Engaado 22
22
1Nooli owohudoolao akatikaati w'eliita lai neende obuyiinda, doola eliita lai,
haandi ohukwiirwa esisa huhira efeesa oba esaabbu.
2Omuyiinda neende omumanani bali neende esiindu sibambaania alala;
Omwaami niye owabaloonga boombi.
3Omuundu mumanyirifu abona esidinyu nisiicha mani yeyikulira siamubitaho,
nae otaali neende amakesi yemeeda-bwemeeda mani nasikwaamo.
4Omukabo kw'obuloonga neende ohutya Omwaami
nikwo obuyiinda neende oluyaali neende ohuyiindira.
5Amawa neende emiteego biri hu ngira y'abaandu badoondobanu;
nae oyo odaha ohweliinda, abyebwaaba.
6Yekesa omwaana wao amanye koti lu ahoyeere ohumenya,
mani yahasiichulise mu bulamu bwae bwoosi.
7Abaandu bayiinda nibo abatuka abamanani,
haandi oyo oweyola aba omuwaambe w'omuundu omweeyosa.
8Oyo otaaka obutali obwadyeeri yahakese amasira,
haandi ohwaalabira abaasye hwaahakame.
9Oyo w'ehabi oli neende omwooyo kw'obukabi,
olwohuba akabiraho abamanani hu eby'ohulya byae. 10N'omalao obulekeresi, ohulwaana hwosi nihutulao,
mani obusoolo neende amanyeko nibyaakama.
11Oyo owaheera ohweliinda,
haandi olomaloma emboosi ch'esisa, achia ohuba omwiicha w'abatuki.
12Omwaami yehaliirisa mani yaabona koti obwadyeeri buliindwa,
nae asihirisa obukodyo bw'abaandu babi.
13Omukata omweene aboola ati, “Erwaanyi yiriyo edalang'i!
Yicha ohunjitira hu ngira!”
14Ahalimi h'omuhasi mucheke buko bwooloberefu nibwo;
abo ba Omwaami anyoolerera babukwaamo.
15Sya buli ludaalo omwaana muyere ohuhola ebiindu bitaalimo amakesi,
Nae ohukololwa buli siha hubeekesa ohumanya esy'ohuhola.
16Oyo ofwiinyirira abamanani n'adaha ohwemeeda obuyiinda omweene,
oba oyo oberesa abayiinda ebiyaanwa, omweene yelaangira obumanani.
Engaado amahumi kadatu ech'amakesi
17Tekeresa mani owulire emboosi chi baandu bakesi balomaloma,
mani taaho omwooyo omanye ebiindu bi hweekesa.
18Siba esilai noonyala ohuchiichulisa mu mwooyo kwao,
noonyala ohuchilomaloma ataali obudinyu bwoosi.
19Ndaha wesike Omwaami,
sakira ndi ohuhweekesa bino enyaanga yino.
20Hwandikiire engaado amahumi kadatu,
echirimo ohweeka neende ohukerakirwa.
21Njia ohuhweekesa omanye obwadyeeri bweene.
Mani nibahutuma ohubukoonya, onaakoboleenge n'omalire ohumanya obwadyeeri bulai.
Olukaado lutaangira
22Otayayaanga omumanani, olwohuba haba siyenyala,
oba wafwiinyirira omumanani oli mu siina;
23olwohuba Omwaami niye ochia ohubalwaanira
mani achia ohutiisa buli muundu oli ohubatiisatiisa.
Olukaado lwohubiri
24Otaholaanga obwiicha neende abaandu b'etima,
oba waholera alala neende abaandu b'obwaalaba.
25Ataali ao, ochia ohweeka ebiima byaabwe
mani okiyandireho ohaye ohukitulamo.
Olukaado lwohudatu
26Otabechaanga mulala hu abo abeeyama,
ohutuunga amakobi k'abaandu baandi.
27Nibihuhaya ohutuunga,
bachia ohuhudiiraho kata neende esitaanda.
Olukaado lwohune
28Otasihuulaanga amakoonge k'olwaaho
ka bakuukaao bataaka.
Olukaado lwohutaanu
29Omuundu ohola emirimo neende esinani,
achia ohuba alala neende abatuki;
haba saahoyera ohuba alala neende abaandu ba buli ludaalo.
©Bible Society of Kenya, 2019
©Bible Society of Uganda, 2019