Sekaria 4

Ohuboneherwa hw'esiteeni sy'etaara

1Malaika wali n'alomalomaanga naange wula yakobola haandi, mani yaasimusa, koti oyo owali ni ndi ohukona endoolo. 2Yandeeba ati, “Siina syeene esyo syooli ohubona bulaanu?”

Ese naange ndamukobolamo endi, “Ngaandi n'esiteeni sy'etaara sy'esaabbu. Aakulu wasyo yiriyo ebbakuli y'amafuta. Nae hu siteeni sy'etaara esyo, huliho amataara kataanu-na-kabiri, buli litula liriho abuundu w'ohutechaanga etaambi chitaanu-na-chibiri. 3#Hubwi 11:4.Yiriyo emisaala miseituuni kibiri endulo w'esiteeni sy'etaara esyo, buli kutula hu lubeka luundi lwasyo.” 4Ndateeba malaika oyo endi, “Nae ebiindu bino byoosi byeekesa siina syeene, ewe omuhuluundu?”

5Nae yandeeba ati, “Hane ewe haba soomanyire daawe?”

Naange ndamukobolamo endi, “Kata, haba daawe, omuhuluundu.”

Esisuubise sya Nasaae eyiri Serubbabbeli

6Malaika yamboolera ati, “Yino niyo emboosi yitula eyiri Omwaami eyichiira Serubbabbeli, ‘ewe ochia ohunyala ohuyiingira ataali ohwehoonyera amaani k'amaye, oba kata sa amaani kao ewe omweene, nae niwehoonyera Mwooyo waange.’ 7Ebigumusa bihunuufu byaaka koti engulu bicha ohuhamyuuhaangao mu moni wao. Ochia ohunyala ohwoombaha buyaaha Enyuumba ya Nasaae, mani koti lwooba noochia ohuba mbwe otaaho sa oti ekina limaliiriha abuundu yi lihoyere ohuba, abaandu bachia ohuchaaka ohwehuuma sa abeene nibaboola bati, ‘Embabaasi, embabaasi cheene!’ ”

8Haandi emboosi yiindi yaanjichira niyitula eyiri Omwaami. 9Yamboolera ati, “Serubbabbeli yayaba omusiingi kw'Enyuumba ya Nasaae, mani haandi niye ochia ohumaliirisa ohuyoombaha. Nae nibyoola ao, niwo yi baandu baange bachia ohumanyira bati hane niise omweene owahutuma yi bali. 10#Esir 5:2. #Hubwi 5:6.Oyo yeesi olekeeresa oludaalo lw'ebiindu bidiidi yahasangaale, haandi lwahoole oludaalo luundi yaabona Serubbabbeli n'adiirire ebbirigi n'achiiririra ohwoombaha Enyuumba ya Nasaae.”

Malaika wuno yamboolera ati, “Amataara kataanu-na-kabiri ako, nichio emoni chitaanu-na-chibiri ch'Omwaami, echibona buli abuundu woosi hu syaalo huno.”

11 # Hubwi 11:4. Haandi syeesi mani ndamuteeba endi “Siina syeene si misaala miseituuni kibiri ekiri hu buli lubeka w'esiteeni sy'etaara kyeekesa? 12Haandi endi mahuluundu siina akali mu masaga k'emituli kabiri ako akali embeka wa enjehe ch'esaabbu chibiri chi mafuta k'emiseituuni kali ohwiidihaangamo?”

13Nae omweene oyo yandeeba ati, “Hane ewe haba soomanyire daawe?”

Naange ndamukobolamo endi, “Kata, ese haba siimanyire, ewe omuhuluundu.”

14Mani n'aboola ati, “Bano nibo abasaacha babiri abo ba Nasaae mweene yedooleramo mani yaabachuhaho amafuta n'abeehasa ohumuhalaabaniraanga, oyo Omwaami w'esyaalo sino syoosi.”

Currently Selected:

Sekaria 4: SAMIA

Highlight

Copy

Compare