Engaado 27
27
1 #
Yak 4:13-16. Otefumiaanga hu binabeeo muchuli,
olwohuba okoterwe ebinakweeo muchuli.
2Lehaanga abaandu baandi, kata abateende bahufumia,
nae ewe omweene otefumiaanga.
3Ekina neende omusenye bisito,
nae obudinyu bu musiru akwiisao busito ohuhiraho byoombi.
4Egiili neende etima byaalaba nibyo haandi bisihirisa;
nae haba sobikerania hu mbaliha.
5Oyo ahuboolera obuhyaamu bwao mani yaahaya ohubuhukisa,
ahira oyo ahukisa naadaha ohuhweekesa ati ahudaha.
6Wesike omwiicha wao ohwoolobya,
nae haba otesika omusuku wao ohukinia.
7Nooba niwikuute, onyala ohusinyiha obuuhi bw'enjuhi,
nae nooba omuyala, kata esiindu sihahaata osilaanga esinyunyuula.
8Omuundu okota naatula mu daala lyae,
ali koti eyoni likota ohutula mu siyu syaalyo.
9Amafuta k'ohwebaha neende ebiwunya esing'aari bisangaasa omwooyo,
nae obudinyu bumala omuleembe mu bulamu.
10Otakabuhanaanga neende omwiicha wao, noomba neende omwiicha wa laatao;
haandi otakonyaanga mwaanamao n'onyoolere ebidinyu.
Owaasyo oli aambi,
ahira mwaanamao oli eyale.
11Mwaana waange, bechaanga ow'amakesi, mani wusangaseenge,
hu nyale ohunyoola esy'ohukobola mu baandu baanyeka.
12Omuundu mukesi abona ebidinyu nibiicha mani omweene yeekisa;
nae oyo otabaasa asikwaamo yeeyichulisa luunyuma.
13Silai ohubukula engubo yi muundu asiinga naadaha ohwemerera omuundu y'atamanyire,
haandi lehe abe neende ekobi ly'ohwemerera bawalukeenda.
14Oyo osimuha echuli mu mabwiibwi,
mani yahuumula mu kono ly'aakulu ohuheesa owaasye,
bamuyira koti obwaabwa.
15Omuhasi mulekeresi ali koti efula yikwa
mani yahaya ohwaakama;
16sidinyu muno ohumuyenjeesa, koti luwahayenjeesa omuyaka kuwuucha,
oba ohwomiisa amafuta mu mahono.
17Esyuuma nisyo esyakala esyuuma syaasye,
haandi omuundu niye owekesa omuundu waasye.
18Oyo owakira omutuli, yahalye hu byaamo byakwo,
haandi oyo ohalaabanira omwaami wae, yaheswemo oluyaali.
19Koti omuundu yebona n'atingaalire mu maachi,
nilwo lu mwooyo kwae kweekesa koti lwaali.
20Koti lu emakoombe yitechula abafu,
nilwo nasilala koti emoni chitajoong'a ohwekoomba.
21Koti lu efeesa neende esaabbu biteemwa neende omuliro kw'esiroombe,
nilwo lu muundu yibakinia anyala ohuteemwa.
22Omusiru kata yahaswakirwa mu sinu neende omuswakiro
yaaswakirwa alala yaaba aambi ohufwa,
nae haba soonyala wamumalamo obusiru.
23Manya bulai ebyaayo byao koti lu biri,
haandi obaase hu bisolo byao,
24olwohuba obuyiinda haba sibuyiindira endaalo choosi;
haandi obwaami haba sibuyiindira endaalo choosi.
25Obunyaasi nibukofula mani obuundi bwaaloha,
neende obwohulugulu nibubuuswa alala,
26ao ochia ohwesonera engubo ohutula mu bwooya bw'amakoondi kao,
haandi embusi chao ochia ohuchikusa okule eloba.
27Ochia ohunyoola amabeere kahumala,
ewe neende abomu nyuumba yao
haandi abahalaabani bao boosi baachia ohukang'waho.
©Bible Society of Kenya, 2019
©Bible Society of Uganda, 2019