Ohubala 15
15
Amalako kadiira hu huyaana
1Omwaami yaberesa Musa 2ebilagiro biloondaho bino hulw'abaandu ba Yisiraeli ohuloondaanga nibali mu syaalo si yali n'achia ohubaberesa. 3Eng'oombe surusi, ekoondi miiku, ekoondi dwaasi, oba embusi, binyala ohuyirwa eyiri Omwaami koti esiyaanwa sisaambwa syaakwa ekohe, oba koti esiyaanwa ohwooseresa esichubo syoosi, oba koti esiyaanwa sy'ohweyaanayo sa omweene, oba koti esiyaanwa hu muholo kw'esidyaalo kwa buli buhya; esaami y'ebiyaanwa y'ebyohulya bino yisangaasa Omwaami. 4Mani oyo yeesi oleeta esiyaanwa syae aba ahoyere haandi neende ohuyaanira Omwaami silala sy'ehumi sy'ekiloguraamu y'obusye bubunyuhe, obusasaanire neende elita ndala y'amafuta k'enaasi koti esiyaanwa sy'emere; 5haandi neende elita ndala y'efiini koti esiyaanwa sy'esyohung'wa byaaba achia ohutekehera alala neende esiyaanwa sy'ohusaamba sikwe ekohe esyo, oba hulwabuli siyaanwa, buli ekoondi yere. 6Ekoondi miiku niliri nilyo eliri ohuyaanwa, ekiloguraamu chibiri ech'obusye sasaaniiswe neende elita ndala neende esituundu esy'amafuta k'enaasi biba bihoyere byosi ohuyirwa koti esiyaanwa sy'emere, 7alala neende elita ndala neende esituundu esy'efiini. Esaami y'ebiyaanwa bino yisangaasa Omwaami. 8Nae eng'oombe surusi niyo eyiyaanwa eyiri Omwaami koti esiyaanwa sisaambwa syaakwa ekohe, oba koti esiyaanwa ohwooseresa esichubo, oba koti esiyaanwa sy'ohukobola alala, 9esiyaanwa sy'emere esy'ekiloguraamu chidatu ech'obusye echisasaaniiswe neende elita chibiri ech'amafuta k'enaasi, biba byosi bihoyere ohuleetwa, 10alala neende elita chibiri ech'efiini. Esaami y'esiyaanwa sino yisangaasa Omwaami.
11Esyo nisyo esichia ohuyaanirwaanga hu buli eng'oombe surusi, ekoondi emiiku, ekoondi edwaasi, oba embusi. 12Nikali mbwe ebyaayo bihira silala nibyo ebichia ohuyaanwa, esiyaanwa sichiiraho syoosi siba sihoyeerwe ohumeedwaho koti lu biba nibichiana. 13Abaisiraeli beebulwa boosi, bahoyere ohuholaanga batyo nibaba nibayira esiyaanwa sy'ebyohulya, esaami yisangaasa Omwaami. 14Nae nikali mbwe esiha siindi syoosi, sibao abateende baba nibabamenyamo, oba hulw'esiha sidiidi oba nibamenyera elalira mweeng'we, bosi baheengao ohuyaana esiyaanwa sy'esyohulya, esaami yisangaasa Omwaami, bosi bahoyere ohuloondakana neende ebilagiro byeene bino. 15Hulw'endaalo choosi echiicha, amalako keene kano kachia ohuba niko akahola hweeng'we neende hu bateende baba nibabamenyamo. Eng'we neende abeene abo, mweesi mwaakanirira mu moni w'Omwaami; 16#Lef 24:22.amalako keene ako, neende ebilagiro byeene ebyo, byoosi bidiira sa hweeng'we haandi hu beene abo.
17Omwaami yaberesa Musa 18ebilagiro biloondaho bino, hulw'abaandu ba Yisiraeli ohuloondaanga nibali mu syaalo si yalola naachia ohubaberesa. 19Esy'ohulya syoosi esirimirwe ebweene eyo sichia ohuba nisiriibwa, eyiindi hu yeene eyo yihoyeere ohukabulwaanga endulo, koti obuhoonyi bw'enjaulo eyiri Omwaami. 20Nimuba nimuhubba emigaati, omugaati kutaangira hu migaati kyaamberi, ekitula mu mere njaaha, kuhoyere ohuyirwayo koti obuhoonyi bw'enjaulo eyiri Omwaami. Kuno kwosi kuhoyere ohuyirwayo mu ngeri nasilala neende obuhoonyi bw'enjaulo bwoyiraanga ohutula hu ngaano njaaha noohubbaka. 21Hulw'endaalo choosi echiicha mu moni, esiyaanwa sy'enjaulo sino sihoyeere ohubeereswaanga Omwaami ohutula hu migaati kyooba n'ohubbaanga.
22Nae baasaho omuundu wuundi nae n'atachiiririre naahaywa ohwooseresa hu malako kaandi hu kano, k'Omwaami yaberesa Musa. 23Haandi baasaho oti mu ndaalo chiicha mu moni eyo, Abaisiraeli boosi boola ohuhaywa ohuholaanga buli siindu si Omwaami yalagira ohubitira mu Musa. 24Ohudoondobana huno nikali mbwe huleetwa neende obutamanya bw'abaandu bano boosi, baba bachia ohuyanaanga eng'oombe surusi koti esiyaanwa sisaambwa syaakwa ekohe, esaami yisangaasa Omwaami, alala neende esiyaanwa sy'emere sihoyera syeene, haandi neende esiyaanwa sy'efiini. Haandi mu humeeda ohwo, baba bahoyere ohuyaana embusi ehole koti esiyaanwa sy'esyonoono. 25Omulaamisi aba ahoyere ohuholera abaandu abo boosi omuduunga kw'ohulabya, mani hu banyale ohuleherwamo, olwohuba esisobyo esyo siba nisyali esitachiiririirwe daawe, haandi baba bamalire ohuleeta esiyaanwa syaabwe sy'esyonoono, koti esiyaanwa sy'ohulabisibwa eyiri Omwaami. 26Abaandu boosi aba Yisiraeli, neende abateende beene ababa nibabamenyamo, boosi baba bachia ohuba nibaleheerwemo, olwohuba buli muundu aba niyeyingisa mu sisobyo esyo.
27 #
Lef 4:27-31. Nikali mbwe omuundu yeeng'ene yonoona n'atachiiririre, aba ahoyere ohuyaana embusi enjere ey'omwaaka mulala obuhuluundu, ehasi, ohuba koti esiyaanwa sy'esyonoono. 28Naali hu alutaari bweene, omulaamisi aba achia ohuholerayo omuduunga kw'ohulabiswa ohwoosa omuundu oyo ohutula hu syonoono syae, mani amale aleherwemo. 29Esilagiro nasilala syeene esyo, sidiira hu abo boosi abatachiirira ohwonoona, kata neende nibaba nibali abeebulanwa, oba abateende bamenyera elalira.
30Nae omuundu yeesi, ohola esyonoono n'achiiririira, kata neende n'aba ali omwiibulanwa, oba omuteende, aba aniere omusaango kw'ohuyira Omwaami neende esijaaro, mani aba ahoyere ohwiitwa sa, 31olwohuba aba ahayire ebiindu bi Omwaami aba n'aboola, nihaandi aba amyeenere mani yaahalaka lala hu malako kae. Omweene aba yeleteere ohufwa hwae.
Omusaacha wahaya ohuhusa Sabbaato
32Oludaalo luundi, Abaisiraeli nibali nibasisiiri mu sichiimi, omusaacha wuundi yanyoolwa naali ohuteenya eehwi hu ludaalo lwa Sabbaato. 33Yayirwa eyiri Musa, Arooni, alala neende abaandu boosi, 34mani yaaliindwa bulai muno, olwohuba syali nisitamanyihana esy'ohumuhola. 35Mani Omwaami yaboolera Musa ati, “Omusaacha oyo ahoyere ohuwiitwa sa; haandi abaandu boosi bahoyere ohumuhubbaho amakina afwe nibamutusire erwaanyi w'ekaambi.” 36Abaandu boosi baamubukula mani nibamutusa erwaanyi w'ekaambi, mani nibamala nibamuhubba amakina naafwa, koti lu Omwaami yali n'alagiire.
Amalako kadiira hu bifuundiho
37Omwaami yaalagira Musa 38#Amal 22:12.ohuboolera abaandu ba Yisiraeli ati: “Hole ebifuundiho hu soonda ch'engubo cheeng'we, mani mutecheenge olusya lwa bbulu hu buli sifuundiho. Muchia ohuholaanga mutyo endaalo choosi echiicha. 39Ebifuundiho bino bichia ohuhola koti ebiichuliso, mani buli siha simuchia ohubibonaanga muchia ohwiichulisaanga amalako kaange koosi, mani mukosereseenge; haba simuchia ohunyala ohukaluuhanaanga nimuundulaho, nimuchia nimuloonda sa ebiindu bi mudaha haandi neende bi mwekoombaanga. 40Ebifuundiho bino bichia ohunyala ohubeechulisaanga ohwooseresaanga amalako kaange, mani hu munyale ohudoong'anga nimuli abaange syeeng'ene. 41Ese niise Omwaami, Nasaae weeng'we; ndabatusa mu Misiri hu mbe Nasaae weeng'we. Ese niise Omwaami.”
©Bible Society of Kenya, 2019
©Bible Society of Uganda, 2019