Mika 2
2
Esyahakwe hu abo abafwiinyirira abamanani
1Chibaakaanire abo abalambaala hu bitaanda byaabwe
abo abahyeesa obwiire nibatekeha ohwonoona!
Nae obwiire nibuhya, nibabihola,
olwohuba bali neende obunyala bwohubihola.
2Nibekoomba endalo, nibachinyaka;
kata chibe enyuumba, chosi bachiyira.
Haba sibatya omuundu oba enyuumba yae,
bafwiinyirira omuundu alala neende ebiindu byae.
3Mani sakira Omwaami aboola ati:
“Bone, ndekeha ohubaholaho esibi,
mani haba simuchia ohunyala ohweewonia daawe.
Mwahabe nimutanyala ohukeenda nimwesuunga,
olwohuba ebiha ebyo byahabe ebidinyu.
4Ebiha ebyo nibyahoole, mwaheehole olukaado lw'abo
abakwiiswaho amasira.
Haandi bahabeembeho olweembo nibabalekeeresa,
mani baboole bati, ‘Husihiriire elalira;
Omwaami akaluhaanie omukabo kw'abaandu baange;
atunyuulire esyaalo syeefwe,
mani yaasikaba abasuku beefwe.’ ”
5Mani sakira ebiha nibyahoole esyaalo sikoboserwe abaandu b'Omwaami,
abulao owahabe neende omukabo kwoosi daawe.
6Baluwo abayaala nibaboola bati, “Otatuyaala”
“Omuundu haba s'ahoyere ohuyaala ebiindu koti ebyo;
haba sihucha ohudiirwa esoni daawe.”
7Mubaasa muti Abaisiraeli banyala ohubwaaba batyo?
Mubaasa muti Omwaami haba saanyala ohwesimiirisa daawe?
Mubaasa muti Omwaami anyala ohuhola ebiindu biri bityo?
Emboosi chae haba sichisangaasa
abo abahola ebiluungifu daawe?
8Nae Omwaami n'akobolamo ati, “Nae abaandu baange mubekaluuhanisiire, mwabahola abasuku.
Munyaka engubo hu baandu bali mu muleembe,
abo ababitao neende obweesikwa,
nibataaliho neende esiindu sibeyeendeherera syoosi.
9Mwiirusa abahasi b'abaandu baange mu madaala kaabwe
kabasangaasa.
Abaana baabwe bayere, mubatusaho
oluyaali lu ndababeresa olw'endaalo choosi.
10Siingire mani muweeo,
olwohuba ano abulao abuundu wohuwuuluhiramo.
Olwohuba ebyonoono bisihirire
bisihirisiire elalira abuundu ano.”
11Abaandu bano badaha omunabbi obabacha,
okeenda n'aboola ati: “Naanga endi mwahanyoole amalwa neende ebimeesa by'amaani.”
Omunabbi oyaala atyo niye omulai eyiri abaandu bano.
12Nae mubwadyeeri bweene, njia ohubabuusa alala, eng'we mweesi Abaisiraeli,
njia ohubuusa alala Abaisiraeli badoong'ao.
Njia ohubaleeta alala
koti amakoondi kakoboole mu sidwooli.
Esyaalo syeeng'we syaheechulemo abaandu mani boobba esiyoka,
koti olwaayiro lwiichulamo amakoondi.
13Nasaae achia ohubeekulira engira mani abeemiriremo.
Bahafunake esiruwa sy'esiko
mani babitiremo nibawaao.
Omutuki waabwe, Omwaami mweene,
niye owahabeemiriremo.
Currently Selected:
Mika 2: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
