Engaado 25
25
Engaado cha Solomooni chiindi
1Chino chosi ngaado cha Solomooni, chi baandiiki ba Hesekia omutuki wa Buyudaaya baanula baandiika haandi buyaaha.
2Hwiisa oluyaali mu Nasaae hulw'ebiindu bi akisa,
nae hwiisa oluyaali mu batuki hulw'ebiindu bi batotola.
3Koti ekulu lyeniinia aakulu, haandi esyaalo syoloberera aasi,
nilwo lu bibaaso by'omutuki bidinyu ohumanya.
4N'osaamba efeesa mani watusamo obuchaafu bwoosi,
ao omwiitaanyi anyala ohwiyiitaniamo esiindu syoosi ysaadaha.
5Malao abakeraki babi mu moni w'omutuki,
mani ochia ohubona koti obwaami bwae bucha ohubaamo obuluungifu.
6 #
Luk 14:8-10. Oteniiniaanga mu moni w'omutuki
oba wetechaanga mu bweyaango bw'abahunuufu;
7olwohuba silai bahuboolera bati, “Yiicha aakulu eno,”
ohuhira ohuhwiisa aasi mu moni w'omuhunuufu.
Ebiindu bi oba n'obweene
8haba siwanguyaanga ohubileeta mu siina;
olwohuba siina syeene syoonahole mu luunyuma lweene,
owaasyo wuundi naatusa obuloli bwadyeeri obuhudiisa esoni?
9Nisiruwo esifune akatikaati wao neende owaasyo, musimalirise mweembi,
haandi otabulaanga esyaama sy'owaasyo;
10ataali ao oyo ohuwulira achia ohuhudiisa esoni,
mani wahadoong'e nodiirirwe esoni.
11Emboosi ndai yilomwalomwa mu biha bilai
yiri koti ebyaamo byeengere ebiri koti esaabbu yi bateere hu saani y'efeesa.
12Omuundu w'amakesi byaakerakira omuundu yetekeehe ohutekeeresa,
ali neende obuhoonyi ohuhira engila y'esaabbu oba esikomo sy'esaabbu syoosi.
13Wamwaanda mweesikwa, akobosamo amaani,
koti lu maachi manyifu kakwiisa obuluwo abakang'wa mu biha by'ekesa.
14Omuundu asuubisa esiyaanwa syaatanyala huberesa,
ali koti ebireesi neende omuyaka bitakwiisa efula.
15Ohwesimiirisa hunyala ohusenda-senda omutuki,
haandi olulimi lulai lunyiingira ow'obunyala.
16Noonyoola obuuhi bw'enjuhi, lichaangaho bw'onyala bwoong'ene,
ataali ao onyala wabitirisa ohwiikuta mani waasala.
17Otakeniyaanga owaasyo amahabi maangi,
ahaye ohuhujoong'a mani yahusyuula.
18Omuundu wayirisa owaasye bihaya
mubi muno koti endawusi y'ohulwaana, oba olugaanga, oba olusaale lwooki.
19Ohweesika omuundu otaali omweesikwa mu biha by'obudinyu
siri koti eliino lilwaalire oba ohukulu hubatuuhe.
20Oyo owembera omuundu oli mu bidinyu
ali koti omuundu wefwaalula engubo mu biha by'emboo,
haandi koti ohubaha omuunyu mu sikoonjo.
21 #
Rom 12:20. Enjala niyiluma omusuku wao, mubecheenge esyohulya,
haandi obuluwo nibumuluma, mubecheenge esyohung'wa.
22Olwohuba n'ohola otyo, ochia ohumuyaambya esoni,
haandi Omwaami achia ohuhuberesa omukabo.
23Ohumoonya huleeta obwaalaba;
koti lu muyaka kutula emukulu kuleeta efula.
24Silai ohumenya mu soonda hu sirama sy'enyuumba
ohuhira ohumenya mu nyuumba mambali neende omuhasi mulekeresi.
25Koti lu maachi manyifu kali eyiri omuundu olumwa obuluwo,
nilwo lu siri ohuwulira emboosi ndai ohutula mu syaalo sy'eyale.
26Omuundu muluungifu owewaayo eyiri omuundu mubi
ali koti esulo yamadosi oba omwaalo kudubuuhire.
27Haba sisilai ohulya obuuhi buungi,
nasilala haba sisilai omuundu ohukoonya ohwiswamo oluyaali.
28Omuundu okoterwe ohweetuka omweene
ali koti esiko siseterwe mani syalikulwa ebida byaasyo.
©Bible Society of Kenya, 2019
©Bible Society of Uganda, 2019