Ohubala 12
12
Miriamu abereswa esinyaaso
1Musa yali niyadeehya omuhasi Mukuusi, mani Miriamu neende Arooni nibamufunaana muno hulw'esiholwa sino. 2Baboola bati, Mani Omwaami alomalomeraanga sa mu Musa yeeng'ene? Efwe fwesi haba saanyala ohutulomalomerahoomo? Nae Omwaami hane yaawulira ebiindu bi bali nibaboola. 3(Musa yali omusaacha muloonga, omuloonga muno ohuhira omuundu yeesi owali hu syaalo huno.)
4Abweene ao, Omwaami yaboolera Musa, Arooni, neende Miriamu ati, “Ndaha eng'we mweesi badatu mutule mwiiche ena Yeema ly'Ohubaao hwaange.” Batula baachia, 5mani Omwaami yesi yeehera aasi mu siiro y'esireesi, mani yeecha yeema mu mulyaangiro kw'Eyeema, yahuuma n'aboola ati, “Arooni! Miriamu!” Mani babiri abo nibeetusayo, 6mani Omwaami n'aboola ati, “Bulaanu eng'we mutekeerese bulai bi njia ohulomaloma! Abanabbi nibaba mweeng'we, ese mbeyekesera mu huboneherwaanga mani nomanoma nabo mu bilooto. 7#Abaib 3:2.Sikabuhaaneho muno neende ese niinomanoma neende Musa omuhalaabani waange; Ndamuhola yaaba otuka abaandu baange boosi, Yisiraeli. 8Mani nomanomaanga nae, emoni-hu-moni, alafu bweene ataali mu minae daawe; yamala neende ohubonaho koti lu ndamera! Mani mwoola mutye ohumoonya Musa omuhalaabani waange?”
9Omwaami yabanyoolerera muno; mani koti lu yali n'awaao, 10esireesi syatula hu Yeema, mani esihoba sya Miriamu syoosi syafuunihwa neende oluumbe lubi mani syaakaluhaana syafwaana rachaari koti ebbaraafu. Arooni niyamutingaalaho, mani yabona ati Miriamu afuniihwe neende oluumbe lubi olwo, 11yaboolera Musa ati, “Ndeheremo, Omuhuluundu, otaleha sa efwe hwasaandisibwa neende esinyaaso sino daawe, hulw'esyonoono syeefwe si siru sino. 12Otakera yoola ohufwaana koti esiindu syeebulwa nisifwiire, nisiliirwe esituundu sy'enyama yasyo yoosi.”
13Mani Musa yalirira Omwaami ati, “Ewe Nasaae, muwonie!”
14 #
Hub 5:2,3. Omwaami yakobolamo ati, “Simwaana aba niyamufuucha mu bweeni bwae, aba yahadoong'ere mu soni echio endaalo chitaanu-na-chibiri. Mani leha mberi yeekalirweho erwaanyi w'ekaambi ohumala ejuma ndala hooho, hu mani luunyuma hu anyale ohwiingiswa haandi mukati.” 15Mani Miriamu yeecha yeekalirwa erwaanyi w'ekaambi endaalo chitaanu-na-chibiri enaamba, abaandu boosi baahaya ohukeenda ohwoola lu bamukobosa mu kaambi. 16Mani bulaanu batula mu Haserooti baachia boombaha ekaambi mu sichiimi sya Parani.
©Bible Society of Kenya, 2019
©Bible Society of Uganda, 2019