Engaado 31
31
Ohukerakira Omutuki
1Emboosi cha Lemueli, omutuki wa Masa, chi ng'ina yamweekesa:
2Siina, mwaana waange w'obusyaani? Siina mwaana waange w'obusyaani yindebula?
Siina, mwaana waange w'obusyaani yindeyamira eyiri Nasaae?
3Amaani kao otakamaliraanga hu bahasi,
basihirisa kata abatuki.
4Ewe Lemueli, haba sisihoyera abatuki,
sisihoyera abatuki ohung'wa amalwa,
oba abaami ohwekoomba buli siindu simeesa;
5ataali ao bachia ohung'wa mani beebirire amalako,
mani beebirire ohuheengera abafwiinyirirwa omusaango bulai.
6Amalwa kaberesa omuundu odaha ohusihirira,
neende efiini abo abali mu ngisa;
7lehe bang'we mani beebirire obumanani bwaabwe,
mani beebirire elalira engisa yaabwe.
8Lomalomeraanga banaambula-buchiiro,
lwaniliraanga abataali neende ababakayirira.
9Balomalomereenge, haandi heengaanga emisaango mu buluungifu,
owabineenge abamanani neende abali mu budahano.
Omuhaaye oyera
10Wiina mweene onyala ohunyoola omuhaaye oyera?
Omuhaaye ofwaana atyo w'engaanga muno ohuhira amakina k'engaanga.
11Wamwe amweesika,
haandi achia ohunyoola amagoba maangi.
12Omuhasi oyo, mu bulamu bwae bwoosi,
ayira wamwe bulai haandi samuleetera obudinyu bwoosi daawe.
13Akoonya obwooya bw'amakoondi neende epaamba,
mani yaasona engubo naali neende esangaalo.
14Ali koti emeeri ch'abachurusi,
ebyohulya byae abitusa eyale muno.
15Asimuha echuli muno obwiire nibusisiiri ohuhya
mani n'atekehera abomu ngo wae ebyohulya
haandi yeekesa abahalaabani bae bahasi esy'ohuhola.
16Abona abuundu wohumenya mani yaakulao;
mani yehoonyera eseende chae yataakamo emisabbiibbu.
17Ahola emirimo neende esinani
niyehoonyera amahono kae.
18Anyoola engaanga mu buli siindu sy'ahola.
Ahola emirimo kata esiro, mani etaara lyae haba sirisima daawe.
19Omweene yeeruhira obuwuusi bwae,
mani yasona engubo chae neende amahono.
20Akwiira abamanani esisa mani yakabulira,
haandi ahoonya abali mu budahano.
21Kata emboo yibeeho, haba saatya,
olwohuba abomu daala lyae abafwaasa engubo ndai.
22Omweene yesonera amasuuka k'ohwaala hu buliri;
haandi yefwaala engubo chinyirira muno.
23Wamwe amanyihaane bulai muno,
niyehaale alala neende abahuluundu bomu siko baasye.
24Omuhasi oyo asona engubo mani yaachikusa;
asona neende esiroonyo mani yachikusa abachurusi.
25Engubo chae nyomu haandi ch'oluyaali,
haandi haba saatya ebichia ohukwaao.
26Alomaloma eby'amakesi,
haandi akeraka neende esisa.
27Aliinda bulai abomu daala lyae,
haandi saahola emirimo neende okusinye.
28Abaana bae beema mani baboola bati, ng'ina yeefwe w'ehabi;
kata wamwe yesi amukinia n'aboola ati:
29“Abahasi baangi balai nibo,
nae niiwe obahiramo boosi.”
30Esiiso sibachirisa, haandi ohuboneha bulai hukotao,
nae omuhasi wiisa oluyaali mu Omwaami afumiswa.
31Oyo muberese ebiindu byaahalaabaniire,
haandi leha abaandu boosi bamuberese oluyaali.
©Bible Society of Kenya, 2019
©Bible Society of Uganda, 2019