2 Makabeewo 1
1
Ebbarwa yandiikirwa Abayudaaya bomu Misiri
1Abayudaaya basyeeng'we bali mu Yerusalemu neende abomu syaalo sya Yudea.
Hwaandiikira Abayudaaya basyeefwe abali mu Misiri.
Hubaheesa, haandi hubadahisa omuleembe.
2Lehe Nasaae abaholere ebiindu bilai, haandi yechulise Endagaano yi yalagaana neende Abburahamu, Yisaka neende Yakobbo, abahalaabani bae beesikwa. 3Lehe Nasaae ababerese eng'we mweesi omwooyo kw'ohumwiinamiraanga mani muholeenge by'adaha neende omwooyo mulai, haandi abeene nimwedahiire. 4Lehe Nasaae ababerese ehabi omwooyo kw'ohumanya amalako kae neende ebilagiro bae, haandi ababerese omuleembe. 5Lehe Nasaae Awuliire ohulaama hweeng'we, abaleheremo ebyonoono byeeng'we, haandi atabafudatiraanga mu biha by'ebidinyu. 6Bulaanu, efwe abali mu Yudea, huli ohubalaamira.
7Mu mwaaka kw'emia ndala neende amahumi kasasaaba neende kitaanu-na-kine (169), Demetirio Wohubiri n'atuka, efwe Abayudaaya basyeeng'we hwabandiikira ebbarwa nihuli mu bidinyu biingi muno ebyatukwaaho mu mwaaka ekyo, Yasoni neende abaandu bae bajeemera abatuki bomu syaalo syoolerefu neende obwaami bwaabwe. 8Basaamba ebiruwa by'Enyuumba ya Nasaae mani nibeeta abaandu babula omusaango. Hwekongooya Omwaami, mani n'awulira amaliro keefwe, nihunyala ohuyaana ebiyaanwa by'ebisolo neende eby'emwo. Hwaadusa amataara komu Nyuumba ya Nasaae, mani nihutaayo emigaati myoolerefu. 9Bulaanu hubekweeda, mubone muti mwiisa oluyaali mu ludaalo lw'Esidyaalo sy'Ebikaali mu mwoosi kwa Kisilefu, mu mwaaka kw'emia ndala neende amahumi kataanu-na-kadatu neende kitaanu-na-kidatu (188).
Ebbarwa yandiikirwa Arisitobbulo
Ohufwa hw'omutuki Atioko
10Efwe Abayudaaya bomu Yerusalemu, neende abomu Yudea, neende oluhiiho luhuluundu, neende Yuda.
Huhwandiikira ewe Arisitobbulo, owomu luya lw'abalaamisi baawulwamo, haandi omweekesa w'omutuki Putoleme, haandi neende eyiri eng'we Abayudaaya bomu Misiri.
Hubaheesa haandi hwabadahisa obulamu bulai.
11Hweebasa Nasaae olwohuba yatuwonia obudinyu bw'amaani buhwalimo, olwohuba yatuhoonya ohulwaania omutuki. 12Nasaae yeerusa mu siko syoolerefu abasuku beefwe. 13Olwohuba omweemeresi waabwe niyoola mu Perisia neende eye elyabonehana koti elitanyala ohunyiingirwa, nae badonyolwa-donyolwamo nibali mu sabo lya nasaae olaangwa ati, Nanea. Abalaamisi ba Nanea nibo ababachirisa mani nibabalyaamo olukwe. 14Olwohuba omutuki Atioko yeecha mu bweyaango obwo neende abeecha bae, mani niyekaadya koti odaha ohudeehya nasaae muhasi Nanea oyo, mani anyale ohuhola obuyiinda bwamwo ohuba koti eehwe. 15Nae abalaamisi bomu sabo lya Nanea nibamala ohutusayo eby'obuyiinda, mani Atioko niyeengira mu sabo neende abasaacha badiidi bali nibeechere nae. Nae nibamala ohwiingiramo sa bati, abalaamisi bomu sabo elyo babeekaliramo. 16Mani nibeekulao olwiiki lweekisa oluli mu sirama, nibahuya Atioko neende abasaacha bali nae amakina, nibabadonyola-donyolamo, mani nibabatemaho emitwe, nibachisukunira abaandu bali nibadoong'ere erwaanyi. 17Nasaae weefwe owasihirisa ababi abo akinisibwe mu biindu byoosi.
Omuliro kusaamba esiyaanwa sya Nehemia.
18Hu ludaalo lw'amahumi kabiri neende chitaanu, mu mwoosi kwa Kisilefu koti lu huchia ohwichulisiraho ohulabiswa hw'Enyuumba ya Nasaae, husibweene hu silai ohubeekesa, mani mwesi munyala ohuhusa Esidyaalo sy'Ebikaali neende Esidyaalo sy'omuliro kwaboneha Nehemia lu yayaana esiyaanwa sisaambwa n'amalire ohwoombaha Enyuumba ya Nasaae neende alutaari.
19Olwohuba mu biha bi bakuuka yeefwe bali nibayirirwa Perisia mu buwaambe, abalaamisi beesa oluyaali mu Nasaae waliwo. Batusa omuliro kuundi hu alutaari yisaambirwaho ebiyaanwa bisaambwa, mani mu bweekisi nibakukisa mu sisima sibulamo amaachi, mani nibehaliirisa bulai yibuleo omuundu onyala ohumanya abuundu ao. 20Nae koti lu syasangaasa Nasaae, emyaaka miingi nichibitireo, omutuki wa Perisia n'atuma Nehemia Yerusalemu. Nehemia n'aboolera abeechuhulu b'abalaamisi bala abali nibakisire omuliro, bakukoonye. Nae nibatweekesa bati haba sibanyoolereyo omuliro, ohumalaho ebiindu biboyu, Nehemia yababoola babidaya ebiindu biboyu ebyo. 21Ebyo byoosi ebyali by'ohusaambwa koti ebiyaanwa bisaambwa nibyamalwa ohutekehwa hu alutaari, Nehemia yaboolera abalaamisi ohwanyusa ebiindu biboyu ebyohu hwi neende hu biyaanwa biriho. 22Nibamala ohuhola batyo, syabitao esiha, mani elyuuba lyali nilibwiihirweho ebireesi, nilitula, omuliro nikubbabbuluha nikusaamba ebyo byoosi ebyali hu alutaari, mani abaandu boosi nibawuka. 23Omuliro nikwali nikusaamba ebiyaanwa bisaambwa, abalaamisi beekongooya, abalaamisi alala neende buli muundu. Yonatani omulaamisi muhuluundu niyeemerera abaandu ohusaba Nasaae. Nehemia neende abaandu baandi nibakobolamo.
Esaala ya Nehemia.
24Nehemia yalaama ati: “Ewe Omwaami, Omwaami Nasaae, Omuloongi w'ebiindu byoosi, niiwe otiisa, ow'amaani neende ow'obwadyeeri haandi oleheramo. Niiwe Omutuki weeng'ene haandi ow'esisa. 25Ewe weeng'ene niiwe omunyala w'ebiindu byoosi, ow'obwadyeeri, ow'amaani haandi oyiindira endaalo choosi. Niiwe owawaabina Yisiraeli mu buli bidinyu. Niiwe owadoola bakuuka yeefwe ohuba abaandu bao bakabuhaane. 26Fukiirira esiyaanwa sisaambwa sino sihuhuberesa mu liita ly'Abaisiraeli boosi. Liinda abaandu bao bawedoolera haandi tuhole hube aboolerefu. 27Buusa alala abaandu beefwe basalaana, lehuula abo abali mu buwaambe mu byaalo by'abateende. Kwiira esisa abo abayirwa bubi haandi abalekeereswa. Leha abateende bamanye bati niiwe Nasaae weefwe. 28Saandya abo abatusaandya-saandya haandi abehuduumbasa. 29Yomiisa abaandu bao mu syaalo syoolerefu koti lu Musa yaboola ati, ochia ohuhola otyo.”
Omutuki wa Perisia awulira ebidiira hu muliro okwo.
30Ao abalaamisi nibeemba enyembo chikinia Omwaami. 31Ebiyaanwa bisaambwa nibyamala ohuya, Nehemia yalagira ati, ebiindu biterere bidoong'ereo babichuhe hu makina mahoongo. 32Nibahola batyo, omuliro mani nikubbabbuluha. Nae omuliro kwohu alutaari yohusaambiraho ebiyaanwa bisaambwa nikwaaduha, kwasimya omuliro kuno. 33Abaandu nibamanya sino, mani nibasiboolera omutuki w'Abaperisia, koti abuundu yi balaamisi bali nibakisamo omuliro kwohu alutaari y'ebiyaanwa bisaambwa nibayirwa mu buwaambe, banyoolao ebiindu biboyu. Nehemia neende abaasye babyehoonyera ohusaamba ebiyaanwa bisaambwa hu alutaari. 34Omutuki niyamala ohuteberesa ebidiira hu sino mani n'amanya ati syadyeeri, yasita olukaka ohwebodoohaniao, mani n'aholao ohuba Abuundu Woolerefu. 35Abuundu ao niweehola ow'obuyiinda buungi muno, mani omutuki n'anyoolangao ebiyaanwa biingi ohutula eyiri abaandu bamuheera. 36Nehemia neende abaasye balaanga ebiindu biboyu ebyo bati “Nefutaari,” amahuluundu mbwe, Ohulabiswa. Nae abaandu bahira obuungi babilaanga bati, Nefuta.
©Bible Society of Kenya, 2019
©Bible Society of Uganda, 2019