Abarooma 12

Obulamu bw'ohuhalaabanira Nasaae.

1Basyaange, ohweema hu sisa siingi si Nasaae yatudiirira, mbekweeda nimboola endi: Muweeyo emibiri kyeeng'we eyiri Nasaae kibe koti esiyaanwa silamu, esyoolerefu, haandi esisangaasa Nasaae. Ohwo nihwo ohwiinamira Nasaae hwomu mwooyo hu muhoyere ohumuberesa. 2Ebiima byeeng'we muleheenge ohubifwaanania neende eby'abaandu bohu syaalo, ohutusaho mukaluuhane munyoole ebibaaso biyaaha. Ao muchia ohunyala ohumanya ebyo bi Nasaae adaha ebilai, ebimusangaasa haandi ebyoolerefu by'elalira.

3Nae ohweema hu mbabaasi chi Nasaae yaamberesa koti esiyaanwa, mboolera buli muundu hweeng'we endi: Otabaasaangaho oti oli aakulu ohuhira koti lu oli. Ohutusaho, ba omuyenjeefu mu bibaaso byao, haandi buli muundu hweeng'we yeyire ohuloondakana neende efukiirira yi Nasaae yamuberesa. 4#1 Kor 12:12. Huli neende ebituundu bikabuhaane hu mubiri mulala, haandi buli situundu siri neende omulimo kwaasyo. 5Mu ngeri nasilala, kata hwahaba nihuli abaangi, huli omubiri mulala mu Kristo, haandi fweesi hwambaanisibwa alala koti ebituundu bikabuhaane by'omubiri mulala. 6#1 Kor 12:4-11. Mani sakira huhoyere ohwehoonyera ebiyaanwa bitaali nasilala ohweema hu mbabaasi chi Nasaae yatuberesa. Esiyaanwa syeefwe nisiri esy'ohulomaloma emboosi ya Nasaae, lehe husyehoonyere ohweema hu fukiirira yi huli nayo; 7nisiri esy'ohuhalaabana, leha huhalaabane; nisiri esy'ohweekesa leha hweekese, 8nisiri esy'ohugumia abaandu baandi, leha hubagumie. Oyo yeesi okaba leha akabe neende omwooyo mulala; oyo yeesi oli neende obunyala leha ahole neende amaani; oyo yeesi okwiira abaandu esisa leha ahole atyo neende esangaalo.

9Obuheeri bweeng'we buhoyere ohubechaanga obw'obwadyeeri bweene. Muhaye esibi, nae mwomiirire hu silai. 10Heeraneenge neende emyooyo misangaafu koti abeebulanwa mu Kristo, haandi becheenge abeetekefu ohwiisaniamo oluyaali. 11Muhole emirimo neende amaani, haandi mutaba abakata. Muhalaabanire Omwaami neende emyooyo kyeeng'we kyoosi. 12Lehe esuubi lyeeng'we libabeerese esangaalo, mube abaandu beesimiirisa mu bidinyu byeeng'we, haandi mwekongooyeenge buli siha. 13Kabaneenge ebiindu byeeng'we neende Abakristo bamanani basyeeng'we, haandi bukaanireenge abakeni mu madaala keeng'we.

14 # Mat 5:44; Luk 6:28. Musabe Nasaae abereseenge ehabi abo ababalwaania. Mubwadyeeri bweene, mumusabe aberese abaandu abo ehabi ataali ohubaberesa ebibwaabo. 15Musangaalireenge alala neende abo abali mu sangaalo, haandi mulireenge neende abo abali ohulira. 16#Eng 3:7. Muchuunirweenge buli muundu ataali ohukwiira abaandi. Mutehudumbasaanga, ohutusaho mufukiirireenge emirimo kyoosi kata kyahaba eky'aasi.

17Omuundu yeesi n'abaholera esibi, mutamutungaanga nimumuholera esibi mwesi. Muteemeho koti lu munyala ohuhola esiindu si buli muundu abona ati silai. 18Muteemeho koti lu sinyalihana, ohubona muti, muli neende omuleembe neende buli muundu. 19#Amal 32:35. Basyaange, omuundu yeesi n'abaholera esibi, mutetuungaanga nimumuholera esibi mwesi, ohutusaho leheenge etima lya Nasaae lyeene limutuunga. Olwohuba ebyandiiko byoolerefu biboola biti, “Omwaami aboola ati, njia ohuholera esibi oyo owuholera esibi, njia ohwetuunga.” 20#Eng 25:21,22. Ohutusaho, koti lu byandiiko byoolerefu biboola biti: “Enjala niyiluma abasuku beeng'we, mubabereseenge esyohulya; obuluwo nibubaluma, mubabereseenge esyohung'wa; olwohuba nimuhola mutyo, ao muba muchia ohukera esoni nyiingi chibadiire.” 21Mutakanyaanga esibi ohubatuka; ohutusaho, muyiingireenge esibi nimuhola ebilai.

Currently Selected:

Abarooma 12: SAMIA

Highlight

Compare

Copy