Yosua 21
21
Ebiko by'Abaleefi
1Abeemirisi b'amadaala k'Abaleefi bachia eyiri Eliasaari omulaamisi, Yosua omwaana wa Nuuni, neende abahoongo b'amadaala k'enono choosi echia Yisiraeli. 2#Hub 35:1-8. Mani eyo mu Silo, mu loba lya Kanani, bababoolera bati, “Omwaami yalagira naabitira mu Musa ati efwe huhoyere ohubereswa ebiko bi humenyamo, haandi neende eloba ly'olwaayiro eliba nilibyebodohaanie, libe ely'ebituke byeefwe.” 3Mani sakira ohuchianakana neende elako ly'Omwaami, abaandu ba Yisiraeli bakanya ohuberesa Abaleefi ebiko biindi, haandi neende amaloba k'enjayiro, ohutula hu situundu sy'esyaalo syaabwe abeene.
4Mani amadaala k'enono y'Abaleefi eya Kohati, nibo abali abaamberi ohubereswa ebiko. Nae amadaala akali nikatula hu Arooni omulaamisi, babereswa ebiko ehumi neende bidatu ebilaamba ohutula hu bituundu by'ebyaalo bya Yuda, Simeoni, neende Bbenjamini. 5Nae enono chidoong'ereyo echia Kohati nachio chabereswa ebiko ehumi ebilaamba ohutula hu bituundu by'ebyaalo bya Efuraimu, Daani, neende Manaase Emuumbo.
6Nae enono ya Gerisoni yabereswa ebiko ehumi neende bidatu ebilaamba, ohutula hu bituundu by'ebyaalo bya Yisakari, Aseri, Nafutaali, neende Manaase Bukwe.
7Mani amadaala k'enono ya Merari kabereswa ebiko ehumi neende bibiri ebilaamba ohutula hu bituundu by'ebyaalo bya Rubbeeni, Gaadi, neende Sebbuluuni.
8Mani nibehoonyera ohuubbaannga eha, abaandu ba Yisiraeli bakabaanga ebiko bino alala neende amaloba k'enjayiro kahwo, eyiri Abaleefi, koti lu Omwaami yali niyalagira ohubitira mu Musa.
9Mani kano niko ameeta k'ebiko ebyo ohutulira elalira hu bituundu by'ebyaalo bya Yuda neende Simeoni, ebyakabwa 10abeechuhulu ba Arooni abali ab'enono ya Kohati, eyatulana hu Leefi. Omukabo kwaabwe nikwo okwali okwaamberi ohuholwa. 11Mani babereswa esiko sya Aribba (Aribba yali laatang'ene Anaaki), bulaanu buti esilaangwa mbwe Hebburoni, esiri mu syaalo sy'ebigulu-gulu esya Yuda, alala neende eloba ly'olwaayiro lisyebodohaanie. 12Kata katyo, emikuunda ky'esiko esyo, kata neende eky'ebiko bidiidi-diidi byasyo, byali nibyamala ohubereswa Kalebbu omwaana wa Yefune ohuba ekyae hu bwae.
13Haandi ohumeeda hu Hebburoni, (esyali esiko silala hu biko by'obwiiruhiro), ebiko biindi biloondaho bino byosi byabereswa abeechuhulu ba Arooni omulaamisi: Libbina, 14Yatiiri, Esitemoa, 15Holooni, Debbiri, 16Aini, Yuuta, neende Bbeeti Semeesi, alala neende amaloba k'enjayiro kahwo: bino byali ebiko bitaanu-na-bine ohutula hu enono cha Yuda neende Simeoni. 17Nae ohutula hu situundu sy'esyaalo sya Bbenjamini, babereswa ebiko bine ebilaamba: Gibbeoni, Gebba, 18Anatooti, neende Alimooni, alala neende amaloba k'enjayiro kahwo. 19Bino alala byoosi byali ebiko ehumi neende bidatu ebilaamba, alala neende amaloba k'enjayiro kahwo, ebyabereswa abalaamisi, abali abeechuhulu ba Arooni.
20Amadaala kaandi akali ak'enono y'Abaleefi eya Kohati babereswa ebiko biindi ohutula hu situundu sy'esyaalo sya Efuraimu. 21Bano babereswa ebiko bine ebilaamba: Sekemu, alala neende amaloba k'enjayiro kahwo, esyali mu syaalo sy'ebigulu-gulu esya Efuraimu (esyali silala hu biko by'obwiiruhiro), Geseri, 22Kibbusaimu, neende Bbeeti Horooni, alala neende amaloba k'enjayiro kahwo. 23Ohutula hu situundu sy'esyaalo sya Daani, babereswa ebiko bine ebilaamba: Eliteeke, Gibbetooni, 24Aijalooni, neende Gatirimoni, alala neende amaloba k'enjayiro kahwo. 25Ohutula hu situndu sy'esyaalo sya Manaase Emuumbo, babereswa ebiko bibiri ebilaamba: Tanaki neende Gatirimoni, alala neende amaloba k'enjayiro kahwo. 26Amadaala kano ak'enono ya Kohati, kanyoola ebiko ehumi ebilaamba alala byoosi, haandi alala neende amaloba k'enjayiro kahwo.
27Nae omukaanda kuundi okw'abaandu ba Leefi, enono ya Gerisoni, kwanyoola ohutula hu situundu sy'esyaalo sya Manaase Bukwe ebiko bibiri ebilaamba: Golani mu Bbasani (esyali silala hu biko by'obwiiruhiro) neende Bbesiteera, alala neende amaloba k'enjayiro kahwo. 28Nae ohutula hu situundu sy'esyaalo sya Yisakari, banyoola ebiko bine ebilaamba: Kisioni, Dabberaati, 29Yarimuuti, neende Enganiimu, alala neende amaloba k'enjayiro kahwo. 30Nae ohutula hu situundu sy'esyaalo sya Aseri, banyoola ebiko bine ebilaamba: Misali, Abbudoni, 31Helikaati, neende Rehobbu, alala neende amaloba k'enjayiro kahwo. 32Nae ohutula hu situundu sy'esyaalo sya Nafutaali, banyoola ebiko bidatu ebilaamba: Kedesi mu Galilaaya, alala neende amaloba k'enjayiro kahwo (esyali silala hu biko by'obwiiruhiro), Hamootidori, neende Karitaani, alala neende amaloba k'enjayiro kahwo. 33Amadaala kataali nasilala ak'enono ya Gerisoni kosi kanyoola obuungi bw'ebiko ehumi neende bidatu ebilaamba, alala neende amaloba k'enjayiro kahwo.
34Nae Abaleefi badoong'ereyo boosi, enono ya Omumerari, banyoola ohutula hu situundu sy'esyaalo sya Sebbuluuni ebiko bine ebilaamba: Yokineyamu, Kariita, 35Dimina, neende Nahalaali, alala neende amaloba k'enjayiro kahwo. 36Nae ohutula hu situundu sy'esyaalo sya Rubbeeni, banyoola ebiko bine ebilaamba: Bbeseeri, Yahasi, 37Kedemooti, neende Mefaati, alala neende amaloba k'enjayiro kahwo. 38Nae ohutula hu enono ya Gaadi, banyoola ebiko bine ebilaamba: Ramoti mu Gileadi, alala neende amaloba k'enjayiro kahwo (sino syali silala hu biko by'obwiiruhiro), Mahanaimu, 39Hesibboni, neende Yaseeri, alala neende amaloba k'enjayiro kahwo. 40Mani sakira enono ya Omumerari yabereswa alala obuungi bw'ebiko ehumi neende bibiri ebilaamba.
41Mani ebiko by'Abaleefi ebyali mu baandu ba Yisiraeli boosi byali ebiko amahumi kane neende bitaanu-na-bidatu ebilaamba. 42Haandi buli siko hu biko bino syalichiingi neende amaloba k'enjayiro kahwo nikabyebodoohania.
Yisiraeli yenyoolera esyaalo
43Mani mu ngira eyo yityo, niyo yi Omwaami yanyaliramo ohuberesa Yisiraeli yoosi esyaalo si yali niyasuubisa nachwiichwiisa bakuuka yaabwe ati ohwoola achia ohubaberesa. Mani nibali nibahamala ohusinyoola syoosi, boombaha, mani baasimenyamo. 44Omwaami yababeresa omuleembe mu syaalo esyo syoosi, koti sa lu yali niyasuubisa bakuuka yaabwe hale. Abulao kata mulala hu basuku baabwe boosi owanyala ohubeema mu moni, olwohuba Omwaami yali niyaberesa Abaisiraeli obuyiingiri hu basuku baabwe boosi. 45Omwaami yooseresa buli sisuubise si yali niyahola eyiri abaandu ba Yisiraeli.
©Bible Society of Kenya, 2019
©Bible Society of Uganda, 2019