Ohubala 16
16
Obujeemu bwa Koora, Datani, neende Abbiramu
1 #
Yuda 1:11. Bulaanu Koora omwaana wa Yisaari, omwaana wa Kohati, omwaana wa Leefi, neende Datani neende Abbiramu abaana ba Eliabbu, neende Onu omwaana wa Peleti, abaana ba Rubbeeni, 2babukula abasaacha baandi; baasiingirira mu moni wa Musa, alala neende abaandu baandi ba Yisiraeli, abasaacha emia chibiri neende amahumi kataanu (250) abeemirisi b'emikaanda, abadoolwa ohutula mu beehaale, abasaacha abamanyihana muno. 3Beecha bebuusa alala mu moni wa Musa neende Arooni, mani baamala baboola bati, “Eng'we mubitiriise muno! Abaandu boosi ab'omukaanda kuno ngandi b'Omwaami nibo, haandi ngandi Omwaami yesi ali neende efwe fweesi. Lwasiina ewe Musa oli ohweniinia muno aakulu w'omukaanda kw'Omwaami kuno?”
4Musa niyawulira ati, yeehubba aasi hu buloba yasaba. 5Mani yeecha yaboolera Koora neende abaloondi bae ati, “Muchuli echuli, Omwaami achia ohutweekesa oyo oli owae wadyeeri; achia ohuleha oyo owae wadyeeri, oyo yi yadoola, amusudeho yaali ena alutaari. 6Hola oti: bala abaandu, Koora alala neende omukaanda kwae kwoosi; 7bateemo omuliro mani omale obateeho obubbaani mu moni w'Omwaami muchuli, mani omusaacha oyo yi Omwaami achia ohudoola oyo niye ochia ohuba naali omwoolerefu mweene. Eng'we basyaani ba Leefi, mubitiriise muno!”
8Musa yemeeda sa ohulomaloma neende Koora n'aboola ati, “Tekeerese eng'we Abaleefi! 9Musibona muti siindu sidiidi nisyo ohubona muti Nasaae wa Yisiraeli yabaawula yaabatusa hu baandu baandi boosi abadoong'ereyo, hu munyale ohumusudaangaho, nimuhola obuhalaabani bweeng'we mu Yeema ly'Omwaami, mani haandi nimuhoonya abaandu boosi haandi nimubaholera? 10Yakera eng'we alala neende Abaleefi baandi mwanyoola esiha siti nae bulaanu muli ohweekesamo hu munyale ohunyoola neende obulaamisi bwosi! 11Nimuba nimweekanyiirisa Arooni, muba muli sa hu Omwaami mweene yi eng'we alala neende abaloondi beeng'we muli ohuhayuhaho.”
12Bulaanu Musa yeecha n'alaanga Datani neende Abbiramu, nabo baboola sa bati, “Efwe haba sihuchia hwiicha, kataa! 13Esyo haba sisihuyera ohubona oti wanyala ohututusa mu loba gimu lya Misiri ohwiicha ohutwiitira ano mu sichiimi? Sino syoosi oli ohusibona oti sihuhoyera ohutudwiihaho syoosi? 14Mubwadyeeri bweene ewe haba siwatuleetaho kata mu loba gimu, oba kata sa ohutukaba emikuunda, neende emituli ohuba ebyeefwe daawe, haandi bulaanu oli ohutubacha-bu-bacha sa. Efwe haba sihucha hwiicha daawe!”
15Bulaanu Musa yeecha yanyoolera mani yaboobera Omwaami ati, “Otafukiiriraangaho esiyaanwa syoosi si basaacha bano baleeta yooli. Ese haba singoseraangaho kata mulala hu beene abo daawe; Haba siimbukulaangaho kata ndala hu puunda chaabwe daawe.”
16Musa yeecha yaboolera Koora ati, “Muchuli ewe alala neende abaloondi bao emia chibiri neende amahumi kataanu (250) muhoyere ohwiicha mu Yeema ly'Ohubaao hw'Omwaami; Arooni yesi achia ohubaayo. 17Buli mulala hweeng'we achia ohukiinga achie neende esihalaangiro syae, amale asiteeho obubbaani, mani abiiyire omweene eyiri alutaari.” 18Mani buli musaacha yeecha yakiinga esihalaangiro syae, yataaho amaanda kaaduha omuliro, haandi neende obubbaani, mani naamala naachia niyeema amulyaango w'Eyeema alala neende Musa neende Arooni. 19Mani Koora yeecha yahung'aania alala abaandu boosi, mani nibeecha nibeema nibatingaalire Musa neende Arooni amulyaango w'Eyeema. Abweene ao, obulafu bumesa-mesana bw'ohubaao hw'Omwaami, bweecha bwaabonehera abaandu boosi, 20mani Omwaami n'aboolera Musa neende Arooni ati, 21“Weseendeho weemere eyale neende abaandu bano, mani male mbasihirise mu meengisania.”
22Nae Musa neende Arooni beenama aasi, obweeni bwaabwe nibwegeeng'a hu buloba, mani nibamala nibaboola bati, “Ewe Nasaae, ewe niiwe esibuho y'obulamu bwoosi. Mani omuundu mulala yeeng'ene niyonoona, nawe oba ochia ohunyoolerera omukaanda kw'abaandu abo boosi?”
23Haandi Omwaami yeecha yaboolera Musa ati, 24“Boolera abaandu boosi basude eyale neende amayeema kaabwe, Koora, Datani, neende Abbiramu.”
25Mani Musa, naali alala neende abeemirisi b'abaandu ba Yisiraeli, bachia eyiri Datani neende Abbiramu. 26Yaboolera abaandu boosi ati, “Mweyaabe mweemere eyale neende amayeema k'abaandu babi bano, haandi mutadiiraho hu siindu syoosi esiba nisiri esyaabwe. Ataali ao, mweesi muba muchia ohweyeerwa alala nabo hulw'ebibi byaabwe byoosi.” 27Mani batyo baasuda eyale neende amayeema ka Koora, Datani neende Abbiramu.
Datani neende Abbiramu bali nibamalire ohutula erwaanyi nibali nibeemere aambi neende emilyaango ky'amayeema kaabwe, alala neende abahasi baabwe neende abaana baabwe. 28Musa yeecha yaboolera abaandu boosi ati, “Yino niyo engeri yi muchia ohumanyiramo muti hane Omwaami niye owaanduma ohuholaanga ebiindu bino byoosi, haandi muti, haba sihwali ohwedoolera hwaange ohwakera ndaanyala ohubiholaanga. 29Nikali mbwe abasaacha bano bafwa oluumbe lwabuli ludaalo, ataali esibonereso syoosi ohutula eyiri Nasaae, mani Omwaami aba siniye owaanduma. 30Nae nikali mbwe Omwaami yeecha yaahola esiindu sitawuliirihanaangaho, esyaalo syeekuha mani syaabamira sa alala neende ebiindu byaabwe byoosi, baanyala ohwiihirira nibali abalamu bachia emakoombe, muba munamanya muti hane abasaacha bano bali bahayuhira Omwaami.”
31Mani niyali hu yahamala sa ati ohulomalomaanga, ni eloba liri mu makulu wa Datani neende Abbiramu lyaadihanamo 32ni lyeemao libamira alala neende amadaala kaabwe, alala neende abaloondi boosi aba Koora neende ebiindu byaabwe byoosi. 33Mani batyo, nibeehirira abalamu kaanga emakoombe, alala neende ebiindu byaabwe byoosi. Esyaalo syababwiihaho, mani baamala baahamyuuhao. 34Abaandu Baisiraeli boosi abali nibali abweene ao heeruha nibawulira amaliro kaabwe. Beehuuma bati, “Yiruha! Esyaalo siinyala syaatumira efwe fwesi!”
35Mani Omwaami yatuma omuliro kwali nikweereba mani nikusaamba abasaacha bala emia chibiri neende amahumi kataanu (250) abali nibaleetere obubbaani.
Ebibbaati bikiinga omuliro
36Mani Omwaami yeecha yaboolera Musa ati, 37“Boolere Eliasaari omwaana w'Arooni omulaamisi ohumalayo ebibbaati bikiinga omuliro bya mugasa, ohutula mu biindu byadoong'ao by'abasaacha bali nibayiire, mani mumale musakuule amaanda katule hu bihalaangiro kachie abuundu waandi sa, olwohuba ebibbaati ebyo byoolerefu nibyo. 38Byeehola byaaba ebyoolerefu lu byaleeterwa eyiri alutaari y'Omwaami. Mani bukule ebibbaati bikiinga omuliro ebyo mubituse hu basaacha bano abeetwa hulw'esyonoono syaabwe, mani mu bitaanye mutusemo otusaani tupaapaadi, mani muholemo esifuuniha hu alutaari. Sino sichia ohuba esy'ohulabula eyiri abaandu ba Yisiraeli.” 39Eliasaari omulaamisi yabukula ebibbaati ebyo, yaabona ati byetaanywa byaaholwamo otusaani tunyerere muno ohuholamo esibwiiha hu alutaari. 40Sino syeecha syaaba esilabula Abaisiraeli siti, abulao oyo yeesi otaali omwiichuhulu w'Arooni, onyala ohusuda hu alutaari ohusaambira Omwaami obubbaani. Ataali ao, aba achia ohusihiriswa koti sa Koora alala neende abasaacha bae. Bino byoosi byeehola bityo, koti lu Omwaami yali n'alagiire Eliasaari ohubitira mu Musa.
Arooni awonia abaandu
41Oludaalo luloondaho abaandu boosi bekanyiirisa Musa neende Arooni mani baboola bati, “Eng'we mwiitireho hu baandu b'Omwaami.” 42Luunyuma lwaabwe ohwebuusa neende ohusaasakalira Musa neende Arooni, bakaluuhana bachia eyiri Eyeema mani baabona bati, esireesi syali nisiribwiihireho, haandi bati, obulafu bumilamilana obw'ohubaao hw'Omwaami bwali nibubonehana. 43Musa neende Arooni bachia beema mu moni w'Eyeema, 44mani Omwaami yaboolera Musa ati, 45“Yemera eyale neende abaandu bano boosi, mani mbasihirisire abweene ao!”
Boombi mani baguunama neende obweene bwaabwe nibwegeeng'a hu buloba, 46mani Musa yaboolera Arooni ati, “Bukula esihalaangiro syao, oteemo amaanda kaaduha akatula hu alutaari, mani haandi otehooho obubbaani hu maanda ako. Mani omale wiiruhe ochie eyiri abaandu mani obaholere omuduunga kw'ohulabisibwa. Yanguyaho! Etima ly'Omwaami limalire ohutuunduha mani oluumbe lubi lumalire ohuchaaka.” 47Arooni yamuwulira, mani yaabukula esihalaangiro syae, yeeruha yaachia yeengira mu baandu akati abebuusire. Mani niyabona ati hane oluumbe lubi lumalire ohuchaaka, yabukula obubbaani mani yaabuta hu maanda mani naamala naaholera abaandu omuduunga kw'ohulabisibwa. 48Sino syaakamisirao oluumbe olwo, mani yadoong'a sa niyeemere akatikaati w'abaandu balamu neende abamalire ohufwa. 49Obuungi bw'abaandu bali nibamalire ohufwa bwali, elifu ehumi neende chine, neende emia chitaanu-na-chibiri (14,700), n'otabaliireho neende abo abafwiira mu huhayuha hwa Koora. 50Oluumbe lubi olwo nilwaakama, Arooni yakobola eyiri Musa enamulyaangiro kw'Eyeema.
©Bible Society of Kenya, 2019
©Bible Society of Uganda, 2019