Mika 5
5
1Abaandu bomu Yerusalemu, muhung'aanie eye lyeeng'we.
Batwebodoohaanie!
Baseetere omutuki wa Yisiraeli.
Nasaae asuubisa Omutuki ohutula Bbetilehemu
2 #
Mat 2:6; Yow 7:42. Omwaami aboola ati: Nae ewe, Bbetilehemu Efuraati,
niiwe ohiramo obudiidi mu nono chia Yuda.
Nae omutuki wa Yisiraeli
achia ohutula mu ewe,
oyo yi huchaaka hwae hwaliwo ohutula hale,
ohutula mu ndaalo cha hale muno.
3Mani sakira Omwaami yahabalehe ohwoola lu
oyo olumwa ohwiibula yaheebule.
Ao niwo yi baandu bomu syaalo syae bahabe nibadoong'ereo
bahakobolere eyiri Abaisiraeli basyaabwe.
4Oyo niyaheeche, yahatuke abaandu bae mu bunyala bw'Omwaami,
neende obuhunuufu bw'eliita ly'Omwaami Nasaae wae.
Mani abaandu bae bahabe mu muleembe, olwohuba bulaanu yahabe omuhunuufu
ohwoola hu njakamo y'esyaalo.
5Mani yahaleete omuleembe.
Ohuwonia neende ohusaandya
Abasiria nibahaseete esyaalo syeefwe,
mani baaseena hu loba lyeefwe,
hwahatume abeemirisi beefwe bataanu-na-babiri abahiramo amaani
neende abatuki beefwe bataanu-na-badatu.
6 #
Huc 10:8-11. Bahalwaane ebiita mani baayiingira Asiria,
esyaalo sya Nimuroodi.
Mani bahatuwonie Abasiria
abahabe nibaduumire olwaho
nibali mu loba lyeefwe.
7Mani Abaisiraeli abahabe nibadoong'ereo
bahabe akatikaati w'ebyaalo biingi
koti olume lutula eyiri Omwaami,
haandi koti efula yikwa hu bunyaasi.
Baheesike Omwaami ataali abaandu,
Omwaami niye owahabaliinde, ataali abaandu.
8Mani Abaisiraeli bahaluwonemo
bahabe akatikaati w'ebyaalo biingi
koti edalang'i akatikaati w'esolo chomu siino,
koti edalang'i ndoto akatikaati w'eyiicho ly'amakoondi;
edalang'i yikakwaaho, yakabosyoola-bosyoola
mani abuleo omuundu onyala ohukawaabina daawe.
9Mwahayiingire abasuku beeng'we,
mani mubasihirise boosi.
10Omwaami aboola ati: Mu biha ebyo, njia ohubatusaho efaraasi cheeng'we,
haandi njia ohusihirisa ebigaari byeeng'we.
11Njia ohusihirisa ebiko biri mu syaalo syeeng'we
haandi njia ohufunaka-funaka ebiko byeeng'we bi mweesika byoosi.
12Njia ohusihirisa eby'obulakusi byeeng'we,
haandi haba simwahabe neende abalakusi daawe.
13Ndahamaleo ebifwaanani byeeng'we,
neende esiiro cheeng'we,
mani haandi haba simwaheenamire
ebiindu bi mwaloonga neende amahono keeng'we daawe.
14Haandi njia ohusiihula male mu syaalo syeeng'we ebifwaanani bya Aseriimu
haandi sihirise ebiko byeeng'we.
15Mu tima lyaange neende mu bwaalaba bwaange, njia ohwetuunga
hu byaalo bitaambulira byoosi.
Currently Selected:
Mika 5: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
