Mika 3
3
Miika yoolobya abeemirisi ba Yisiraeli
1Ao mani nimboola endi:
Wulire, eng'we abeemirisi ba Yisiraeli
neende eng'we abatuki ba Yisiraeli!
Niing'we abahabeere nimumanyire obwadyeeri.
2Nae musyuula ebilai mani mwaaheera ebyonoono.
Mubaaka abaandu baange mani mwaabamalaho esihoba,
mwaatusa enyama hu makuumba kaabwe.
3Mulya abaandu baange,
haandi mwaabatusaho esihoba
mani mwaafunakafunaka amakuumba kaabwe,
mwaabatematema koti enyama yohudeehera mu nuungiro.
4Esiha syahoole mani balirire Omwaami,
nae haba saacha ohukobolamo daawe.
Haba saacha ohuwulira ohusaba hweeng'we daawe,
olwohuba mwahola ebiholwa bibi.
5Omwaami aboola ebidiira hu banabbi
abo nibakosakosa abaandu baange,
abasuubisa omuleembe,
eyiri abo abababeresa esyohulya,
nae abalaanga ebiita
eyiri abo abatababeresa ebyohulya.
Abanabbi abo Omwaami aboola ati:
6“Mani sakira abanabbi eng'we, esiro siri aambi ohubakwaaho,
haandi esiirima ohuboolaho.
Elyuuba liri aambi ohukwa nimubona,
haandi ebiha by'esideete, bibeerimire.
Mani mube mu siro nimutaboneherwa,
haandi mube mu siirima nimutalakula.”
7Abanabbi chana abo bahadiirwe esoni,
abalakusi chana bosi bahadiirwe esoni.
Boosi bahediire hu minwa,
olwohuba Nasaae haba siyahabakobolemo daawe.
8Nae ese, Omwaami yaanjichusa amaani,
neende Mwooyo wae,
neende obwadyeeri neende obunyala,
ohweekesa ab'enyuumba ya Yakobbo obudoondobanu bwaabwe,
neende Abaisiraeli ebyonoono byaabwe.
9Wulire sino, eng'we abeemirisi b'enyuumba ya Yakobbo
neende abatuki ba Yisiraeli,
eng'we abasyuula obwadyeeri,
esilai mani mwaahola esyonoono.
10Eng'we aboombaha Siyooni hu muse kw'obutemo,
neende Yerusalemu hu muse kw'esibi.
11Abahuluundu basyo baheenga emisaango olw'ohukuliirirwa.
Abalaamisi basyo beekesa nibapaangiiswe,
abanabbi basyo balaanga banyoole eseende.
Mani boosi beesika Omwaami nibaboola bati,
“Omwaami ali naafwe.
Sibulao esyonoono sinaatukweeho daawe.”
12 #
Yer 26:18. Mani sakira hulweeng'we,
Olugulu lwa Siyooni lwahalimwe koti endalo.
Esiko sya Yerusalemu syaheehole esituuli sy'ebikoha.
Olugulu luliho Enyuumba ya Nasaae lwaheehole esichaha.
Currently Selected:
Mika 3: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
