Yosua 20
20
Ebiko by'ohwiiruhiraangamo
1 #
Hub 35:9-34; Amal 4:41-43; 19:1-13. Bulaanu haandi Omwaami yaboolera Yosua 2ohuboolera abaandu ba Yisiraeli ati, “Doole ebiko by'obwiiruhiro bi ndaboolera Musa ohubaboolera. 3Nabaao mbwe mulala hweeng'we yeechuhana niyeetere owuundi naatechoomere, aba anachichaanga ebweene eyo mani yeewonia oyo oba nakiiya ohumwesooleraho. 4Muba muchia ohwiiruhiraanga mu siko silala hu byeene bino, ohuchichaanga abuundu w'ohuheengeraangamo emisaango, hu mulyaango kw'esiko bweene, mani mubooleraanga abeemirisi ebinabeechaanga nibikwiireo. Mani abo baba bachia ohubalehaanga nimwiingira mu siko esyo, haandi bababeresaanga abuundu w'ohumenyaangao, hu munyaleenge ohuwonisira obulamu bweeng'we ao. 5Nae nikali mbwe abaao oyo yeesi oba nakiiya ohusoola ahuloondaangaho ebweene eyo, abaandu boomu siko omwo, haba sibaba nibahoyere ohuhulehulaanga ahubukula daawe. Baba bahoyere mu ngeri choosi ohuhukayiriraanga olwohuba oba oli niweeta omuundu oyo n'otechoomere, ataali ohweema hu tima lyooba niwali nalyo daawe. 6Oba ohoyere ohudoong'aanga noomenyere mu siko omwo ohwoola lwooliba noomalire ohuwoseswa mu lwichuule, oba ohwoola lu muundu oba naaliba naali Omulaamisi Muhuluundu esiha esyo lwaaliba n'afwiire. Ao bulaanu hw'oliba n'onyoolere edeembe ly'ohukobolayo engo mu siko syao syeene, yooba niweeruha nootulamo.”
7Mani sakira, hu lwaande lw'emuumbo olwa Yorodaani, bahoyere ohukabulayo Kedesi esiri mu Galilaaya, mu syaalo sy'ebigulu-gulu esya Nafutaali; Sekemu, esiri mu syaalo sy'ebigulu-gulu esya Efuraimu; haandi neende Hebburoni, esiri mu syaalo sy'ebigulu-gulu esya Yuda. 8Ebukwe wa Yorodaani, hu siparara sy'esyaalo sy'esipaapi ebukwe wa Yeriko, badoola Bbeseeri esiri mu situundu sy'eloba lya Rubbeeni; Ramoti mu Gileadi, mu situundu sy'eloba lya Gaadi; mani haandi neende Golani esiri mu Bbasani, mu situundu sy'eloba lya Manaase. 9Mani bino nibyo ebyali ebiko by'obwiiruhiro, ebyadoolerwa abaandu ba Yisiraeli boosi, haandi kata neende hulwabuli muundu mukeni yeesi owalichiingi niyabamenyaangamo. Buli oyo yeesi owetaanga omuundu yeesi natechoomere, yalichiingi naanyala ohunyoola ohukayirwa ebweene eyo, ohutula hu muundu yeesi oba naamukiiya ohumwesooleraho; abaandu bafwaana batyo haba sibabeechaanga nibanyala ohwiitwa sa batyo ohutusaho mberi nibatangiire baabawosesa bulai mu lwichuule.
©Bible Society of Kenya, 2019
©Bible Society of Uganda, 2019