Engaado 30
30
Emboosi cha Aguri
1Emboosi cha Aguri, omwaana wa Yaake owa Maasa,
bi yaboolera Yityeeli,
eyiri Yityeeli neende Wukali, ati:
2Mubwadyeeri bweene, niise omuundu ohiramo obusiru.
Haandi mbulamo amakesi k'omuundu.
3Haba sinjekaanga amakesi,
oba ndamanya ebidiira hu Nasaae.
4Wiina mweene owali naniinire muukulu mani yeeha aasi n'atulayo?
Wiina mweene owali n'afumbaate emboo mu syaaba syae?
Wiina mweene owali n'aboyere amaachi mu ngubo yae?
Wiina mweene owali n'atereo enjaho ch'esyaalo?
Eliita lyae, niye wiina, haandi eliita ly'omwaana wae, nilyo naanu?
Mubwadyeeri nooba n'omanyire!
5Nasaae yoseresa buli siindu sy'asuubisa;
haandi Nasaae niye engabo yiliinda abo abamwesika.
6Otameedaanga emboosi chao chiindi hu mboosi chae,
hu ahaye ohuhwoolobya, mani yekesa alafu obubacha bwao.
Engaado Chiindi
7Ewe Nasaae, husaba ebiindu bibiri,
obimberese nisisiiri ohufwa:
8Tusireho elalira obutaali obwadyeeri neende obubacha;
Otambechaanga obumanani noomba obuyiinda;
nae mbereseenge ebyohulya neende ebyohwehoonya bi ndaha.
9Ataali ao njia ohwikuta muno, mani hwekaane,
mani ndeebe endi, “Nasaae niye wiina?”
Ataali ao njia ohuba omumanani, mani njibe,
haandi nyaase eliita lya Nasaae waange.
10Otalomalomaanga bubi hu muhalaabani eyiri omwaami wae,
ataali ao ohuhubwaaba, mani omusaango kuhuhire.
11Baliwo ababwaaba balaata yaabwe
haandi baahaya ohuberesa bang'inaabwe oluyaali.
12Baliwo abo abeene ababaasa bati boolerefu nibo
nae bali neende ebyonoono bi bahoyeere ohweyolobya.
13Baliwo abaandu baandi abeene abebona bati b'akulu muno,
haandi ababaasa bati b'akulu muno ohuhira abaandi boosi.
14Baliwo abo abehoonyera obwaalaba,
abo, ameeno kaabwe kali koti amahaande,
abetekeehe ohumalao abamanani hu syaalo,
ab'obudahano ohutula hu syaalo.
15Ohwekoomba huli neende emboosi chibiri choong'ene,
eyitaangira, “Mberese,” haandi eyohubiri, “Mberese.”
16Echo nicho emakoombe, neende omuhasi mukuumba,
esyaalo syoomu esibulamo efula,
neende omuliro kutaakama.
17Emoni ch'omuundu abisa emoni mu simwana
neende ech'oyo olekeeresa ng'ina
hoyerwa ohuchomolwaho
mani engosya chaachirya.
18Biliwo ebiindu bidatu ebiihira ohumanya;
mubwadyeeri bweene, biliwo bine bitaamanyire:
19engeri yi eeswi yibburuhiramo aakulu,
engeri yi njuha yehuruudisiramo hu lwaanda,
engeri yi meeri yinyoola engira yaayo mu nyaanja,
neende engeri yi buheeri buchaakira akatikaati w'omusaacha neende omuhasi.
20Yino niyo engeri y'omuhasi mucheke:
alya, mani yamala yesimuula hu munwa,
mani yaboola ati, “Sibulao esiindu si holere.”
21Biruwo ebiindu bidatu ebiteengya esyaalo;
biruwo bine bi syaalo sitanyala ohwesimiirisa:
22omuwaambe niyeehaswa ohuba omutuki,
omusiru naaba neende buli siindu sy'adaha;
23omuhasi musyuule n'anyoola omusaacha,
haandi omuhasi omuhalaabani onyuula omuyiinda wae omusaacha.
24Hu syaalo huliho ebiindu bine ebidiidi,
nae ebiri neende amakesi maangi muno:
25amake, kabula amaani
nae keebiihira ebyohulya bi kanaalye mu siminyu;
26ojiibo bwosi obutali neende amaani,
nae bone, bweyoombahira obumenyo mu makina;
27esike chibula omutuki,
nae chihuumbira mu mukaanda;
28embaakala nyaangu ch'ohudiira mani waachita mu mahono kao,
nae chimenya mu madooho k'abatuki.
29Biriwo ebiindu bidatu ebihuumba mani wekoomba;
biri bine ebikeenda nibihuumba:
30edalang'i eyihira ebisolo byoosi amaani
haandi sibulao esisolo siindi siyitya;
31embwa nyiimi, embusi hole,
ekulukulu daaywa, neende omutuki ohuumba niyeemirira abaandu bae.
32Nooba n'oholaanga eby'obusiru, omweene niweehuduumbasa,
oba nooba n'obasaanga ohuhola ebibi,
owuleraanga mberi mani obaasa.
33Olwohuba n'osacha amabeere, nonyoola amafuta,
n'ofwiinya amoolu, ni omujusi kudoonya,
haandi n'osangulula etima, n'otusamo obusoolo.
©Bible Society of Kenya, 2019
©Bible Society of Uganda, 2019