Abarooma 13

Ebidahibwa ohuholera abatuki

1Buli omuundu ahoyere ohuwulira abatuki b'esyaalo, olwohuba bubulao obunyala bw'obutuki bwoosi obutatula eyiri Nasaae, haandi abatuki baliwo boosi Nasaae niye owabataao. 2Buli muundu oyiingania obutuki buliwo, aba ali ohuyiingania esiindu si Nasaae yataao; haandi buli muundu ohola atyo, achia ohweleetera omusaango omweene. 3Olwohuba abaandu bahola ebiindu bilai, haba sibatya batuki, ohumalaho abahola-mbi nibo ababatya. Odaha ohuba omuundu otatya abatuki? Mani hola ebilai, mani bachia ohuhufumia, 4olwohuba abatuki abo, bahalaabani ba Nasaae, hulw'obulai bweeng'we. Nae nimwonoona mubatye, olwohuba bali neende obunyala bw'ohusaandya abonooni. Abatuki abo bahalaabani ba Nasaae, mani booseresa ohusaandya hwa Nasaae eyiri abahola-mbi. 5Hulw'esifune sino, buli muundu ahoyere ohuwulira abatuki ataali ohutya ohusaandisibwa hwa Nasaae, nae koti ebibaaso by'omwooyo kwae bimweekesa.

6 # Mat 22:21; Mrk 12:17; Luk 20:25. Esyo syosi nisyo esikera nimutooya emisolo olwohuba abatuki bahalaabanira Nasaae, nibaba nibooseresa emirimo kyaabwe. 7Mani mutuunge bi muhoyere ohubatuunga; mubatuunge emisolo kyeeng'we abeene neende emisolo ki bata hu biindu byeeng'we, haandi mubaticheenge neende ohubeesamo boosi oluyaali.

Ebidahibwa ohuholera abaandu basyeeng'we

8Mutabechaanga neende ekobi eyiri omuundu yeesi, ekobi li muhoyere ohuba nalyo nilyo ely'ohuheeranaanga. Omuundu yeesi owuheera owaasye, oyo aba yooseresa amalako. 9#Hut 20:14; Amal 5:18; Hut 20:13; Amal 5:17; Hut 20:15; Amal 5:19; Hut 20:17; Amal 5:21; Lef 19:18. Amalako kaboola kati, “Otahola obucheke; oteetaanga; otebaanga; otekoombaanga ebiindu by'omuundu wuundi.” Amalako kano koosi, neende akaandi kadoong'ereo, kabuusibwa mu lako lala liti, “Heeraanga owaasyo koti lu weeheera omweene.” 10Omuundu yeesi owuheera owaasye, siyahamuhola esibi. Sakira ohuheerana nihwo ohwooseresa amalako koosi.

11Muhoyere ohuhola sino, olwohuba mumanyire muti ebiha byeeng'we by'ohusimuha byoolere. Olwohuba ebiha bi huhoyeere ohuwonisiribwamo, bisuudire aambi ohuhira koti lu hwachaaka ohufukiirira. 12Esiro siri aambi ohuwa, haandi obwiire buli aambi ohuhya. Sakira lehe hulehe ohuhola ebiindu byomu siirima, mani hubukule ebilwaaniro by'obulafu. 13Lehe hube neende ebiima bilai, ebihoyera abaandu bamenya mu bulafu bw'esideete, ataali ohusangaasa emibiri, oba ohumeera, ataali obucheke oba obuyirani, ataali ohulwaana oba ebihali-hali. 14Ohumalaho, mwefwaale Omwaami Yesu Kristo, mani mutaberesaangaho emibiri kyeeng'we obweyaango bw'ohwonoona bi kyekoomba.

Currently Selected:

Abarooma 13: SAMIA

Highlight

Compare

Copy