Engaado 21
21
1Omwooyo kw'omutuki kuli mu bunyala bw'Omwaami okukaluuhania yaakuyira yi adaha;
koti lu akaluuhania emyaalo ky'amaachi ohuhulukusira y'adahira.
2Omuundu anyala ohubaasa ati, buli siindu sy'ahola silai nisyo,
nae Omwaami apiima esichiiririrwa sy'omwooyo.
3Ohuhola ebiluungifu neende ebyadyeeri,
bisangaasa Omwaami, huhira ohumuleetera ebiyaanwa.
4Ohwekoomba hubi neende omwooyo kwo hwehuduumbasa,
nibyo ebituka abahola-mbi, mani bino bibi nibyo.
5Endekeha ch'omuundu w'esinani chimutuliramo omusaara muhoongo,
nae oyo ong'ang'abanira ebiindu, yeleetera obumanani.
6Obuyiinda bw'onyoola mu ngeri yitaali eyadyeeri
haba sibuyiindira daawe, haandi obudaha omweene yekoonyera ohufwa.
7Obwaalaba bw'abahola-mbi nibwo obwahabamaleo,
olwohuba bahaya ohufukiirira ohuhola ebyadyeeri.
8Obulamu bw'abahola-mbi budoondobanu nibwo,
nae abaluungifu bahola ebyadyeeri.
9Silai ohumenya abuundu adiyiifu hu sirama sy'enyuumba,
ohuhira ohumenya neende omuhasi musolani mu nyuumba hoongo.
10Omwooyo kw'omuhola-mbi kwekoomba ohwonoona,
abulao omuundu yakwiira esisa.
11Omuundu mulekeresi n'asaandisibwa, kata omuundu otamanyire anyoola elyeeko;
nae omukesi n'akerakirwa, niyemeeda ohumanya.
12Nasaae, Omuluungifu mweene, amanyire ebiri mu madaala k'abahola-mbi;
mani achia ohubakwiisa aasi basihirire.
13Oyo otawulira amaliro k'omumanani,
yesi achia ohulira haandi abulao owahamuwulire.
14Esiyaanwa syomungiso siyenjeesa etima;
haandi asowa yomusyaama, yimalao egiili.
15Abaandu baluungifu basangaalira obwadyeeri,
nae obwadyeeri bunyoolesa abahola-mbi.
16Omuundu odikaana mani yaatula hu ngira y'ohumanya
achia ohwenyoola naali alala neende abafu.
17Oyo odaha muno obulamu bw'ohwesangaasa yahabe omumanani;
oyo odaha amalwa neende ohulya ebinulu haba siyahabe omuyiinda.
18Abaandu babi abeene beleetera ebidinyu,
bibateema ohukwiisa hu baandu baluungifu.
19Silai ohumenya mu syaalo sy'esiparara
ohuhira ohumenya neende omuhasi musolani haandi owekanyiirisa buli siha.
20Obuyiinda bw'engaanga budoong'a mu daala ly'omuundu mukesi,
nae omuundu musiru abwekotyombera bwoosi.
21Oyo oteema ohuba omuluungifu haandi ow'esisa
yahayindire haandi yeswamo oluyaali.
22Omuhoongo w'amaye mukesi ayiingira esiko sy'abaandu b'amaani
mani yalikula likula ebida bi bali nibeesika.
23Oyo omanyirisa emboosi ch'alomaloma
omweene yewonia ebidinyu.
24Oyo owehuduumbasa mani yeniinia bamulaanga ohuba omulekeeresi,
owesuunga haandi otadeeba daawe.
25Obwekoombi bw'omuundu mukata nibwo obumwiita
olwohuba amahono kae haba sikadaha ohuhola emirimo.
26Oludaalo lwoosi omuhola-mbi yekoomba ohubaaho neende sy'ananyoole,
nae omuluungifu akaba haandi simwiimani.
27Esiyaanwa sy'omuhola mbi syoomusiro eyiri Omwaami;
ohirira elalira n'asileeta neende esichiiririrwa sibi.
28Omuloli w'obubacha yahasihirire,
nae oyo owulira esifune syeene, bafukiirira si alomaloma.
29Omuhola-mbi ahanana mu moni,
nae omuundu muluungifu omweene aba niyemanyire.
30Abula amakesi, oba ohumanya, obulao ohukeraka,
ebinyala ohuyiingania mani byaayiingira Omwaami.
31Onyala ohutekeha efaraasi ohulwaana amaye,
nae Omwaami niye oleeta ohuyiingira.
©Bible Society of Kenya, 2019
©Bible Society of Uganda, 2019