Yosua 19
19
Esituundu sy'esyaalo syakabwa Simeoni
1Ohukaba hwaloondaho hwali ohw'amadaala k'enono ya Simeoni. Obuhoongo bw'esituundu sino bwalandaala bweengira mu loba lyali nilyabereswa enono ya Yuda. 2#1 Biha 4:28-33.Syali siyiriramo neende Bberisebba, Seebba, Molada, 3Hasaari Suali, Bbaala, Eseemu, 4Elitolaadi, Bbetuuli, Horima, 5Sikilaagi, Bbeeti Marikabboti, Hasarisusa, 6Bbeeti Lebbaoti, neende Saruheeni: bino byoosi alala byali ebiko ehumi neende bidatu, haandi ohumeendaho neende ebiko bidiidi-diidi biindi ebyalichiingi nibibyebodoohaanie.
7Haandi yaliyo ebiko biindi koti, Ayini, Eni-Rimoni, Eteri, neende Asani: bino alala byali ebiko bine ebilaamba, haandi ohumeedaho neende ebidiidi-diidi biindi ebyalichiingi nibibyebodoohaanie. 8Esituundu sino syayiriraangamo alala neende ebiko biindi bidiidi-diidi ebyalichiingi nibibyebodoohaanie ohwoolera elalira hu Bbalati Bbeeri (oba Rama), emwaalo bweene. Mani lino lityo nilyo elyali eloba li madaala k'enono ya Simeoni kanyoola ohuba elyaabwe hu bwaabwe. 9Nae koti omukabo kwa Yuda kwali nikuli omutabaafu ohuhiraho koti lu kwali nikweenyeha ohuba, esituundu siindi syakwo syameedwa hu sy'enono ya Simeoni.
Esituundu sy'esyaalo esyakabwa Sebbuluuni
10Omukabo kwa hadatu kwali okw'amadaala k'enono ya Sebbuluuni. Mani eloba libanyoola lyali nililandaala nilyoola hu Saridi. 11Mani ohutulira ebweene eyo, olwaaho lwachooma emuumbo ohwoola hu Mareali, haandi lwaaba niludiiraho hu Dabbeseeti, haandi neende hu haalo hali ebukwe wa Yokineyamu. 12Nae hu lwaande luundi olwa Saridi, olwaaho olwo lwachiira ebukwe, ohwoolera elalira hu lwaaho lwa Kisiloti Tabbori, mani haandi lwaamala lwaachia hu Dabberaati, haandi lwaniina ohwoola hu Yafia. 13Haandi luchiiririra sa niluchoomere ebukwe nilutulire ebweene eyo, ohwoola lu lwoola Gaatiheferi, haandi neende hu Etikasiini, haandi nilukabuha niluchooma yi Neya siri, yi lubita sa niluchia nilwoola hu Rimoni. 14Emukulu nayo, olwaaho luno lwakabuha lwachooma Hanatoni, mani nilwaakamira hu Hoondo lya Yifitaheli. 15Eloba lino lyayiriramo neende Katati, Nahalaali, Simirooni, Yidaala, neende Bbetilehemu: bino biko byoosi alala byali ebiko ehumi neende bibiri, haandi ohumeedaho neende ebiko bidiidi-diidi biindi ebyalichiingi nibibyebodoohaanie. 16Ebiko bihunuufu bino alala neende ebiko bidiidi-diidi byabyo byoosi, byali nibiri mu loba li madaala k'enono ya Sebbuluuni kanyoola ohuba elyako hu bwaako.
Esituundu sy'esyaalo esyakabwa Yisakari
17Omukabo kwa hane kwali okw'amadaala k'enono ya Yisakari. 18Obuhoongo bwalyo bwali nibuyiriramo ebiko koti, Yesireeli, Kesulooti, Suneemu, 19Hafaraimu, Sioni, Anaharaati, 20Rabbiti, Kisioni, Ebbesi, 21Remeti, Enganiimu, Enihaada, neende Bbeetipaseesi. 22Olwaaho luno lwosi lwali nilwegeeng'aho hu Tabbori, Sahasuma, neende hu Bbeeti Semesi, mani nilwaakamira hu Yorodaani bweene. Lwali niluyiriramo neende ebiko ehumi neende bisaasaba, haandi alala neende ebiko biindi bidiidi-diidi ebyalichiingi nibibyebodoohaanie. 23Mani ebiko bihunuufu bino, alala neende ebiko bidiidi-diidi byabyo bino byoosi, byalichiingi nibiri mu loba li madaala k'enono ya Yisakari kanyoola ohuba elyako hu bwaako.
Esituundu sy'esyaalo esyakabwa Aseri
24Omukabo kwa hataanu kwali okw'amadaala k'enono ya Aseri. 25Obuhoongo bwalyo bwali nibuyiriramo ebiko koti, Helikaati, Hali, Bbeteni, Akisafu, 26Alaamu Meleki, Amaadi, neende Misali. Emuumbo walyo lyali nilyegeeng'a hu Karimeeli neende Sihori Libbinaati. 27Nae koti lu lwali nilweekoda niluchooma ebukwe, olwaaho luno lwachia lwoola Bbetidagoni, nilwegeeng'a hu Sebbuluuni neende Hoondo ya Yifitaheli hu ngira niluchiira emukulu ohwoola hu Bbetemeeki neende Neyeli. Lwali nilwemeeda sa ohuniina emukulu ohwoola lu lwoola Kabbuuli, 28Ebburooni, Rehobbu, Hamooni neende Kaana, ohwoolera elalira hu Sidoni. 29Olwaaho olwo bulaanu lwakabuha lwachiira eyiri Rama, mani nilumala nilwoolera elalira hu siko sy'olukoba esya Tiiro; ao haandi lwakabuha lwachooma hu Hoosa, mani lwaakamira hu Nyaanja Hoongo ya Mediterania. Lwayiriramo neende Mahalabbu, Akisibbu, 30Wuma, Afeki, neende Rehobbu: ebiko bino byoosi alala byali nibiri amahumi kabiri neende bibiri, haandi n'oyiriiremo alala neende ebiko bidiidi-diidi ebyalichiingi nibibyebodoohaanie. 31Mani ebiko bihunuufu bino alala neende ebidiidi-diidi byaabyo, byoosi byali nibiri mu loba li madaala k'enono ya Aseri kanyoola ohuba elyako hu bwaako.
Esituundu sy'esyaalo esyakabwa Nafutaali
32Omukabo kwa hasaasaba kwali okw'amadaala k'enono ya Nafutaali. 33Olwaaho lwalyo lwali niluchiiririra ohutulira hu Helefu ohwoola hu mutuumba kuli mu Sananiimu, haandi lwaachiiririra ohwoola hu Adami Nekebbu, haandi neende hu Yamunia, haandi ohwoolera elalira hu Lakumu, mani lwaamala lwaakamira hu Yorodaani bweene. 34Ebweene eyo niyo yi lwaaho olwo lwakabuhira mani lwaachooma emuumbo niluchia eyiri Asinooti Tabboori, ebweene eyo haandi yi lwatulira mani lwachiira eyiri Hukooki, nilwegeeng'a hu Sebbuluuni emwaalo bweene, Aseri nisidoong'a emuumbo, nae Yorodaani niyidoong'a ebukwe. 35Ebiko byali nibyakedeerana engoba byali nibyo bino mbwe, Sidiimu, Seri, Hamaati, Rakati, Kinereeti, 36Adama, Rama, Hasoori, 37Kedesi, Edirei, Enihasoori, 38Yirooni, Migidaleeli, Horeemu, Bbeetanaati, neende Bbeeti Semeesi: ebiko bino byoosi alala byali ebiko ehumi neende bitaanu-na-bine, haandi n'omeedereho neende ebiko bidiidi-diidi ebyalichiingi nibibyebodoohaanie. 39Mani ebiko bihunuufu bino alala neende ebiko bidiidi-diidi byabyo bino boosi alala, byalichiingi nibiri mu loba li madaala k'enono ya Nafutaali lwanyoola ohuba elyako hu bwaako.
Esituundu sy'esyaalo esyakabwa Daani
40Omukabo kwali okwa hataanu-na-habiri, kwali okw'amadaala k'enono ya Daani. 41Obuhoongo bwalyo bwali nibuyiriramo ebiko koti, Soora, Esitaoli, Yirisemesi, 42Salibbini, Aijalooni, Yitiala, 43Eloni, Timuna, Ekironi, 44Eliteeke, Gibbetooni, Bbalaati, 45Yehuudi, Bbenebberaaki, Gatirimoni, 46Mejarikoni, neende Rakoni, kata haandi neende esituundu sy'eloba syali nisyebodoohania Yopa. 47#Bak 18:27-29.Mani abaandu ba Daani nibakosa eloba lyaabwe, bachia Laisi mani baasiseeta. Basiwaamba, mani beeta abaandu basyo, nibasiyira ohuba esyaabwe hu bwaabwe. Bamenya mu bweene omwo, mani baakaluuhania eliita ly'esiko esyo ohutula hu Laisi, lyaaba Daani, nibasikuliha ohuloondakana neende eliita lya Daani kuuka yaabwe. 48Ebiko bihunuufu bino alala neende ebiko bidiidi-diidi byaabyo byoosi alala byali mu loba li madaala k'enono ya Daani kanyoola ohuba elyako hu bwaako.
Omukabo kumaliiriha okw'eloba
49Mani abaandu ba Yisiraeli nibamaliirisa ohukabaniamo eloba elyo, baberesa Yosua omwaana wa Nuuni esituundu siindi syoohu loba elyo, lyosi libe koti elyae sa hulwae. 50Koti sa lu Omwaami yali n'alagiire, bamuberesa esiko si yali omweene naasabire: Sino syali nisyo, Timunaati Seera, esyali nisiri mu syaalo sy'engulu sya Efuraimu. Omweene yoombaha esiko esyo buyaaha, mani yaamenya mu bweene omwo.
51Nae Eliasaari omulaamisi, Yosua omwaana wa Nuuni, alala neende abeemirisi b'amadaala k'enono ya Yisiraeli bakabaanga ebituundu by'eloba bino nibehoonyera ohuubbaannga eha nibali Silo, hu mulyaango kw'Eyeema ly'Ohubaao hw'Omwaami. Mani ohubitira mu ngira yeene yino, bamaliirisa ohukabaniamo eloba elyo.
©Bible Society of Kenya, 2019
©Bible Society of Uganda, 2019