Sekaria 5
5
Ohuboneherwa hw'Olupapula lusiriingise nilubburuuhe
1Haandi ndeecha ndaatingaala, nae bulaanu ehabi lino ndabona olupapula lusiriingiswe nilubburuuhe niluleraalera aakulu mu bbaanga. 2Malaika oyo yandeeba esiindu si ndali nimbweeneho. Ese naange ndakobolamo endi, “Ngaandi olupapula lusiriingise nilubburuuhe mu bbaanga; lwali niluli emiita chitaanu-na-chine obuleeyi, nae chine neende esituundu obubaambali.” 3Malaika oyo yamboolera ati, “Mani hu bweene ohwo hwandiikirweho esibwaabo sichia ohulaanda simale esyaalo sino syoosi. Hu lwaande lulala olw'olupapula olwo, obwandiike buboola buti buli mwiibi yeesi achia ohweeywa amalwe mu syaalo muno mwoosi; nae hu lwaande luundi obwandiike buboola buti, buli muundu yeesi owechuba naabacha sa yesi achia ohweeywa amalweo. 4Omwaami w'Obunyala bwoosi aboola ati achia ohutuma esibwaabo sino sisalaane, mani sinyale ohwiingiraanga mu buli nyuumba y'omwiibi yeesi, haandi neende mu nyuumba y'oyo owechuba naabacha. Sicha ohudoong'aanga mu nyuumba chaabwe mani sichileheenge nichiri amakuunda sa.”
Ohuboneherwa hw'omuhasi oli mu simweero
5Haandi malaika wula yakobola ehabi liindi mani yaboola ati, “Ewe obweeneho! Esiindu siindi haandi siri ohwiichayo!”
6Naange ndamuteeba endi, “Siina syeene haandi?”
Nae yangobolamo ati, “Ngaandi simweero nisyo, nae syeekesa esyonoono sy'esyaalo sino syoosi.”
7Esimweero sino syaliho esifuuniho syaholwa mu sibya syoomeranu. Nae koti lu ndali ni ndi ohutingaalaanga, esifuuniho esyo syafuunulwa, mani ndaabona mukati nimwiihaalwemo omuhasi!
8Malaika oyo yaboola ati, “Sino syeekesa obwonooni.” Mani yaafwiinyirira omuhasi oyo mu simweero omwo yaafuunihaho esifuuniho esyo. 9Ndeecha ndaatingaala aakulu mani ndaabona abahasi babiri nibali ohubburuha aakulu nibeechera yi ndi neende embaya nyaangalafu muno koti ech'awudu. Bayuulao esimweero esyo mani nibabburuha nasyo nibawaao.
10Ndateeba malaika oyo endi “Abo bali ohusiyira yeena bweene?”
11Nae yakobolamo ati, “Ngaandi mu Bbabbilooni, yibachia ohusyoombahira enyuumba ya nasaae yasyo. Enyuumba ya nasaae eyo niyiba niyiweere esimweero esyo sichia ohuteebwamo mani siinamirweenge.”
Currently Selected:
Sekaria 5: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
