Engaado 24
24
Olukaado lw'ehumi-na-chitaanu-na-chine
1Otadiiriraanga abahola-mbi embaliha,
noomba wekoomba ohuba alala nabo;
2olwohuba babaasa eby'obwaalaba,
haandi balomaloma ebiindu bidoondobania abaandu.
Olukaado lw'amahumi kabiri
3Enyuumba yeema hu musiingi kw'amakesi,
haandi yoombahwa ohweema hu humanya.
4Ebiseenge byao biichula neende ohumanya
neende eby'engaanga byoosi neende eby'obuyiinda bisangaasa.
Olukaado lw'amahumi kabiri-na-lulala
5Omuundu w'amakesi niye ow'amaani ohuhira oyo owehoonyera esirifu,
haandi omuundu muwulisi ahira oyo oli neende amaani;
6olwohuba ohulwaana eye, sidaha mberi ohuhola hwa makesi,
haandi yibaberesi b'amakesi baangi yibali, ao niyo yihunyiingira yi huli.
Olukaado lw'amahumi kabiri-na-chibiri
7Eby'amakesi bihira eyale muno omusiru ohumanya;
haandi sibulao esiindu si anyala ohulomaloma yibaheengera emisaango.
Olukaado lw'amahumi kabiri-na-chidatu
8Oyo otekeha ohuhola esibi
bachia ohumulaanga bati, omuholi w'ebidinyu.
9Buli siindu si musiru atekeha ohuhola siba esyonoono,
haandi abuundu haba si badaha omulekeeresi.
Olukaado lw'amahumi kabiri-na-chine
10Nooba omukata mu biha bi onyooleramo ebidinyu,
ao amaani kao kaba amadiidi.
Olukaado lw'amahumi kabiri-na-chitaanu
11Yabina abo abali ohuyirwa ohwiitwa;
wonia abo abali ohuchia ohusiinjwa bihaya.
12Nimuboola muti, “Bone, sino haba sihubeere nihusimanyire,”
nae Nasaae omanyire ebiri mu mwooyo haba saasibona?
Oyo oliinda obulamu bwao asimanyire,
haandi achia ohuhuberesa buli mukabo ohweema hu biholwa byao.
Olukaado lw'amahumi kabiri-na-chisaasaba
13Mwaana waange, lya obuuhi, olwohuba bulai nibwo,
haandi koti lu buuhi budoonya nibutula mumabbaangara k'obuuhi bunyunyuula n'ohoomba,
14manya oti nilwo lu makesi kanyunyuulira obulamu bwao;
n'okanyoola, wahabe bulai mu bulamu bwao,
haandi esuubi lyao haba silyahakame.
Olukaado lw'amahumi kabiri neende chitaanu-na-chibiri
15Otaba koti abahola-mbi abaliindirira amadaala k'abaandu baluungifu;
otayaaya edaala lyae.
16Olwohuba omuundu muluungifu kata yahakwa amahabi kataanu-na-kabiri, asiingirao buli habi li akwiira aasi;
nae omuundu mubi, amasira kahamusihirise.
Olukaado lw'amahumi kabiri neende chitaanu-na-chidatu
17Otasangaalaanga omusuku wao n'akwiireho obudinyu,
haandi otehoyaanga nasyeluluuha mani yaakwa.
18Olwohuba Omwaami anyoolera naabona ati oholere otyo,
mani yakamira ao ohumunyoolerera.
Olukaado lw'amahumi kabiri-na-chitaanu-na-chine
19Otafukiiriraanga abahola-mbi bakera wenyendeherera,
haandi otebadiiriraanga ehali-hali;
20olwohuba omuhola-mbi abula esuubi;
haandi yahasime koti etaara.
Olukaado lw'amahumi kadatu
21Mwaana waange, yiisaanga oluyaali mu Omwaami neende mu mutuki,
haandi otaholeraanga alala neende abajeemu;
22olwohuba amasira ohutula eyiri Omwaami neende eyiri omutuki kahabakweeho-bukwa,
haandi abulao omanyire koti lu kahaake.
Engaado chiindi echemeedaho
23Haandi chino choosi ngaado echakaadwa neende abaandu bakesi.
Ohwehubbira mu huheenga emisaango haba sisilai nisyo.
24Oyo oboolera omuundu wahola esyonoono ati, “Obulaho omusaango,”
abaandu bahamubwaabe, haandi buli muundu yahamusyuule.
25Nae abo aboolobya abahola-mbi bahanyoole esangaalo,
haandi bahabecheenge neende ehabi.
26Oyo okobolamo esyadyeeri
nisyo esilolero sy'obwiicha.
27Taangira otekehetekehe bulai emirimo kyao ky'erwaanyi,
otereese bulai endalo yao,
mani huwoombahe enyuumba yao.
28Otatusaanga obuloli ohuyiingania owaasyo ataali esifune syoosi,
haandi otamulomalomaanga eby'obubacha.
29Otaboolaanga oti, “Syesi ndahamuholeho esiindu sy'aholere;
ndaheetuunge esiindu sy'aholere.”
30Ndabita mu ndalo y'omuundu mukata,
mu ndalo y'emisabbiibbu y'omuundu obulamo amakesi;
31bone, yali niyichuulemo amawa;
yoosi niyisihiremo esiino,
haandi olukaka lwaao lw'amakina nilukwiire aasi.
32Ndayitingaala mani nimbaasa muno;
ndayitingaala mani ndabaaho neende singerakirwa.
33 #
Eng 6:10,11. Wemeede okuunuheho, haandi wemeede okoneho,
wemeede ohufuumba amahono mani owuluuheho,
34obumanani bwahahuseete koti omunyaka,
ahuseeta n'adiirire ebilwaaniso.
©Bible Society of Kenya, 2019
©Bible Society of Uganda, 2019