Yobbu 40
40
1Omwaami yaboolera Yobbu ati,
2“Omuundu okoonyeresa ebyonoono anyala ohuyiingania ow'Obunyala bwoosi?
Oyo oyiingana neende Nasaae, leha akobolemo.”
Yobbu
3Mani Yobbu naakobola mu Omwaami ati,
4“Bona, mbula oluyaali lwoosi, ndahahukobolamo siina?
Haamuumbe omunwa kwaange, mani mbuleere-buwuleera.
5Malire ohulomaloma, haandi siinja ohukobolamo;
ehabi lyoohubiri, haba siinja ohwemeeda ohulomaloma.”
6Omwaami yakobola mu Yobbu ohubitira mu sifuusye n'aboola ati:
7“Weng'aade omusiipi koti omusaacha;
njia ohuhuteeba ebiteebo, bi ndaha wuungolemo.
8Koti lu oli otyo, oli ohuteema ohuboola oti niise otaali owadyeeri?
Wahachaaka otye ohuheengera omusaango kuuhire mbwe hu weemeo obe owadyeeri?
9Ewe oliho neende amaani kahaakana neende aka Nasaae,
haandi wahanyalaho ohwaaduluhana neende ekono liri koti elyae?
10“Mani wesaate neende amaani alala neende obuhunuufu;
wefwaale oluyaali alala neende obuhoongo.
11Yekesa etima lyao bitiirifu,
mani otingaale hu buli muundu weniinia omale omusaandye.
12Tingaala hu buli muundu weniinia mani omuloongoyase;
haandi oseenakire abonooni abuundu waabwe weene.
13Bafuunihe boosi alala mu loba;
beekalire emakoombe.
14Mani syesi njia ohuhukinia haandi fukiirire,
endi ohirire neende amaani kao.
15“Bona, efubu,
yi ndaloonga koti lu ndahuloonga;
Yilya obunyaasi koti eng'oombe.
16Bona, amaani kayo kali mu sibuno,
haandi amaani kayo maangi kali mu misi kyohuunda yao.
17Yeemesaanga omuhiinga kwayo aakulu kuba koti omuseengese;
emisi kyohu makulu kayo kyeeboya alala haandi ky'amaani muno.
18Amakuumba kayo moomu koti enjehe ch'omugasa,
haandi amakulu kayo kali koti emitaliimbo ky'ebyuuma.
19“Niyo eyitaangira mu solo choosi chi Nasaae yaloonga;
owayiloonga yeeng'ene niye onyala yaasuda aambi nayo n'adiirire olugaanga!
20Olwohuba engulu chimeraho obunyaasi bu yilya
haandu huungulu nihwo hu bisolo byoosi bibaira.
21Yikonaanga aasi w'ebisaala by'amawa,
mani yeekisa mu bikada neende mu bidutu.
22Yeyikama mu siiniha sy'ebisaala by'amawa;
neende eby'emisaala kiyebodohaanie ekiri hu ndulo w'omwaalo.
23Bona, omwaalo nikuhulukusa neende amaani haba siyitya;
yiguma omwooyo kata neende omwaalo kwa Yorodaani kwahayihulukusira hu munwa.
24Alihooyo onyala ohuyidiira niyibona,
oba yaayiteka neende omuteego mani yaayifumita mu lyoolu neende oluyiingo?
Currently Selected:
Yobbu 40: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
