Engaado 29
29
1Omuundu yi boolobya buli lu aholere esibi, mani yaasyomeraho,
ludaalo luundi yahanyoole n'atamanyire, mani abuleo omuundu omuwonia.
2Abaandu baluungifu nibali mu bunyala, abaandu ba buli ludaalo basangaala;
nae abahola-mbi nibatuka, abaandu bekanyiirisa.
3Oyo odaha amakesi asangaasa laatang'ene,
nae oyo aba alala neende bamalaaya, amalao emyaandu chae.
4Omutuki oheenga emisaango mubwadyeeri, aleetera esyaalo syae omuleembe,
nae oyo odaha akuliirirwa, asihirisa esyaalo syae.
5Omuundu okinia-kinia owaasye n'amubacha
aba amuteka omuteego.
6Omuhola-mbi adiirirwa mu bibi byae byeene,
nae omuluungifu asangaala niyeemba.
7Omuundu mulai amanyire ebiindu bi bamanani bahoyerwa ohunyoola;
nae omuhola-mbi haba sadeebayo.
8Abaandu batachuunirwa abasyaabwe banyala ohukwiisa esiisi mu siko,
nae abaandu bakesi bamalao obwaalaba.
9Omuundu w'amakesi n'ayiingana neende omusiru,
omusiru anyoolera haandi yaacheha, mani yaleeta esiyoka.
10Abaandu baheera muno ohutemula haba si badaha omuundu otaliho omusaango,
nae abaandu baluungifu bateemaho muno ohuwonia obulamu bwae,
11Omusiru yekesa etima lyae lyoosi,
nae omuundu mukesi mudiira kaala niye haandi saanyolera bwaangu.
12Omutuki n'atekeeresa eby'obubacha,
abachweenufu bae boosi bachia ohuba ababacha.
13Omumanani neende oyo omufwiinyirira boombi bali neende esibayambaania;
boombi Omwaami niye obaberesa obulafu mani baabona.
14Omutuki n'aheenga emisaango ky'abamanani mubwadyeeri,
obwaami bwae buchia ohuyiindira endaalo choosi.
15Ohukolola neende ohwolobya byeekesa,
nae omwaana olehwa sa adiisa ng'ina esoni.
16Abahola-mbi nibaba mu bunyala, ohwonoona hwemeeda;
nae abaluungifu bahabone ohusihirira hwaabwe.
17Kolola omwaana wao, mani yahahuberese omwehoyo;
haandi yahahuleetere esangaalo.
18Esyaalo sitemererwa neende Nasaae, sibulamo esiindu silai,
nae bali neende ehabi abo abaliinda amalako.
19Omuhalaabani haba s'akololwa neende emboosi choong'ene,
olwohuba, kata yahaba omuwuliri, haba saachia hutaaho esira.
20Omuundu musiru yahabaaho neende esiindu sy'omusuubiramo,
ohuhira omuundu webwangula neende emboosi.
21Oyo oberesa omuhalaabani wae buli siindu sy'adaha ohutula mubuyere bwae,
luunyuma yahenyoole ati s'anyala ohumutuka.
22Omuundu w'etima asiingisa obusoolo,
haandi omuundu odaha ohunyoolera buli siha ahola ebibi.
23Omuundu weniinia yaheswe aasi,
nae omuloonga mu mwooyo yahanyoole oluyaali.
24Oyo okeenda neende omwiibi, asyuula obulamu bwae bweene,
kata bahamubwaaba batye, nae haba s'atuumbula obwadyeeri.
25Oyo otya sa bi baandu bamubaasira, yesukuna mu bidinyu,
nae oyo owesika Omwaami, aba mu muleembe.
26Aliwo abaandu baangi muno abadaha abatuki babadahe,
nae Omwaami niye okera abaandu banyoola obwadyeeri.
27Omuundu mubi asyuula omuundu muluungifu,
nae ow'esaambo ndai asyuula omuundu mubi.
©Bible Society of Kenya, 2019
©Bible Society of Uganda, 2019