wuno akobolemo obulamu. 33Onia niyali n'ayaana esiyaanwa sino, abaraaga babiri bala haandi babonehera Heliodoro, nibefwaalire engubo nasilala chira, nibeema mani nibamuboolera bati: “Hubbira Onia omulaamisi muhuluundu otyo muno, olwohuba niye okerere Omwaami n'ahukobosera obulamu bwao. 34Ewe onyoolere ohusaandisibwa hutula muukulu, bona oti wekesa abaandu boosi amaani k'obunyala bw'Omwaami.” Nibamala ohulomaloma ebyo, nibamala bahamyuuhao.
Heliodoro akinia Nasaae
35Heliodoro mani n'ayaana esiyaanwa eyiri Omwaami haandi n'ahola ebyeeyamo eyiri Omuwonia w'obulamu bwae, mani n'aseebula Onia, mani n'akobolayo neende eye lyae eyiri omutuki. 36N'akaniaayira abaandu boosi ebyo bi Nasaae Ohira byoosi yahola, bi omwene yabona neende echae cheene. 37Nae omutuki niyateeba Heliodoro ati, muundu siina y'ahoyere ohutuma Yerusalemu ehabi liindi, Heliodoro yakobolamo ati: 38“N'oba nooli neende omusuku yeesi oba oyo odaha ohulya mu butuki bwao olukwe, oyo niye y'ohoyere ohutuma. Niwiichuhana yeyiba mani yakobola, achia ohukobola n'amalirwe ohudiifulwa muno, olwohuba mubwadyeeri bweene, abuundu ao aliwo amaani ka Nasaae. 39Olwohuba Nasaae oyo, oli muukulu, niye omwene oliinda abuundu ao haandi osiberesa obuhoonyi. Ahuya haandi yasihirisa abo abeecha nibadaha ohusiholaho esyonoono.” 40Mani Heliodoro neende ohuliinda esibiihiro nilwo lu byali bityo.
©Bible Society of Kenya, 2019
©Bible Society of Uganda, 2019