2 Makabeewo 2
2
Yeremia akisa eyeema ly'ohubaao hw'Omwaami
1Hunyoola mu byandiiko hu omunabbi Yeremia yalagira abo abali nibayirwa mu buwaambe ohubukula mu muliro kwohu alutaari yohusaambiraho ebiyaanwa bisaambwa, koti lu huboolere. 2Haandi omunabbi oyo niyamala ohubeekesa amalako ka Nasaae, yachwichwisira abo abali nibayirwa mu jeela ati bateebiriraangaho amalako k'Omwaami daawe. Mani n'abalabula ati batabachiriswaanga mu bibaaso byaabwe olw'ohubona ebifwaanani by'esaabbu oba eby'efeesa neende ohusabwa hwaabyo ebiri mu syaalo si bachiamo mani baatula hu Omwaami. 3Mani mu mboosi chiri nasilala koti chino, yababoolera ati, bateebiriraanga elako lya Nasaae.
4Haandi siri mu byandiiko siti, omunabbi Yeremia niyamala ohunyoola emboosi ya Nasaae, yalagira ati Eyeema ly'Ohubaao hw'Omwaami neende Esanduuku ly'Endagaano bimuloondeho, haandi ati yaacha hu Lugulu, Musa lu yaniina mani n'abona esyaalo si Nasaae yasuubisa abaandu bae. 5Yeremia niyoolayo, yanyoolayo eng'uungu, mani n'akisamo Eyeema ly'Ohubaao hw'Omwaami neende Esanduuku ly'Endagaano, neende alutaari yohunioohisiraho obubbaani, mani niyekalao omulyaango kwaayo. 6Baluwo abaandu baandi abamuloondaho, nibakoonyeresa engira yichiaayo, nae nibahaya ohuyinyoola. 7Yeremia niyasimanya, yaboolobya mani n'aboola ati: “Abuundu ao yahadoong'e n'atamanyihaane ohwoola lu Nasaae yahabuuse alala abaandu bae haandi, mani n'abakwiira esisa. 8Ao mani Omwaami yahekese abaandi abuundu yi biindu ebyo biri. Haandi oluyaali lw'Omwaami neende ebireesi byahabonehe, koti lu byaboneha mu ndaalo cha Musa, haandi koti lu Solomooni yasaba ati Enyuumba ya Nasaae yilabiswe neende oluyaali luli lutyo.”
Engeri yi Solomooni yahusiramo Esidyaalo esyo.
9Ebyandiiko bituboolera bulai bweene biti, Solomooni w'amakesi yayaana esiyaanwa sisaambwa n'alabya Enyuumba ya Nasaae n'amalire ohuyoombaha. 10Koti sa Musa yasaba Omwaami, omuliro mani nikutula muukulu nikusaamba ebiyaanwa bisaambwa, olwo lwosi nilwo lu Solomooni yasaba Omwaami, omuliro nikutula muukulu nikusaamba ebiyaanwa bisaambwa byoosi. 11Musa yaboola ati: “Ebiyaanwa bisaambwa ebyo byaya olwohuba ebiyaanwa biyaanwa hulw'ebyonoono haba sibabilya daawe.” 12Mu ngeri nasilala eyo, Solomooni yesi yahola Esidyaalo sy'endaalo chitaanu-na-chidatu.
Esibiihiro sy'ebitabo sya Nehemia.
13Ebiindu nasilala bino biri mu byandiiko byabiihwa neende mu ebyo bi Nehemia yandikaanga buli ludaalo. Nehemia haandi yataao esibiihiro sy'ebitabo mani n'abuusa ebitabo bidiira hu batuki neende abanabbi, neende ebyandiiko bya Daudi, neende ebbarwa ch'abatuki echidiira hu biindu biyaanirwa Nasaae. 14Mu ngeri nasilala, Yuda yesi yabuusa ebitabo byoosi ebyali nibyasalaana hulw'ebiita byatukwaaho, mani bulaanu huli nabyo buti. 15Mani nimuba nimubidaha, mutume abaandu babaleetere.
Ohulaangwa ohuhusa esidyaalo.
16Koti lu huli aambi ohuhusa Esidyaalo sy'ohulabya Enyuumba ya Nasaae, hubandikiire ohubeekesa. Silai eng'we mweesi muhuse endaalo echo. 17Nasaae niye owawonia abaandu bae boosi, mani n'atukobosera fweesi esyaalo syoolerefu, neende obwaami, neende obulaamisi neende obwoolerefu, 18koti lu yasuubisa mu malako kae. Olwohuba huti Nasaae achia ohutukwiira esisa, haandi achia ohutubuusa hutule buli abuundu yi hwasalaanira mu byaalo byoosi, atute mu Nyuumba yae njolerefu. Olwohuba atwabiine mu bidinyu biingi muno haandi alabiisye Enyuumba yae.
Enjaakisa y'omwandiiki w'esitabo sino
19Ebiindu bidiira hu Yuda Makabbeo neende bamwaanang'ina, neende ohulabiswa hw'Enyuumba hoongo ya Nasaae, neende ohuyaanwayo alutaari yaamwo ohuba enjoolerefu. 20Ohumeeda hweebyo, yalomaloma hu hulwaania Atioko Epifane neende omwaana wae Ewupato, 21neende amahabi maangi abo abalwaana neende esinani ohuwonia Abayudaaya, koti lu baboneherwa ebyo muukulu. Kata ayahaba mbwe bali abadiidi muno, nae bawaamba esyaalo syoosi mani nibeerusamo abateende baangi abalimo. 22Beekobosera Enyuumba ya Nasaae eyali niyimanyihaane mu syaalo syoosi. Banunula esiko sya Yerusalemu haandi nibakobosao amalako kali nikamalirweo. Banyala ohuhola bino byoosi olwohuba Omwaami yabakwiira esisa mani n'abahoonya. 23Bino byoosi Yasoni yabyandiika mu bitabo bitaanu, nae huchia ohuteemaho ohubifwiinyirira alala mu sitabo silala. 24Hubaasa huti ebiindu bino koti lu biri ebiingi, haandi biri mu bitabo biingi, haba sisyanguyira abo abahadahire ohumanya ebibidiiraho. 25Sakira huteemaho ohubona huti binyala ohuhoonya buli muundu odaha ohusoma, haandi byanguyira abo abadaha ohwichulisa, mani byahoonya ababisoma boosi. 26Efwe abeyaanireyo ohubifwiinyiririra alala, omulimo kuno haba simwaangu daawe, nae huli neende ohutubuhiraho oluuya haandi kata sihunyala ohukona endoolo. 27Huli koti omuundu otekeha ohuhola Esidyaalo nae adaha ohusangaasa abaandi. Efwe fwesi olw'ohudaha ohusangaasa abaandu baangi, huchia ohwesimiirisa huhole omulimo kutaali omwaangu okwo. 28Omulimo kw'ohweekesa buli siindu, huchia ohukulehera omwandiiki wataangira, nae efwe huchia ohuta alala mu bwiimbikiti amahuluundu kaamwo. 29Omwoombahi muhuluundu w'enyuumba njaaha ahoyera ohubaasa hu syoombahe syoosi. Nae oyo odiira omulimo kw'ohubaha eraangi abaasa hu huyinyirisa neende engeri yi yinaboneheremo byoong'ene. Olwo lwosi nilwo lu mulimo kweefwe kuli. 30Mulimo kw'omwandiiki wataangira ohutereesa neende ohuberesa obutolitoli bwa buli siindu koti lu syaali. 31Nae oyo obifwiinyirira alala mu bwandiike, ahoyerwa ohufukiirirwa ohukaniaaya mu bwiimbikiti n'atachiire mu biingi muno. 32Bulaanu bi hulomaloome mu humanyisa lehe byaakamire ao. Hahuchaakireo ohulomaloma hu biindu bi huchia ohukaniaayaho. Olwohuba siba esy'obusiru ohulomaloma ebiingi mu manyisa, nae emboosi yeene n'oyiheenga mu bwiimbikiti.
©Bible Society of Kenya, 2019
©Bible Society of Uganda, 2019