Mika 4
4
Obutuki bw'Omwaami bwohu syaalo syoosi bw'omuleembe
(Yis 2:2-4)
1Mu ndaalo chiichayo echio,
olugulu lu nyuumba ya Nasaae yoombahwahwo
lwaheehole olugulu luhiramo mu ngulu choosi obuhunuufu,
mani lwaaba aakulu w'ebigulu biindi byoosi;
ebyaalo byoosi byaheebuusire yi luli,
2haandi abaandu baangi baheeche nibaboola bati:
“Mwiiche, lehe huchie huniine hu lugulu lw'Omwaami,
oluliho Enyuumba ya Nasaae wa Yakobbo;
mani hweeke ebiindu byaadaha huhole
haandi hukeendere mu ngira chae.”
Olwohuba amalako k'Omwaami kachia ohutula mu Siyooni,
neende emboosi y'Omwaami ohutula mu Yerusalemu.
3 #
Yis 2:4; Yoel 3:10. Omwaami achia ohuheengera ebyaalo emisaango,
haandi achia ohukaya obusoolo akatikaati w'abaandu baangi.
Embaanga chi babeere nibehoonyera ohwiitanira, bachia ohuchitaanya chibe embako ch'ohulimira,
haandi amafumo kaabwe bachia ohukretaanya kabe engeso.
Mani sibulao esyaalo syahayuule ebilwaaniso ohuseeta esyaalo siindi,
haandi haba siyahabeeo ohweeka eby'amaye daawe.
4 #
Sak 3:10. Nae buli muundu anabechaanga mu misabbiibbu kyae neende mu mituli kyae,
mani abuleo omutiisa-tiisa daawe.
Olwohuba Omwaami w'Obunyala niye olomaloome.
5Olwohuba abaandu boosi beenamira haandi baliinda
amalako ka banasaae baabwe.
Nae efwe huchia ohwiinamira haandi huwulire Omwaami Nasaae weefwe
endaalo choosi pe.
Abaisiraeli bahakobole ohutula mu bwiiruhiro
6Omwaami aboola ati: Ebiha ebyo nibyahoole,
njia ohubuusa alala abalema,
mani mbuuse abo abeeruswa,
neende abo ba ndasaandya.
7Abalema njia ohubahola bae abo Abaluwonamo;
haandi abo abali nibasukunwa, njia ohubahola esyaalo sy'amaani.
Mani njia ohubatukiraanga hu Lugulu lwa Siyooni,
ohutula esiha sino neende endaalo choosi pe.
8Nae ewe Yerusalemu, omunaara ku Nasaae yeemaho
niyewuunja abaandu bae koti omwaayi,
haandi waheehole ohuba esiko sihuluundu,
esy'obutuki koti lu wabechaanga hale,
obwaami obwali obwao.
9Bulaanu lwasiina olira muno otyo?
Lwasiina opapala koti omuhasi olumwa naadaha ohwiibula?
Oli otyo olwohuba obula neende omutuki,
haandi abakeraki b'amakesi bao bamala ohufwa?
10Eng'we abaandu bomu Siyooni,
mulumwe haandi mubiinduhe koti omuhasi olumwa naadaha ohwiibula.
Olwohuba bulaanu muchia ohutula mu siko
mani mumenye mu sipaapi.
Haandi mwahachie Bbabbilooni.
Eyo niyo yi Omwaami yahabanunulire
abatuse mu bunyala bw'abasuku beeng'we.
11Bulaanu abaandu bomu byaalo biingi
byebuusire alala ohubalwaania,
nibaboola bati, “Leha Yerusalemu sisihiriswe!
Hudaha ohubona koti lu sisihiriswa.”
12Nae abaandu bomu byaalo ebyo
haba sibamanye si Omwaami abaasa daawe.
Haba sibamanye endekeha chae daawe,
esikera yababuusa alala koti lu omuhuuchi kuli hu lwaanyi.
13Omwaami aboola ati: Eng'we abaandu bomu Yerusalemu,
siingire mani muchie musaandye abasuku beeng'we.
Olwohuba njia ohubahola mube ab'amaani
koti esurusi eyiri neende enjika ch'esyuuma,
neende ebirekeyi by'esihomo.
Muchia ohunyonyobola ebyaalo biingi,
mani mukaluse eby'obuyiinda bi bayaaya, eyiri Omwaami.
Haandi muleete obuyiinda bwaabwe eyiri Omwaami w'esyaalo syoosi.
Currently Selected:
Mika 4: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
