Ohubala 13
13
Abahemeresi
(Amal 1:19-33)
1Omwaami yaboolera Musa ati, 2“Doola mulala hu beemirisi ohutula mu buli nono ehumi neende chibiri echio mani omale obatume koti abahemeresi ohuchia ohuseena mu syaalo sya Kanani, siinjia ohuberesa Abaisiraeli.” 3Mani Musa yaabatuma nibatula mu sichiimi sya Parani, ohweema hu silagiro sy'Omwaami, boosi nga bali abasaacha bali abeemirisi b'abaandu ba Yisiraeli. 4Kano niko akali ameeta kaabwe: Ohutula mu nono ya Rubbeeni, yali Samua omwaana wa Sakuri; 5ohutula mu nono ya Simeoni, yali Safati omwaana wa Hoori; 6ohutula mu nono ya Yuda, yali Kalebbu omwaana wa Yefune; 7ohutula mu nono ya Yisikari, yali Yigali omwaana wa Yosefu; 8ohutula mu nono ya Efuraimu, yali Hosea omwaana wa Nuuni; 9ohutula mu nono ya Bbenjamini, yali Paliti omwaana wa Rafu; 10ohutula mu nono ya Sebbuluuni, yali Gadieli omwaana wa Soodi; 11ohutula mu nono ya Yosefu (Esyeekesa mbwe ohutula mu nono ya Manaase), yali Gaadi omwaana wa Suusi; 12ohutula mu nono ya Daani, yali Amieli omwaana wa Gemali; 13ohutula mu nono ya Aseri, yali Seturi omwaana wa Mikaeli; 14ohutula mu nono ya Nafutaali, yali Nahibbi omwaana wa Fofusi; 15ohutula mu nono ya Gaadi, yali Gueli omwaana wa Maachi.
16Bano nibo abali abahemeresi ba Musa yatuma ohuchia ohuseena eloba elyo.
17Musa niyabatuma batula baachia, yababoolera ati, “Muchie muniine emukulu nimutulira ano mu situundu sy'emwaalo sy'eloba lya Kanani, hu mumale muchie mwoole mu syaalo sy'ebigulu esyo. 18Teeberese mumanye embya y'esyaalo sino koti lu yiri, ni abaandu baanga abasimenyamo, haandi koti lu maani kaabwe kaaka. 19Teeberese mumanye oba eloba elyo lai oba bi, haandi oba abaandu bamenya mu biko bitaali ebisitirire, oba mu biko biri mu ngoba. 20Teeberese mumanye oba eloba gimu haandi oba esyaalo sy'ebichaha. Muhole amaani mukaluheho neende ebyaamo byomu syaalo esyo.” (Syali esiha si emisabbiibbu kichaakiramo ohweenga.)
21Abasaacha abo beemao baaniina emukulu baalambuula esyaalo esyo ohutulira mu sichiimi sya Siini emwaalo, ohuniinana ohwoola Rehobbu, aambi neende Hamati-Pasi esiri emukulu bweene. 22Bataangira ohuchia beengira mu situundu sy'emwaalo boola mu Hebburoni, yi njia cha Ahimani, Sesai, neende Talumai, abeechuhulu b'olwiibulo lwa kirahula, kilaangwa mbwe Anakimu, yi bali nibamenya. (Hebburoni syafuumbulwa emyaaka kitaanu-na-kibiri ohutaangirira Soani siri mu Misiri.) 23Boola mu hoondo y'Esikoli, mani eyo baakula esaga lala elyaliho esibulyaata sy'emisabbiibbu esisito muno esyadaha abasaacha babiri ohusikiingira hu mutubaangiro kuba akati waabwe. Haandi baleetaho neende namulwa neende ochiooga. 24(Abuundu ao yeecha yaakulihwa mbwe “Ehoondo y'Esikoli”, hulw'esaga ly'omusabbiibbu li Baisiraeli baakula eyo.)
25Luunyuma lw'ohulambuula esyaalo esyo endaalo amahumi kane amalaamba, abahemeresi abo bakobola engo 26eyiri Musa, Arooni, neende abaandu boosi aba Yisiraeli nibali mu Kadesi mu sichiimi sya Parani. Baboola byoosi bi bali nibabweene, haandi baabeekesa ebyaamo bi bali nibakiingire. 27Baboolera Musa bati, “Hwalaambuulire esyaalo mani hwaabona huti, silai nisyo haandi sy'embolela; mani ano mbano aliwo ebyaamo byaasyo biindi. 28Nae abaandu bamenyayo b'amaani muno, haandi ebiko byaabwe bi bihoongo muno haandi biri mu ngoba ndai muno. Haandi obudinyu buhira, hwabweeneyo abeechuhulu ba kirahula nibaliyo. 29Abamaleki nibo abamenya mu situundu syasyo sy'emwaalo; Abahiiti, Abayebbusi, neende Abaamoori nabo bamenya mu syaalo sy'ebigulu; nae Abakanani nibo abamenya aambi neende Enyaanja ya Mediterania, haandi neende hu ndulo w'Omwaalo kwa Yorodaani.”
30Kalebbu yawuleeresa abaandu bali nibali ohwekanyisaanga Musa, mani n'aboola ati, “Efwe huhoyere ohuseeta bulaanu buti mani huyaaye esyaalo sino; efwe huli neende amaani kanyala ohubayiingira.”
31Nae abasaacha bali nibachia neende Kalebbu baboola bati, “Haba, efwe sihuli neende amaani katunyalisa ohubaseeta daawe; abaandu bali eyo bali neende amaani kahira akeefwe.” 32Abo bachaaka ohuwonia obubacha mu Baisiraeli obudiira hu syaalo sibali nibalaambuulire. Baboolaanga bati, “Esyaalo esyo kata sisinyala hwiibula ebyohulya binyala ohuliisa abaandu bamenyayo beene. Buli muundu yihwabonaangaho yalichiingi omuleeyi muno, 33#Huc 6:4.haandi hwabonayo neende kirahula kyeene nikiriyo, ekiichuhulu kya Anaka. Hwebonaanga koti amadeede mu moni waakyo, nihaandi nilwo lu hwabonehanaanga yi kiri.”
©Bible Society of Kenya, 2019
©Bible Society of Uganda, 2019