Ohubala 14
14
Abaandu bekanyiirisa
1Esiro syoosi, abaandu bali sa nibalirira mu bunyoolefu. 2Bali nibekanyiirisa Musa neende Arooni, nibaboola bati, “Syahabeere esilai sihiramo ohufwiira mu Misiri oba kata ano mu sichiimi. 3Lwasiina Omwaami ali ohutuyira mu syaalo sira? Huchia ohwiitirwa mu biita, mani abahasi beefwe neende abaana beefwe bapeeywe sa. Haba sisyahabeere esilai sihiramo ohukobola mu Misiri mani?” 4Mani bachaaka ohuboolanira abeene-na-beene bati, “Lehe hwedoolemo omwiimirisi mani hweekobolere mu Misiri!”
5Mani Musa neende Arooni beenama hu buloba mu moni w'abaandu boosi. 6Mani Yosua omwaana wa Nuuni neende Kalebbu omwaana wa Yefune, babiri hu bahemeresi bala, betaandulaho engubo mu bwelalihirifu buungi 7baboolera abaandu bati, “Esyaalo sihwalambuulire sibitiirifu obulai. 8Nikali mbwe Omwaami atusangaaliire, ohwoola aba achia ohutwoosayo, mani amale atuberese eloba yiinda elyo, haandi elya embolera. 9#Abaib 3:16.Mutajeemera Omwaami, haandi mutatya daawe abaandu bamenyayo abo. Huchia ohubayiingira bwaangu sa. Omwaami ali naafwe haandi amalire ohuyiingira banasaae abali nibabaliinda; mani mutatya daawe.” 10Nae abaandu boosi alala bali badaha ohuchaaka ohubahubba amakina bafwe, mani abweene ao, abaandu baabona obulafu bumyeesuha obw'Ohubaao hw'Omwaami nibubonehanira aakulu w'Eyeema.
Musa asabira abaandu
11Omwaami yaboobera Musa ati, “Abaandu bano bahaakame liina, ohujeemeraanga bati? Bahaakame liina ohuhaya ohundeesika, kata neende nindahamala ohubaholeramo eby'amayia biingi byakiire ao? 12Njia ohubasiindihira oluumbe lubi mani mbasihirise sa, nae ewe njia ohuhuhola obe laatang'ene luyia luhoongo haandi olw'amaani luhiraho neende koti lu bali!”
13 #
Hut 32:11-14. Nae Musa yaboolera Omwaami ati, “Ewe niiwe owatusa abaandu bano mu Misiri niwehoonyera obunyala bwao. Abamisiri nibawulira esiindu syooba n'oholere hu baandu bao, 14baba bachia ohukaniaayira abaandu bamenya mu syaalo sino. Abaandu bano mbano bawulire bati ewe Omwaami, oli naafwe haandi bati ewe obonehanaanga alafu esireesi syao nisyeema aakulu weefwe, haandi bati otwiimiriraanga mu siiro ly'esireesi esideete, nae haandi mu siiro ly'omuliro mu siro. 15Bulaanu niwiichuhana weeta abaandu bao bano boosi, ebyaalo byoosi ebyali nibyamala ohuwuliraho hu fuma yao biba bichia ohuboola 16biti ewe weetera abaandu bao mu sichiimi olwohuba byali nibihuhaire ohubeengisa mu syaalo si wasuubisa ohubaberesa. 17Mani sakira ewe Omwaami, ese hwekweeda, otweekesere elalira obunyala bwao mani ohole si wasuubisa ni waboola oti, 18#Hut 20:5,6; 34:6,7; Amal 5:9,10; 7:9,10. “Ese Omwaami, haba siinyoleswaanga bwaangu, haandi njekesaanga obuheeri bubitiirifu neende obweesikwa bubitiirifu mani ndeheramo ebyonoono neende obujeemu! Nae kata katyo haba siindi chweeya ohusaandya abaana alala neende abeechuhulu ohwoola hu njibulo cha hadatu kata neende ebyonoono bya basaabwe. 19Bulaanu ewe Omwaami, ohweema hu buhunuufu bw'obuheeri bwao butakaluuhana, leheramo, hwekweeda, ebyonoono by'abaandu bano, koti sa lu wabaleheraangamo ohutulira elalira lu batulira mu Misiri.”
20Omwaami nae yakobolamo ati, “Njia ohubaleheramo, koti lu osabire. 21#Abaib 3:18.Nae, ndi ohusuubisa endi, niimba nisisiiriwo, haandi ohubaao hwaange nihuba nihusichuule mu syaalo muno, 22abulao kata mulala hu baandu bano olimenyao yoola ohwiingira mu syaalo esyo. Mbao mwabweeneho obulafu bw'ohubaao hwaange bumesa-mesana, haandi neende eby'amayia bi ndahola mu Misiri, haandi neende mu sichiimi, nae kata katyo bateemere obwesimiirifu bwaange amahabi neende amahabi, bahayira elalira ohufunihira. 23Haba sibachia ohunyala ohwiingiraho mu syaalo si ndasuubisa bakuuka yaabwe. Abulao kata mulala hu abo abanjeemera ochia ohunyala ohusiingiramo daawe. 24#Yos 14:9-12.Nae olwohuba mbwe omuhalaabani waange Kalebbu ali neende embaasa yikabuhaane, haandi koti lwadoong'ere sa n'asisiiri owumbulira, niye yiinja ohwiingisa mu syaalo si yalaambuula, haandi abeechuhulu bae nibo abachia ohwekobosaho esyaalo sino 25si hoondo chasyo Abamaleki neende Abakanani bulaanu buti nibo abamenyamo. Kobole enyuma muchuli, mani mumale muchie mwiingire mu sichiimi sitiingaalire Omusoma kwa Akabba.”
Omwaami asaandya abaandu hulw'ohwekanyiirisaanga
26Omwaami yaboolera Musa neende Arooni ati, 27Abaandu babi bano bahalehe liina ohundekanyisaanga? Ese malire ohuwulira ohwekanyiirisa humala! 28Bulaanu, chia obakobolemo oti: “Ndeechuba endi ese niimba nisisiiriwo, njia ohuhuholera ebyo byosabire. Ese Omwaami, niise olomaloome. 29#Abaib 3:17.Muchia ohufwa mani emilaambo kyeeng'we kisalaanire mu sichiimi sino. Olwohuba muundekanyiirisireho, abulao kata mulala hweeng'we oli aakulu w'emyaaka amahumi kabiri eky'ohubuhuluundu ochia ohunyala ohwiingira mu syaalo esyo. 30Ndali nindasuubisa ohubakanya muchie mumenye mu bweene omwo, nae abulao kata mulala hweeng'we ochia ohunyala, ohutusaho Kalebbu neende Yosua. 31Muboolere mbwe muti abaana beeng'we baba bachia ohupeeywa, nae ese njia ohubaleeta beengire mu syaalo si eng'we mwekaana, nihaandi nisyo esichia ohuba edaala lyaabwe lyeene. 32Eng'we muchia ohufwiira ano mu siparara muno. 33#Biho 7:36.Abaana beeng'we bachia ohuyikaana mu sichiimi muno emyaaka amahumi kane emilaamba, nibasaanda hulw'obutaali obweesikwa bweeng'we, ohwoola lu oyo omaliirihirayo elalira hweeng'we lu alifwa. 34Muchia ohusaanda ebinyaaso bitula mu byonoono byeeng'we emyaaka amahumi kane emilaamba, omwaaka mulala hu buli ludaalo lulala lu mwayira nimulambuulaanga esyaalo esyo. Muchia ohumanyira elalira esitula mu hukera ese ndaahuhaya! 35Ndeechuba endi ohwoola lu njia ohubahola sino, eng'we abaandu babi abamanyire ohundeehoba mwanjooma. Ano bweene mu sichiimi, buli mulala hweeng'we nimwo mwaacha ohufwiira. Ese Omwaami malire ohulomaloma.”
36Nae abaandu ba Musa yatuma ohuchia ohulambuula esyaalo, haandi abakobola mani baahola okunabuungi kwoosi ohumweng'ulung'uunyaho nibaleeta amahuwa mabi, akadiira hu syaalo esyo, 37abasaacha baleeta emboosi embi echidiira hu syaalo esyo, bafwa oluumbe lubi mu moni w'Omwaami. 38Hu bahemeresi ehumi-na-babiri bala, Yosua neende Kalebbu boong'ene nibo abawoniaho.
Ohuteemaho hwataangira ohuseeta esyaalo esyo
(Amal 1:41-46)
39Musa niyaboolera Abaisiraeli ebiindu bi Omwaami yali n'aboolere, balira muno ebilulu. 40Echuli nibuhyeere oludaalo lwaloondaho, batula baateemaho ohuseeta esyaalo siri ena bigulu, nibaboola bati, “Bulaanu, efwe huli abeetekefu ohuchia abuundu yi Omwaami yatukaniairaangaho. Hufukiirire huti hwonoona.”
41Nae Musa n'aboola ati, “Lwasiina muli ohujeemera Omwaami bulaanu buti? Haba simuchia ohubitamo daawe! 42Mutachia daawe. Omwaami haba saali alala naang'we, mani abasuku beeng'we bachia ohubayiingira. 43Nimuchia ohuchoomana neende Abamaleki, haandi neende Abakanani, eng'we muchia ohufwiira mu biita; Omwaami haba saachia huba naang'we daawe, olwohuba mwahaya ohuloonda amalako kae.”
44Kata katyo nabo benyiira sa ohuchia ohuniina mu syaalo sy'omubigulu, kata neende oba sa Esanduuku ly'Endagaano, oba kata Musa owatulaho mu kaambi daawe. 45Abamaleki alala neende Abakanani abali nibamenya omwo babaseeta baabayiingira, baabaloondaho ohwoola lu boola Horima.
©Bible Society of Kenya, 2019
©Bible Society of Uganda, 2019