Engaado 28
28
1Abahola-mbi beeruha naabulao omuundu oboongaho,
nae abaluungifu bagumu koti edalang'i.
2Esyaalo nisihayuha, siba neende abatuki baangi;
nae nisinyoola omutuki w'amakesi haandi mumanyirifu
nisilyooya mani syaaba neende omuleembe.
3Ow'obunyala ofwiinyirira abamanani,
ali koti efula yo muyaka eyisihirisa ebyohulya.
4Abo abateesa oluyaali mu malako bafumia abahola-mbi;
nae abo abadiira amalako abalwaania.
5Abaandu babi haba sibamanyire obwadyeeri,
nae abo abeesa oluyali mu Omwaami bamumanyiire elalira.
6Silai ohuba omumanani nooli omweesikwa
ohuhira ohuba omuyiinda nae oli omudondobanu mu bulamu bwao.
7Omwaana odiira amalako mukesi niye,
nae omwiicha w'omuundu wokuliira adiisa laatang'ene esoni.
8Oyo onyoola engaanga naseera abaasye,
obuyiinda bwae abubuusira oyo okwiira abamanani esisa.
9Oyo otawulira amalako,
kata ohwekongooya hwae Nasaae ahwebwaaba.
10Oyo obachirisa omuundu muluungifu yaakera yahola esyonoono
omweene yahakwe mu buko buyayaba;
nae abaandu bataaliho omusaango, bahanyoole ebiindu bilai.
11Omuyiinda abaasa buli siha ati mukesi niye,
nae omumanani mumanyirifu amufuumbula.
12Omuundu muluungifu n'anyoola obunyala, esangaalo liingi libaao;
nae nibahusa omuhola-mbi, buli muundu niyeekisa.
13Oyo okisa ebibi bi yahola haba saacha huba bulai,
nae oyo obituumbula mani yabisyuula achia ohukwiirwa esisa.
14Oyo owiisa oluyaali mu Omwaami buli siha, w'ehabi niye,
nae ojeemera Omwaami, yahanyoole amasira.
15Omutuki mubi otuka abamanani,
ali koti edalang'i yiwuluhuma oba koti enani lyedeeya ohukwa hu siindu.
16Omutuki otadeeba hu baandu aba omwalaaba;
nae oyo otadaha obulyaanga, achia otuka emyaaka miingi.
17Omuundu n'ahola omusaango kw'ohwiita owaasye,
lehe bamweyaabe ohwoola lu yahafwe;
haandi leha abuleo omuundu omuhoonya.
18Oyo ohola ebiindu by'obweesikwa yahawone,
nae oyo ohola eby'obudoondobanu yahamalweo bwaangu.
19Oyo olima eloba lyae yahabe neende ebyohulya biingi muno,
nae oyo omala ebiha byae alala neende abakata, yahabecheenge omumanani.
20Omuundu mweesikwa alinyoola ehabi nyiingi,
nae oyo ong'ang'abanira obuyiinda, haba siyahahaye ohusaandisibwa.
21Ohweekesa oti wehubbira-hubbira sibi nisyo;
nae abaheengi b'emisaango baandi bahola esibi hu banyoole asowa ndiidi.
22Omuundu mwiimani, ayuyuhanira emyaandu,
mani yahaya ohumanya ati obudahano bwahamwooleho.
23Oyo okolola owaasye naaholere esibi bahamusiime luunyuma
ohuhira oyo omukinia-kinia.
24Oyo owiiba ebiindu bya laatang'ene oba ebya ng'ina
mani yaboola ati, “Yibulao omusaango,”
ali silala neende omuundu osihirisa.
25Oyo olaluhanira ebiindu aleeta obusoolo,
nae oyo owesika Omwaami achia ohunyoola ehabi.
26Oyo owesika ebiindu bi abaasa, musiru niye;
nae oyo oloondakana neende bibamwekeese by'amakesi achia ohuwona.
27Oyo okabiraho abamanani, haba siyahahaywe esiindu sy'adaha,
nae oyo owekisa nabweene abamanani, abaandu baangi bahamubwaabe.
28Abaandu babi nibaba mu bunyala, abaandu babeekisa, nae nibatula hu bwaami, nae abaluungifu bemeeda haandi.
©Bible Society of Kenya, 2019
©Bible Society of Uganda, 2019