Abarooma 14

Mutaheengeraanga abaandi emisaango.

1 # Kol 2:16. Mwakaanireenge abasyeeng'we bakata mu fukiirira, haandi mutayiinganaanga nabo ebidiira hu mbaasa yaabwe. 2Abaandu baandi, efukiirira yaabwe yibakanya ohulya buli siindu, nae abaandu b'efukiirira ngata bafukiirirwa ohulya elyaani lyoong'ene. 3Omuundu olya buli siindu syoosi s'ahoyere ohulekeeresa omuundu otahola atyo; haandi omuundu olya elyaani lyoong'ene yesi haba s'ahoyere ohuheengera omusaango omuundu olya buli siindu olwohuba Nasaae yamala ohumufukiirira. 4Ewe niiwe naanu oheengera omuhalaabani w'omuundu wuundi omusaango? Omwaami wae mweene niye onyala ohuheengao nikali mbwe bi muundu oyo ahola bilai, oba sibihoyera. Haandi achia ohuhola ebilai, olwohuba Omwaami ali neende obunyala bukera naahola ebilai.

5Abaandu baandi babaasa bati oludaalo luundi luhira endaalo chiindi obulai, nae abaandi babaasa bati endaalo choosi chakanaakana. Buli muundu hweefwe ahoyere ohwomiisa ebibaaso byae byeene. 6Abaandu babaasa bati oludaalo luundi luhira endaalo chiindi, bahola batyo hulw'ohuberesa Omwaami oluyaali; abaandu balya buli siindu, bahola batyo hulw'ohuberesa Omwaami oluyaali, olwohuba beebasa Nasaae hulw'ebyoohulya ebyo. Abaandu bahaya ohulya ebyohulya biindi, bosi bahola batyo hulw'ohuberesa Omwaami oluyaali, haandi beebasa Nasaae. 7Abulao omuundu yeesi hweefwe oliwo hulwae yeeng'ene, haandi abulao omuundu yeesi ofwa hulwae yeeng'ene. 8Nihuli abalamu, huliwo hulw'Omwaami, haandi nihufwa, hufwa hulw'Omwaami. Sakira oba huli abalamu oba hufwa, fweesi huli ab'Omwaami. 9Olwohuba Kristo yafwa haandi yaasyuuha hwaanyale ohuba Omwaami w'abaandu balamu, neende abafwa. 10#2 Kor 5:10. Bulaanu eng'we abalya elyaani lyoong'ene, lwasiina muheengera abasyeeng'we omusaango? Haandi eng'we abalya buli siindu, lwasiina mulekeresa abafukiiriri baandi? Olwohuba efwe fweesi huchia ohweema mu moni wa Nasaae atuheengere omusaango. 11#Yis 45:23. Olwohuba ebyandiiko byoolerefu biboola biti,

“Omwaami aboola ati, koti lu ndi Nasaae mulamu,

buli muundu achia ohusigama mu moni waange,

haandi buli muundu achia ohutuumbula ati niise Nasaae.”

12Sakira buli muundu yeesi hweefwe, achia ohwewosaho eyiri Nasaae ebidiira hu bulamu bwae.

Otakeraanga abaasyo bakwa

13Mani sakira lehe hwaakame ohuheengeraanga abasyeefwe omusaango. Ohutusaho, huhoyere ohutaholaanga esiindu syoosi esinyala ohukera abasyeefwe beegumula oba bakwa mu syonoono. 14Nindeyaambaniisye alala neende Omwaami Yesu, sino sikera nimanya elalira obwadyeeri endi, sibulao esyohulya koti esyohulya esyeene esiriho omusiro; nae omuundu n'abaasa ati, biluwo ebyohulya bibi, ao mani nisyeehola esibi yaali. 15Niwelalihirisa abaasyo hulw'ebyoohulya by'olya, ao haba sooba n'osihola ohweema hu huheerana. Otakeraanga ebyohulya by'olya binyaasa omuundu yi Kristo yafwiira! 16Otakeraanga esiindu sy'obukula ohuba esilai syanyoola eliita bi. 17Olwohuba obwaami bwa Nasaae haba sibuli sa hu byohulya oba eby'ohung'wa, nae buli hu buluungifu, omuleembe, neende esangaalo li Mwooyo Mwoolerefu aberesa. 18Mani n'ohalaabanira Kristo mu ngeri yino, osangaasa Nasaae haandi abaandu baandi bosi bahusiima.

19Sakira buli siha huhoyere ohuchiiririraanga neende ebiindu bileeta omuleembe, haandi ebituhoonya efwe abeene ohugumisania. 20Mutanyaasa omulimo kwa Nasaae hulw'ebiindu bidiira hubyoohulya. Ebyohulya byoosi binyala ohuliibwa, nae sisihoyera ohulya esiindu si nyala syaakera omuundu wuundi yaakwa mu syonoono. 21Esiindu sihoyera ohuholwa nisyo, ohulehana neende ohulya enyama, ohung'wa amalwa oba ohuhola esiindu syoosi esinyala syaakera abafukiiriri baandi baakwa. 22Mani ewe diira efukiirira yao eyo koti lu mweene womiisa mu moni wa Nasaae. Bali neende ehabi abo abateheengera mu mwooyo omusaango nibahola esiindu si bamanyire bati sihoyera. 23Nae nibali neende ohukana-kana ebidiira hu biindu bi balya, Nasaae achia ohubaheengera omusaango nibalya ebiindu ebyo, olwohuba esiholwa syaabwe haba sisiba nisyeema hu fukiirira. Haandi esiindu syoosi esiteema hu suubira syonoono nisyo.

Currently Selected:

Abarooma 14: SAMIA

Highlight

Compare

Copy